Naningkamot nga Mahimong Intelihente ug Halangdon nga Inahan

Ni Lilian Pagaduan-Villamor

Ang tagsulat nagpuyo sa Metro Manila, Philippines.

Nakigbisog ko sa pagpangita sa katuyoan sa pagkainahan. Dayon ang sulod sa usa ka karaang journal nakapausab sa akong panglantaw.

Gusto gyud nako nga makasalmot sa siyensya. Atol sa akong pag-eskwela sa Brigham Young University–Hawaii, si Dr. Douglas Oba, usa ka propesor nga maayong mosuporta, mitudlo ug mibansay nako sa molecular biology ug biotechnology. Nakakuha gani ko og oportunidad nga makatrabaho sa molecular laboratory sa Brigham Young University sa Provo, Utah, USA, alang sa summer internship.

Sa dihang mipauli ko sa Pilipinas, nakatrabaho ko sa DNA Analysis Laboratory sa University of the Philippines. Ang mga highlight sa akong panarbaho naglakip sa pagtrabaho sa lain-laing mga proyekto sa komunidad, pagtambong sa mga training ug mga komperensya, ug pagkainila sa lokal ug internasyonal nga mga komunidad sa siyensya tungod sa akong mga scientific publication. Nagsugod usab ko sa akong graduate program. Gibati nako nga kontento sa akong bag-ong trabaho.

Human sa duha ka tuig nga pagtrabaho, naminyo ko sa akong amigo sa pagkabata didto sa templo. Sa wala madugay, miabut ang among unang anak ug sa unang higayon akong nakaplagan ang akong kaugalingon nga nagkalisud. Wala ko kahibalo unsaon sa pagbalanse sa pag-atiman sa bata, paggahin og panahon sa akong bana, pagsulod sa mga klase sa akong graduate program, sa daghang mga proyekto ug mga papeles sa trabaho, ug sa pagtuman sa mga calling sa Simbahan. Nakigsulti ko sa akong bana mahitungod sa akong kalisud, ug malumo siyang miingon nga akong ikonsiderar ang pag-undang sa akong trabaho. Nakakita ko sa kaalam sa iyang tambag, apan dili pa ko andam nga mobiya sa akong propesyunal nga kinabuhi.

Sa dihang nagmabdos ko sa among ikaduhang anak, sayo ko nga nag-labor nga kinahanglan nga mopahulay ko. Sa katapusan nakaamgo ko nga dili nako mabuhat ang tanan. Nasayud ko nga kinahanglan ko nga mopili sa labing maayo alang nako ug sa akong pamilya. Human sa daghang pagpamalandong ug pag-ampo, nakahukom ko nga mobiya sa akong trabaho sa siyensya ug ihalad ang akong tibuok panahon sa akong mga anak.

Duna koy plano sa pagkainahan sa akong tibuok kinabuhi, apan wala gyud ko makaamgo unsa ka dako nga sakripisyo niini nga pagpili. Naningkamot ko pag-ayo nga makabaton og positibo nga kinaiya, apan naguol ko pirme nga ang akong trabaho ug graduate program sayo nga naundang. Nag-ampo ko sa Langitnong Amahan alang sa espirituhanong kalig-on sa pagtuman sa kinasingkasing sa akong tahas isip usa ka inahan. Mapailubong naminaw ang akong bana sa akong mga kabalaka. Giawhag ko niya sa pagsulat sa akong mga hunahuna ug mga pagbati sa akong journal, nga taud-taod na nakong wala masulati tungod sa ka-busy sa akong iskedyul.

Usa ka adlaw, samtang ang akong mga anak natulog, nakahukom ko nga mobasa sa akong karaang mga journal. Samtang nagribyu ko niini, nadani ko nga kanunay kong nagsulat mahitungod sa akong dakong tinguha nga mahimong usa ka inahan sa dihang batan-on ug young single adult pa ko. Usa ka lahing pamahayag nga nakapatandog nako: “Maningkamot ko nga molampus sa akong akademik ug espirituhanong pagkat-on aron ako mahimong intelihente ug halangdong inahan sa akong mga anak.”

Kana nga kahayag mao ang akong labing gikinahanglan! Gibati nako nga ang Espiritu mipamatuod nako nga ako nakahimo og sakto nga pagpili alang sa akong pamilya. Nakaamgo ko nga ang akong kasinatian sa edukasyon ug trabaho dili lang alang sa akong kaayohan apan alang sa akong mga anak. Gibag-o niini ang akong pagpamatuod ug mahangturong panglantaw sa pagkainahan.

Nagpuyo ra ko sa balay sulod sa lima ka tuig. Sa katapusan, nakahuman ko sa akong graduate program ug mibalik sa pagtrabaho sa dihang midagko na ang among mga anak. Nagpadayon ko sa pagkat-on sa pagbalanse sa akong limitado nga oras sa paghimo sa akong mga katungdanan sa trabaho, balay, ug simbahan, apan nasayud ko nga nahimo kining tanan tungod sa tabang sa Ginoo. Nagpadayon ko sa pag-angkon og bililhong kasinatian sa “laboratoryo sa kinabuhi” ug nakakita og kalipay ug katuyoan sa pagkainahan.

Dinasig nga mga Pagpili

“Kon makahibalo ka na sa kabubut-on sa Ginoo, makapadayon ka pinaagi sa pagtuo sa pagtuman sa imong indibidwal nga katuyoan. Usa ka sister mahimong madasig sa pagpadayon sa iyang edukasyon ug moeskwela sa medical school, magtugot niya nga makahimo og importante nga epekto sa iyang mga pasyente ug sa pagpalambo pa sa medical research. Alang sa laing sister, ang inspirasyon mahimong mogiya kaniya nga dili mopadayon sa usa ka scholarship sa usa ka inila nga institusyon ug hinoon magsugod og usa ka pamilya sa bata-ong pangidaron nga nahimong komon niini nga henerasyon, magtugot niya sa pahimo og importante ug mahangturong epekto sa iyang mga anak karon.

“Posible ba alang sa duha ka susama nga matinud-anong babaye nga makadawat og lain-laing mga tubag sa samang pangutana? Sigurado gayud! Unsay sakto sa usa ka babaye mahimong dili sakto sa laing babaye. Mao nga importante kaayo nga kita kinahanglang dili mokwestyon sa mga pagpili sa usag usa o sa inspirasyon nga nagpaluyo niini.”

Presidente M. Russell Ballard, Akting Presidente sa Korum sa Napulog Duha ka mga Apostoles, “Women of Dedication, Faith, Determination, and Action” (Brigham Young University Women’s Conference address, Mayo 1, 2015), 4, womensconference.byu.edu.