Mga Hulagway sa Hugot nga Pagtuo

Darren ug Stacey Rea

Sydney, Australia

Sila si Darren ug Stacey Rea nalingaw nga naggahin og panahon uban sa ilang anak nga babaye, si Faith, sa usa ka baybayon duol sa ilang balay. Sa wala pa matawo si Faith, ang mga Rea nag-atubang og daghang seryoso nga mga hagit. Wala makahibalo unsay buhaton, si Darren miingon, “Mibalhin kami ngadto sa walay kasiguroan. Wala kami masayud unsay anaa sa unahan namo.”

Nag-atubang og walay kasiguroan sa umaabut, si Darren ug si Stacey nakamatikod nga ang ilang hugot nga pagtuo kang Jesukristo nakatabang nila sa ilang mga hagit. “Adunay seryoso nga kalinaw ug kalipay sa pagsunod ni Jesus ug sa pagbuhat sa sakto nga butang,” miingon si Stacey.

Ang mga Rea mapasalamaton sa diwa nga ilang natagamtaman sa ilang panimalay. “Ang ebanghelyo aduna sa tanan,” miingon si Stacey. “Makahatag kini og kalipay kanato niini nga kinabuhi.”

Si Faith usa ka pahinumdom nila ni Darren ug Stacey sa tanang mga panalangin nga ilang nadawat. “Siya ang bidlisiw sa paglaum ug pagtuo ug kahimuot!” Miingon si Darren.

Sila si Darren ug Stacey mibaligya sa tanan aron makab-ot ang iyang gidamgo nga trabaho sa pag-animate alang sa usa ka movie studio [himuanan og pelikula] sa London, England. Apan sa dihang ilang nahibaloan nga duna nay bata nga moabut human sa daghang tuig sa pagpaningkamot ilang naamgohan nga dili sila makahimo sa pagpuyo didto sa iyang kinitaan lamang.

Christina Smith, tiglitrato

Stacey: Nag-istorya mi bahin sa pagbalhin og balik ngadto sa Australia. Sa Brisbane walay mga movie studio. Si Darren kinahanglan gyud nga moundang sa iyang trabaho.

Darren: Mibalhin kami ngadto sa walay kasiguroan. Wala kami masayud unsay anaa sa among unahan.

Stacey: Sa dihang lima na ka bulan ko nga nagmabdos, gihatagan ko og dinadali-dali nga assignment sa pagpamulong sa miting sa sakrament. Ang hilisgutan mao ang pagtuo kang Jesukristo pinaagi sa mga pagsulay. Hangtud nianang panahona, wala pa gihapon mi makahukom alang sa ngalan sa among anak nga babaye. Samtang nangandam ko sa pakigpulong, nagbasa ko sa Bible Dictionary ug Topical Guide sa “Faith.” Nagsige ko og kakita sa pulong faith, faith, faith, ug 100 ka porsyento nga sigurado ko unsay ihatag nga ngalan sa among anak nga babaye. Mitan-aw ko ni Darren ug miingon, “Faith. Mao kana ang iyang ngalan. Mao kana ang akong gusto nga ihingalan sa akong anak nga babaye.”

Darren: Kaming duha mibati og nindot sa ngalan nga Faith. Ingon og nagpadayag kini sa matag kasinatian nga among naagian.

Stacey: Kinahanglan kami og dako kaayong pagtuo sa pag-undang ni Darren sa iyang trabaho, mobalik ngadto sa lugar nga walay mga oportunidad, ug magsugod nga walay kasiguroang mga trabaho.

Darren: Mibalhin kami pinaagi sa pagtuo ug nagtuo nga ang tanan mamaayo ra. Namauli kami ug gidawat nako ang trabaho sa pagtudlo nga may kalabutan sa akong kurso sa usa ka unibersidad. Dayon nadaot ang akong likod ug kinahanglang moundang sa trabaho sa pagtudlo.

Stacey: Mibalhin mi sa among mga ginikanan. Wala mi kwarta ug walay sakyanan.

Darren: Gibati nako nga dili na makapadayon. Ang akong asawa mabdos, apan ako walay trabaho ug kami walay kwarta nga ikaabang og balay.

Stacey: Dihay mga higayon sa may labhanan sa balay sa akong ginikanan nga kami miluhod ug nag-ampo.

Darren: Wala lang kami mag-ampo, nangamuyo kami nga tabangan nga makalahutay niini ug makabarug sa among mga tiil.

Stacey: Tingali mao kadto ang labing mainiton nga pag-ampo nga sukad nga among nasulti. Pagkasunod adlaw, ang akong lola mitawag ug miingon nga siya mopalit og bag-ong sakyanan ug gusto nga ihatag namo ang iyang daang sakyanan.

Darren: Kana nakapasurprisa namo.

Stacey: Gibati namo nga usa kadto ka direkta nga tubag sa among pag-ampo.

Darren: Dayon nakadungog mi nga dunay moabli nga bag-ong studio sa Brisbane. Nakakuha ko og kontrata sa animation.

Stacey: Wala mi magtuo nga makatrabaho siya og animation sa Brisbane!

Darren: Ug ang akong igsoong lalaki mibisita nga dunay dala nga mga dulaan sa bata.

Stacey: Gihatagan mi og daghan kaayong mga butang alang sa among anak nga babaye gikan sa mga higala ug pamilya.

Dayon si Faith natawo ug—wala gani ko makahibalo unsaon kini sa paghulagway—siya ang labing nindot nga butang nga nahitabo. Karon sobra na siya sa dos anyos, ug namalhin kami ngadto sa Sydney. Si Darren nag-animate gihapon alang sa mga sine, nga wala namo damha nga mahitabo. Gibati gayud namo nga gipanalanginan. Ang among pagtuo migiya namo dinhi.

Darren: Klaro namong nakita ang kamot sa Dios sa among kinabuhi. Nanghinaut ko nga ang among gamay nga anak, si Faith, nakaangkon sa among pagtuo samtang miagi kami sa among mga pagsulay. Usa siya ka bidlisiw sa paglaum ug pagtuo ug kahimuot!

Stacey: Nakat-unan namo nga bisan unsa pay among naagian, ang labing importante nga butang nga among mabatunan mao ang pagtuo sa Langitnong Amahan ug ni Jesukristo.

Kon kami mopaduol ngadto ni Jesukristo ug magbaton og pagtuo Kaniya, ang tanan ingon og madala ra. Adunay seryoso nga kalinaw ug kalipay sa pagsunod ni Jesus ug sa pagbuhat og matarung nga butang. Ang ebanghelyo aduna sa tanan. Nagtugot kini nato nga magmalipayon niini nga kinabuhi. Malipayon gayud ako ug nasayud ako niini tungod kay miduol ako sa Ginoo, misalig sa ebanghelyo, ug nagbaton og pagtuo.

Darren: Nakat-unan nako nga ang Dios mihatag nato og mga sugo ug mga balaod aron sa paghimo sa atong kinabuhi nga mas malipayon tungod kay Siya makakita sa mas dako nga talan-awon. Kon kita dili makakita unsay anaa sa unahan nato, kinahanglan kitang mosalig Kaniya, motuman sa Iyang mga sugo, ug moduol Kaniya pinaagi sa pag-ampo. Mogiya Siya nato pinaagi sa atong mga pagsulay ug motabang nato sa paghimo sa atong kinabuhi nga mas maayo.