Ikar Tariņae Bwe In Anjo̧ Ioon Pija ko Renana Etke Eban E?
Ke ikar jeļā ke ļeo jera ekar wōr an apan̄ kōn pija ko renana, ikar kajjieon̄ in jipan̄ e oktak n̄an Rilo̧mo̧o̧r eo n̄an jipan̄.
Rijeje eo ej jokwe ilo Guatemala.
Ikar jerāiki juon likao me eo me ikar kanooj in iakwe ium̧win enan̄in juon iiō. Iar lukkuun ļōmņak inaaj kar tōn m̧areeik e! Bōtaab ijan̄in kar ļōmņak bwe aō jerā ippān enaaj kar kōm̧m̧an bwe in jelm̧ae juon jorrāān eo ikar ilo juon iien kakkōt n̄an anjo̧ ioon kōn aolep aō kajoor.
Ke ikar m̧aanjabpopo n̄an etal n̄an juon mijen, ikar aikuj in etal ippān bisop eo aō im kwaļo̧k ruwō bwe ikar en̄taan kajjieon̄ in bōjrak jān alooje pija ko renana m̧oktaļo̧k. Ālkin aō ukweļo̧k im joļo̧k eddo in jān jetōb eo aō, ikar jab bar ļōmņak bwe pija ko renana renaaj kar bar jelet mour eo aō. Bōtaab ekar bōd aō ļōmņak.
Ke iaar jeļā ke em̧m̧aan in ikar ļōmņak in m̧areiki ekar alooji pija ko renana, ikar m̧ōņōņō in jipan̄ e im rejetak e bwe en anjo̧ ioon. Ikar dibuk jekjek eo an ukweļo̧k im kijejeto eo n̄an anjo̧ ioon pija ko renana m̧okta, im ta eo ikar jeļā Irooj emaron̄ in kar kōm̧m̧ane n̄an E. Ak enan̄in aolep iien ke ikar kajjieon̄ in tōlļo̧k e n̄an jipan̄ eo ekar aikuji bwe en anjo̧ ioon jorrāān eo an, men otemjej aolep iien rej etal im bōd. Āinwōt eaar jab kōņaan jipan̄. Ālkin jet iien, ikar kile bwe kōm ar jab errā ilo amro ļōmņak kōn pija ko renana. Aaet, kōmro ar jim̧or uwaan Kabun̄ in, ak katak ko an gospel eo raar jab aorōk n̄an e āinwōt raar aorōk n̄an eō.
Ikar inepata. Ikar iakwe e, im ikar tōmak bwe kōn jipan̄, emaron̄ in kar anjo̧ ioon jorrāān in an. Ikar barāinwōt mijak kōnke ikar aikuj in bar jelm̧ae men eo ikar lukkuun kate eō m̧okta bwe in anjo̧ ioon. Iaar jokāālet n̄an jar juon bon̄ im kajjitōk kōn māletlet jān Jemed ilo Ilan̄ kōn ekōjkan wōnm̧aanļo̧k kōnke iaar aikuji kajoor eo n̄an jum̧ae kapo, im iaar barāinwōt kōņaan jeļā ekōjkan rejtake armej eo iaar ļōmņak n̄an ajeļo̧k mour eo n̄an ippān.
Āliktata ke uwaak eo eaar itok, ikar en̄jake aenōm̧m̧an im kar jeļā iaar aikuj in kōnono n̄an em̧m̧aan eo iaar jeraik kōn juon kōttōpar ilo ļōmņak eo aō. Ikar kōņaan karon̄ e ta eo ikar kōtmene jān jerāiki, eo eaar m̧are ilo tampeļ im en wōr nejū ajri. Ikar aikuj in jeļā eļan̄n̄e ilju jekļaj ko am̧ro raar ekkejel im eļan̄n̄e eaar epaakeļo̧k Rilo̧mo̧o̧r eo. Ikar aikuj in jeļā eļan̄n̄e kōmij aikuj in kar wōnm̧aanļo̧k ilo jera eo am̧ro. Ekar wōr aō kōjatdikdik ko reutiej kake im kar tōmak bwe ālkin am ekōnono, aolep men renaaj kar em̧m̧an.
Ekar juon ālkin rālep edet ke iaar kwaļo̧ke ippān ettōņak ko im kōttōpar ko aō kōn baam̧le eo aō ilju jekļaj im karrūtoļo̧k ajri ro nejū ilo gospel eo. N̄an ļo̧kjeņ eo aō, ālkin an ron̄jake eō, ekar kūtōtō ippa. Ikar kile ļōmņak ko am raar lukkuun in oktak kōn ilju jekļaj. Iaar inepata, bōtaab bwilōn̄ iaar aenōm̧m̧an, im iaar jeļā uwaak eo aō eaar n̄an kōjem̧lo̧k jemjerā eo. Eaar jab pād ilo ijo me eaar kōņaan kajjieon̄ n̄an anjo̧ ioon jorrāān ko an kōn pija ko renana ak oktakļo̧k n̄an Rilo̧mo̧o̧r eo kōn jipan̄, im iaar jab maron̄ jipan̄ e eļan̄n̄e eaar jab kōņaan jipan̄.
Ium̧win juon iien, iaar ļōmņak etke jekdo̧o̧n ālkin kōm̧m̧ane men eo ejim̧we im kōm̧m̧ane aolep men ko ikar maron̄ n̄an jipan̄ e, būruwō eaar ilo jem̧ļo̧k in lukkuun in rup. Bōtaab āliktata, ikar kadedeļo̧k aō jan̄ kake im ikar ļōmņak wōt kōn aenōm̧m̧an eo ikar en̄jake ke ikar kōjem̧ļo̧k jem̧jerā eo am̧ro. Ikar jeļā bwe uwaak eo ekar itok jān lan̄.
Ekar jet iiō ko jān ke jemjerā eo aō ippān kar em̧m̧an jab in ekar jem̧ļo̧k. Im ij ļōmņak wōt kake āinwōt juon armej eo eaar aolep iien em̧m̧an. Bōtaab ijeļā bwe e eo ej aikuj in e eo ej etal n̄an Rilo̧mo̧o̧r eo n̄an jipan̄—Ijjab maron̄ kiele n̄an an etal. Ewōr an anemkwōj in kāālet im ewōr aō. jān iien in, em̧ōj aō kajjieon̄ in ļoor ainikien jetōb Kwojarjar eo ilo ejjeļo̧k pere. Ijeļā bwe Jemedwōj Ilan̄ ewōr juon an karōk n̄an kōjwōjj aolep im bwe jemaron̄ lōke ilo ad kōm̧m̧ani jokāālet ko pedped ioon im̧we ko an Jetōb, Ejjamin naaj kōtļo̧k bwe jen tōl kōj n̄an jebwābwe. E ej iien otemjej kōpooj kōj n̄an men ko rem̧m̧an rej itok wōt.