Aō Wōnm̧aanļo̧k Ālkin Aō Jeļā Kōn an Armej eo Ij Itōn M̧areiki Kōjerbale Pija ko Renana
Armej eo ij itōn m̧areiki ekar kwaļo̧k ke elōn̄ an apan̄ kōn pija ko renana. Imaron̄ ke kar m̧areiki wōt?
Rijeje eo ej jokwe ilo French Polynesia.
Ikar loe ļeo pāleeō ke kōm̧ro kar jim̧or rikapilōk ro ilo EFY. Ikar m̧ōņōņō kōn naan in kam̧ool eo an ekajoor im wāween an katakin im jerbal ippān jodikdik ro.
Ke kōmro ar jino jerā, kōm ar en̄jake bwe Irooj ekar kōtmāne juon men jān jem̧jerā eo am̧ro. Ilo amro wōnm̧̧aanļo̧k wōt, mekarta, ekar ļapļo̧k im oktak wāween an kōņaan kwaļo̧k iakwe. Ikar jino in ļōmņak bwe ekar lōn̄ men ko reppen kōn pija ko renana, ak ke kōm ar kōnono kake, ekar ba bwe ejjab kōm̧m̧ane.
Kōm ar kōm̧m̧an kien ko n̄an kōjparok kōm make. Ke ekar kajjitōk ippa bwe in m̧areiki, ikar ba aaet im men ko raar em̧m̧anļo̧k–m̧ae iien eo ke, bar juon iien, ekar jino in kōņaan kwaļo̧k an iakwe ilo wāween ko me rejjab em̧m̧an ippa.
Ikar ļōmņak wōt bwe ekar kōjerbale pija ko renana, im juon raan ikar kōnnaan ippān kōn juon iaan sister ro m̧ōtta jān mijen eo aō me ekar barāinwōt kakkōt kabōjrak alooje pija ko renana m̧okta jān mijen eo an. Ikar kajjieon̄ in kōnono kōn meļeļe, iakwe, im jab ekajet, kōnke lien ekar juon armej eļap an em̧m̧an. Innām ikar bar kajjitōk ippān eļan̄n̄e ekar an̄ūr alooje pija ko renana, im ekar āliktata jiron̄ tok eō ke ekar kōm̧m̧ane.
Metak im Mour
M̧oktata, ekar pen aō kōnono ippān im kalimjek mejān. En̄jake ko aō raar lukkuun eddo kōnke ikar en̄jake bwe em̧ōj an Irooj ba bwe ļein emaron̄ kar ļeo pāleeō n̄an indeeo. A men̄e ikar būrom̧ōj, ikar jeļā ke iaikuj in jerbal n̄an aō joļo̧k an bōd, im ikar en̄jake bwe in jab ebweer.
Eļap aō kar jar im katak kōn joļo̧k bōd im wāween kōjerbale pija ko renana. Ikar riit elōn̄ ennaan ko im naan in kam̧ool ko jān ro me raar m̧are juon eo im ej kakkōt kōn ejja baijin rot in. Ke ikar riit, ikar en̄jake iakwe eo an aō Rilo̧mo̧o̧r im an armej eo ij itōn kar m̧areiki, im ikar bōk juon uwaak bwe ļein ekar em̧m̧aan eo me enaaj ļeo pāleeō n̄an indeeo. Ikar barāinwōt katak eļapļo̧k kōn Pinmuur eo an Rilo̧mo̧o̧r eo—ewi wāween An kōmour juon jetōb ej ukweļo̧k (armej eo ij itōn m̧areiki) im juon bōro emetak (būruwō).
Juon m̧ōttan iaļ eo eaorōk ekar am kōnono ippān bisop eo an armej ij itōn m̧areiki. Tōl eo an ekar jipan̄ kōmro mour im eddōkļo̧k āinwōt ripālele. Eļap an kar kijenmej ke ļeo pāleeō ekar bar kōm̧m̧an bōd, im waanjon̄ak in iakwe eo an āinwōt Kraist ekar jipan̄ eō n̄an aō joļo̧k bōd im jerbal ippān armej eo ij itōn m̧areiki bwe en anjo̧.
Ilo jidik iien, ekar kanooj in pen n̄an ļeo ipojān m̧areiki (fiancé) n̄an lo an en̄taan kōnke kōn kāālet ko an me eaar enan̄in kar jab kōņaan m̧areik eō n̄an jidik! Ak ālkin am̧ro jerbal ippān doon ium̧win elōn̄ allōn̄ bwe en erreo, ekar en̄jake bwe jim̧or n̄a im Irooj ar joļo̧k an bōd ilo m̧ool.
Tokālik, kōm̧ro ar m̧are, im kōmij lukkuun kajoor kiiō. Men in ear jipan̄ kōm bwe kōmin jab jook in kōnono ippān doon kōn inepata ko am. Im men̄e ejjab alooje pija ko renana kiiō, kōmij lukkuun lale bwe kōmijj jipan̄ doon.
Jem̧jerā eo Am̧ Emaron̄ Jerbal
Eļan̄n̄e jem̧jerā eo am̧ ej baijin jān pija ko renana, jeļā bwe kom̧ maron̄ bōk joļo̧k bōd. Kom̧ maron̄ wōnm̧aanļo̧k ilo ami iakwe doon im jerbal ippān doon bwe kom̧in anjo̧ ioon. Jemaron̄ aolep bōk mour jān Pinmuur eo an Rilo̧mo̧o̧r eo. Jej aikuj in kile bwe jej nan̄inmej im bwe jemaron̄ bōk mour kōn wōt jipan̄ eo an Rilo̧mo̧o̧r eo.
Aolep armej reoktak jān doon, im aolep jem̧jerā ko reoktak jān doon. N̄an jet armej, kōjem̧ļo̧ke jem̧jerā eo emaron̄ in men eo ejim̧we n̄an kōm̧m̧an. Ak ij kōjatdikdik bwe bwebwenato in am emaron̄ jipan̄ ro jet me rej en̄taan kōn ejja jekjek rōt kein. Kōnke ikar bōk jeļā in jān Jetōb Kwojarjar, im kōn jipan̄ eo an Rilo̧mo̧o̧r eo im Pinmuur eo An, ikar maron̄ in joļo̧k an armej eo ij itōn m̧areiki bōd im wōnm̧aanļo̧k ilo jem̧jerā eo am. Ijeļā ke men in ekar kāālet eo ejim̧we n̄an n̄a.
N̄e kwōj jelm̧ae juon jekjek āinwōt in, lukkuun jar kōn ta eo kwōn kōm̧m̧ane Eļan̄n̄e kwōj bōk kapen jān Jetōb eo bwe kwōn wōnm̧aanļo̧k ilo jem̧jerā eo am̧ ej ke men eo ejim̧we im en̄jake lōke, jeļā bwe n̄e kom̧ij kate kom̧ im pedped wōt ioon Jemedwōj Ilan̄, jem̧jerā eo am̧ emaron̄ em̧m̧an.
Ļeo pāleeō ej juon armej elukkuun em̧m̧an, im eļap aō iakwe e! Ij kam̧m̧oolol Irooj kōn an jipan̄ kōm im kōmour kōm im an kōm̧m̧an bwe kōmro kar maron̄ in m̧are. Em̧ōj an Irooj jipan̄ kōmro eddōkļo̧k ippān doon n̄an am maron̄ pojak in jelm̧ae jabdewōt men ko me kōm naaj aikuj in kōm̧m̧ane ilo mour in am ippān doon.