Ang Kapakyasan Usa ka Bahin sa Plano

Ni Adam C. Olson

Mga Magasin sa Simbahan

Upat ka leksyon nga atong makat-unan gikan sa paboritong “mga kapakyasan” diha sa mga kasulatan.

Ang usa ka maayong porsyon sa internet daw gipahinungod sa pagsaulog sa “makauulaw nga sayop [epic fail]”—gikan sa Pinterest fails sa mga video nga pabali nga pag-tumbling [backflips]. Tingali pangandoy natong mahibalo nga wala kita mag-inusara dihang ang pinakamaayo natong mga paningkamot daw dili kaayo maayo. Ah, dunay laing paagi aron mahibalo.

Kon bation nimo nga ang imong mga adlaw puno sa kapakyasan, pangita og kadasig gikan sa mga kasulatan. Puno kini sa dili kaayo hingpit nga mga paningkamot sa pipila ka talagsaong mga tawo. Aniay pipila lamang sa ilang mga leksyon nga makatabang aron imong maamguhan nga tingali mas maayo ang imong nahimo kay sa imong gituohan.

1. Ang pagtuo dili mopugong sa pagkapakyas; kini maghimo nga makahuluganon.

Puno sa pagtuo si Nephi dihang siya ug ang iyang mga igsoon namalik sa pagkuha sa mga palid nga tumbaga, apan wala kadto makapugong sa miserable nilang pagkapakyas—duha ka higayon (tan-awa sa 1 Nephi 3). Apan ang iyang pagtuo atubangan sa pagkapakyas nakatabang nga ang iyang pagkapakyas himoong preparasyon para sa kalampusan. Ang unang pakyas nga pakigtagbo kang Laban nakatabang ba nga maandam si Nephi sa pag-ila kaniya, pagkopya sa iyang tingog, pagpangita sa iyang balay, ug pagkuha sa sagradong mga rekord? Labing siguro wala kita masayud. Apan ang atong nasayran nga ang umaabut natong kalampusan sa kasagaran resulta sa atong nakat-unan sa nangaging mga kapakyasan.

2. Napanglantawan daan sa Dios ang atong mga kapakyasan ug giplano nang daan.

Human nahibaloan ni Joseph nga nawala ang 116 ka mga pahina nga manuskrito sa Basahon ni Mormon, mituaw siya, “Wala na ang Tanan!”¹ Nahibalo siyang napakyas siya. Nahibalo siyang mabadlong siya ug posibling isalikway. Apan ang tanan wala mawala. Nalantaw nang daan sa Dios ang pagkapakyas ni Joseph mga 2,000 ka tuig na ang milabay ug naandam alang niini.

Sa samang paagi, nalantaw nang daan sa Dios ang atong mga pagkapakyas dugay na sa wala pa malalang ang kalibutan.² Mahimo niyang himoong panalangin ang atong mga sayop (tan-awa sa Mga Taga-Roma 8:28). Ug nag-andam Siya og usa ka Manluluwas aron kon ang atong mga pagkapakyas maglakip og sala, makahinulsol kita, magtugot kanato nga “makat-on gikan sa [atong] kasinatian nga dili mapanghimaraot tungod niini.”³

3. Ayaw pag-undang; dili nato makita sa kanunay ang atong kalampusan.

Si Abinadi gitawag sa pagsangyaw og paghinulsol ngadto sa katawhan. Kon gisukod pa ni Abinadi ang iyang kalampusan base sa gidaghanon sa tawo nga naghinulsol, basin namatay siya sa pagtuo nga klaro ang iyang pagkapakyas. Sa unang higayon nga nagsangyaw siya sa katawhan ni Haring Noah sa paghinulsol, gisalikway siya ug hapit wala maluwas ang iyang kinabuhi. (Tan-awa sa Mosiah 11:20–29.) Imbis moundang, misulay na usab siya, nasayud nga pwede siyang mamatay—ug mao gayud.

Apan tungod kay wala siya moundang, sa katapusan ang katawhan naghinulsol (tan-awa sa Mosiah 21:33). Ang dugang pang nahitabo, nakabig si Alma, mitudlo ug mibunyag og daghan, ug miorganisar sa Simbahan taliwala sa mga Nephite. Ang mga kaliwatan ni Alma nangulo sa Simbahan, ug sa ubang higayon ang nasud, hangtud sa pag-anhi ni Jesukristo, nakakabig og liboan, lakip na ang kadaghanan sa mga Lamanite (tan-awa sa Helaman 5:50). Ang usa ka tawo nga dili moundang bisan sa mga kapakyasan makahimo og dili katuohang kalainan.

