Labaw Pa Kita Kay sa Atong mga Titulo
Ang imong bili dili matino kon unsay imong mahimo o dili mahimo.
Kita mga tawo nga ganahan nga mobutang og titulo sa atong kaugalingon—anak nga babaye, artista, estudyante, runner. Samtang ang mga titulo motugot nato, nga modugang sa atong pag-ila sa kaugalingon, ug mohatag nato og mga oportunidad sa kalamboan, usab adunay makuyaw nga bahin niini. Kon kita motandi sa atong mga titulo ngadto sa uban, mogamit og mga titulo nga mopatigbabaw o makigbangi sa atong balaan nga kinaiya, o motugot sa pipila ka titulo nga mopabati nato nga mas ubos, ang atong mga pagbati ug mga pagtuo sa bili sa kaugalingon ug pagkaespirituhanon hingpit nga malaglag.
Busa, unsa kaha kon mosulti kami ninyo nga adunay usa ka importante, walay katapusan, ug talagsaong titulo nga giaambitan natong tanan?
Ania ang pipila ka mga panabut gikan sa tulo ka lahi kaayo nga mga igsoong babaye, kinsa nagpuyo og lahi kaayo nga mga kinabuhi. Apan kitang tanan nagpakigbahin sa labing importante nga titulo sa tanan.
Chantele:
Usahay lisud ang dili pagkumpara sa inyong kaugalingon ngadto sa uban, ilabi na diha sa pamilya. Usa ka ehemplo nga akong giatubang sa akong tibuok kinabuhi mao nga adunay mga tawo nga mokumpara nako ug sa akong duha ka igsoong babaye sa tanang panahon. Tanan kita managlahi. Kita anaa sa lain-laing ang-ang sa atong kinabuhi ug adunay lain-laing mga talento ug lain-laing mga personalidad. Minyo ako og dul-an na sa 15 ka tuig, ako adunay upat ka anak, nakasulat ko ug nakamantala og lima ka nobela sa nasudnong merkado ug nakapatukar og alpa hapit na 30 ka tuig. Ako adunay daghang mga tumong nga gusto nakong makab-ot. Kon maguol ko nga wala makab-ot ang daghan nakong gusto, makahinumdom ko sa gugma sa Langitnong Amahan alang nako, bisan kon dili nako makab-ot ang tanan. Samtang maghunahuna ko nga ang atong lain-laing mga talento mohulma kon kinsa kita, kon imo kanang kuhaon ang tanan—ang tanang mga talento ug mga titulo, walay usa niana ang importante. Ang labing importante ug impluwensyal nga butang—mao ang atong pagkatawo isip mga anak sa Dios. Basta nagbuhat lang ko kutob sa mahimo, ang Langitnong Amahan mouban kanako. Kana nga kamatuoran nagtabang nako sa akong panaw ug naghatag nako og kahupayan, bisan pa sa mga titulo nga gihatag sa kalibutan kanako o bisan kanang akong gihatag sa akong kaugalingon.
Chaleese:
Usa ako ka mama nga naa ra sa balay. Aduna koy tulo ka anak nga lalaki ug bana kinsa mao ang labing importante sa akong kinabuhi. Ako ang ilang labing dako nga tigsuporta. Sila nagrepresentar kinsa ako. Wala akoy trabaho sa gawas sa akong pamilya. Ang akong magulang nga igsoong babaye naa ra usab sa balay uban sa upat ka anak, apan talagsaon usab siya nga tagsulat. Ang akong manghud nga babaye mao lamang ang nakagradwar sa kolehiyo sa pamilya, malipayon kaayo siya sa iyang trabaho, ug wala pa siya maminyo. Tanan kita managlahi. Kita adunay lain-lain nga mga titulo, apan kadtong mga titulo wala maghimo nato nga mas bililhon kay sa usa. Bisan pa sa atong mga kalainan, kitang tanan mga anak sa Dios, ug Siya nahigugma natong tanan. Sa katapusan, mao kana ang importante. Ang akong mga titulo tingali lahi sa akong mga igsoong babaye, apan kon kuhaon nimo kana, kitang tanan pareha ra. Kita adunay pareha nga mahangturong potensyal.
Chakell:
Naningkamot ko nga makaangkon og daghang titulo. Gradwado ko sa kolehiyo, usa ka magsusulat, ug usa ka tigpasiugda sa pagbuhat og cheesecake nga importante nga pagkaon. Apan ako adunay mga titulo usab nga dili ko malipayon. Dili ko minyo, dunay problema sa panglawas, ug kasagaran, mobati ko nga may kulang. Akong gitugutan ang pipila sa akong gitawag nga “huyang” nga mga titulo nga moimpluwensya nako kay sa ilang mahimo. Ug usahay, bisan ang mga titulo nga akong gipasigarbo magsugod sa pagpatigbabaw sa akong tinuod nga pagkatawo. Apan kon tinud-anay akong maghunahuna kinsa ako ug mahinumdom nga ako usa ka anak sa Dios, kini makapausab sa tanan. Ang usa ka titulo nga tinud-anay nga naghatag og kahulugan sa kinabuhi mao ang atong balaan nga pagkatawo. Wala ko makahibalo sa tanan sa akong umaabut o unsa nga mga titulo ang akong maangkon o dili maangkon niini nga kinabuhi, apan ako mahupay nga makahimo sa pagsulti, “Ako anak sa Dios” ug ang pagkahibalo unsay gipasabut niini labaw pa kay sa bisan unsa. Ug dili kinahanglan nga ako maningkamot niana nga titulo o sa Iyang gugma—gihatag kini kanako nga libre. Nasayud ko nga kon maningkamot ko sa pagpuyo sa akong kinabuhi sumala sa Iyang kabubut-on, ug kon ako mahinumdom kon kinsa ako, siya mopanalangin kanako (tan-awa sa D&P 82:10). Kon ang akong tanang mga titulo mosumpay nianang tinud-anay nga maoy importante, makakaplag ako og tinuod nga kalipay, kalig-on, ug kabantog niining tanan.