4. Usahay mas minos ang kaimportante sa pagsulbad sa problema kay sa pagkat-on gikan niini.

Si Oliver Granger naanad na nga magbaton og awtoridad aron mahimo ang mga butang. Sa wala pa mopasakop sa Simbahan niadtong mga 1830, usa siya ka tigpatuman sa balaod sa nasud, koronel sa militar, ug lisensyado nga tigsangyaw sa iyang simbahan. Human magpasakop sa simbahan, nakaserbisyo siya og duha ka misyon ug namiyembro sa high council sa Kirtland. Apan si Oliver gihatagan ni Joseph Smith og daw imposible nga tahas sa paghusay sa mga kalihokan sa mga lider sa Simbahan kinsa gipalayas palayo sa Kirtland.⁴

Mibati nga daw napakyas, miadto si Oliver kang Joseph ug nakadungog sa Ginoo nga miingon, “Ako nahinumdom sa akong sulugoon nga si Oliver Granger; … ug kon siya mapukan siya makabangon pag-usab, kay ang iyang pagsakripisyo mahimo nga labaw pa nga sagrado ngari kanako kay sa iyang paglambo” (D&P 117:12–13). Gikan kang Oliver, atong makat-unan nga ang resulta nga gipangita sa Dios dili sa kanunay nga aron kita makakab-ot sa eksaktong sulbad sa atong mga hagit, apan aron kita motubo pinaagi sa pag-atubang niini.

Posibling magkayamukat ang kalamboan

Ania kita dinhi aron sa pagkat-on ug pagtubo, apan ang paglambo dili moabut kon walay oposisyon. Kitang tanan masayop, miingon si Presidente Dieter F. Uchtdorf, Ikaduhang Magtatambag sa Unang Kapangulohan, apan “mga kaigsoonan, ang atong kapalaran dili magbase kon kapila kita natumba apan kon kapila kita mibangon, mipapha sa abug sa atong kaugalingon, ug mipadayon.”⁵

Mubo nga mga Sulat

1. Tan-awa sa “Lucy Mack Smith, History, 1844–1845,” book 7, pages 5–6. Para sa dugang pang mga leksyon gikan niini nga kasinatian, tan-awa sa Keith W. Perkins, “Thou Art Still Chosen,” Ensign, Ene. 1993, 14–19.

2. Sa wala madugay mitudlo si Joseph: “Ang halangdon nga Jehova mihunahuna sa tibuok nga mga panghitabo nga may kalabutan sa yuta, kabahin sa plano sa kaluwasan, sa wala pa kini mahinabo. … Siya nasayud sa kahimtang sa buhi ug sa patay, ug mihimo og mga pagpangandam alang sa ilang katubsanan” (diha sa Mga Pagtulun-an sa mga Presidente sa Simbahan: Joseph Smith [2007], 492–3).

3. Bruce C. Hafen, “Ang Pag-ula: Ang Tanan alang sa Tanan,” Liahona, Mayo 2004, 97.

4. Tan-awa sa Boyd K. Packer, “Sa Usa sa Labing Ubos Niini,” Liahona, Nob. 2004, 86–88; tan-awa usab sa The Joseph Smith Papers, History, 1838–1856, volume B–1 [1 Septyembre 1834–2 Nobyembre 1838], 837.

5. Dieter F. Uchtdorf, “Makahimo Kamo Niini Karon!” Liahona, Nob. 2013, 55–56.

Mahimo na Usab Natong Sulayan

“Gitudlo ni Presidente Thomas S. Monson [1927–2018] nga, ‘Usa sa pinakamahinungdanong gasa sa Dios kanato mao ang kalipay sa pagsubli sa paningkamot, kay dili angay nga ang kapakyasan maoy kaulahian.’ Bisan kon kita tuyo nga nagpakasala o kanunay nga napakyas ug nasagmuyo, sa panahon nga mohukom ta nga maningkamot pag-usab, ang Pag-ula ni Kristo makatabang kanato.”

Elder Dale G. Renlund sa Korum sa Napulog Duha ka mga Apostoles, “Ang mga Santos sa Ulahing mga Adlaw Magpadayon sa Pagpaningkamot,” Liahona, Mayo 2015, 57.

Pagdiskubre Pa og Dugang

Basaha ang dugang pa mahitungod sa kasinatian ni Joseph Smith nga nawad-an sa 116 ka pahina sa Basahon ni Mormon Liahona artikulo nga “All Is Lost [Wala na Ang Tanan].”