Pagtudlo sa Tech: Pagpaapil sa Kabatan-onan sa Panahon sa Digital
Ni Brian K. Ashton
Ikaduhang Magtatambag sa Kinatibuk-ang Kapangulohan sa Sunday School
Sa unsa nga paagi nga ang teknolohiya makatabang kay sa mahimong babag diha sa classroom?
Sa akong pagbisita sa mga ward ug mga stake sa tibuok simbahan, ang mga magtutudlo ug mga lider sa kabatan-onan sa kanunay mangutana, “Unsaon nato nga ang digital nga mga device dili makasamok sa klase?” Sa samang higayon, daghan sa labing maayong mga magtutudlo sa kabatan-onan nga akong naobserbahan mosugod sa ilang mga klase sa mga pulong nga “Kuhaa ang inyong mga telepono ug tan-awa ang …” Tungod niini, gusto kong mopakigbahin og pipila ka butang nga akong nakat-unan mahitungod sa paggamit sa kabatan-onan sa teknolohiya sa matarung ug mabungahon nga mga paagi diha sa classroom sa ebanghelyo.
Mga Panagna mahitungod sa Teknolohiya
Ang mga propeta ug mga apostoles namulong ngari kanato mahitungod sa mga panalangin sa teknolohiya, nagsulti kanato kon giunsa sa Langitnong Amahan sa paghatag nato sa teknolohiya aron matabangan kita sa pagpadayon sa Iyang buhat nga magkakusog. Niadtong 1862 si Presidente Brigham Young (1801–77) miingon: “Ang tanang nadiskobrehan sa siyensya ug art, nga tinuod gayud ug mapuslanon sa katawhan gihatag pinaagi sa direktang pagpadayag gikan sa Dios. … Gipanglantawan kini nga moandam alang sa katapusang kadaugan sa kamatuoran, ug ang katubsanan sa yuta gikan sa gahum sa sala ug ni Satanas. Kinahanglan natong pahimuslan kining tanang importanting mga nadiskobrehan … ug mohatag ngadto sa atong mga anak sa benepisyo sa matag sanga sa mapuslanong kahibalo, sa pag-andam kanila sa pagpadayon ug maayong pagkabuhat sa ilang bahin sa talagsaong buhat.”1
Paggamit sa Digital nga mga Device sa Matarung nga mga Kalihokan
Sa akong kaugalingong kinabuhi, ang akong pagtuon sa ebanghelyo napalambo pag-ayo pinaagi sa paggamit sa mga kasulatan ug ubang mga kapanguhaan sa Gospel Library mobile app.
Ang atong kabatan-onan nakaandam sa pagtuon, pagtudlo, ug pagsangyaw sa ebanghelyo sa kada adlaw nga kinabuhi ug isip full-time nga mga misyonaryo nga naggamit og teknolohiya sa mga paagi nga nasugdan pa lang nato sa pagdiskobre. Tungod kay ang kaaway naningkamot sa paggamit sa tanang maayo ug mapuslanon nga imbento alang sa iyang dautan nga mga katuyoan, responsibilidad nato isip mga ginikanan, mga lider, ug mga magtutudlo sa pagtabang sa kabatan-onan sa paggamit sa teknolohiya sa matarung ug mabungahon nga mga paagi sa sayo pa nga pangidaron.
Ang panimalay mao ang labing maayong dapit nga mahitabo kini. (Ang mga ginikanan nga nangita og mapuslanong mga kapanguhaan mahimong mokonsiderar sa paggamit sa pipila ka mga materyal sa Simbahan nga gilista sa nag-uban nga sidebar.) Ang classroom sa ebanghelyo nagtanyag usab og importante nga mga oportunidad sa pagtabang sa kabatan-onan nga malambigit ang ilang digital nga mga device uban sa matarung nga mga kalihokan ug pagbati sa Espiritu Santo. Ania ang pipila ka paagi nga ang mga magtutudlo ug mga lider makatabang nga mahitabo kini.
Paghimo og Baruganan nga gibase sa mga Lagda
Paghimo og mga lagda mahitungod sa paggamit sa teknolohiya diha sa classroom base sa mga baruganan. Usa ka importante nga baruganan tingali “Ang atong katuyoan sa klase mao ang pagkat-on sa ebanghelyo pinaagi sa Espiritu Santo. Ang atong paggamit sa digital nga mga device kinahanglang makatabang niini nga paningkamot, dili makabalda niini.” Mas epektibo kini kay sa lagda nga sama sa “Dili kita mogamit og social media panahon sa klase.” Kini nga lagda nagpadala og mensahe nga ang social media dili maayo, samtang ang baruganan nagbilin og bukas nga posibilidad sa paggamit sa social media diha sa klase sa angay nga mga paagi, sama sa pagtabang niadtong wala motambong sa pagpahibalo kanila nga sila gikamingawan ug sa pagdapit nila sa pagtambong sa sunod semana.
Atong gidaut ang kabatan-onan sa mga lagda nga nagsugyot og kinaiya nga sayop nga dili man unta. Naghatag kini og kalibug mahitungod sa paggamit sa teknolohiya sa ubang mga kahimtang ug wala makapahimulos sa oportunidad sa pagtudlo kon unsaon sa paggamit sa teknolohiya sa angay nga paagi. Ang mga lagda nga atong gihimo uban sa tabang sa kabatan-onan sa atong mga klase kinahanglan nga pinasubay sa ilang edad ug kahingkod.
Pagkat-on mahitungod sa Teknolohiya
Ayaw himoa ang inyong kaugalingon nga kahadlok o kakulang sa pagsabut mahitungod sa teknolohiya makababag sa kabatan-onan sa paggamit sa digital nga mga device sa angay nga mga paagi. Usa ka ward ang mi-report nga sila naghimo og training alang sa mga magtutudlo kon unsaon sa paggamit sa digital nga device sa pagtuon sa ebanghelyo. Ilang nakaplagan nga isip mga magtutudlo nahimo silang mas hanas sa paggamit sa teknolohiya, mas nadasig usab sila mahitungod sa paggamit sa digital nga mga device sa pagtuon sa ebanghelyo, ug ang isyu sa digital nga mga device diha sa classroom nawala.
Paghimo sa mga Leksyon nga Interactive
Akong nakaplagan nga ang labing maayong paagi sa pagtabang sa mga estudyante sa paggamit sa teknolohiya sa matarung nga paagi mao ang paghimo sa mga leksyon nga interactive ug iapil ang digital nga mga device diha sa plano sa leksyon. Talagsa ra ko makakita og mga estudyante nga mogamit sa ilang mga cell phone sa dili angay nga paagi diha sa klase diin ang mga magtutudlo mangutana og makadasig nga mga pangutana, ang mga estudyante moapil diha sa leksyon ug mobati nga ang magtutudlo nagmahal kanila, ug ang Espiritu Santo anaa.
Diin kini mahitabo, ang magtutudlo kanunay nga mosugod sa klase pinaagi sa pagpangutana og makadasig nga pangutana ug dayon ang kabatan-onan, sa kasagaran sa ginagmay nga mga grupo, mangita sa tubag sa pangutana diha sa mga kasulatan ug sa mga pulong sa mga propeta. Sa tibuok leksyon, ang magtutudlo mipapangita sa klase sa mga kasulatan, nagtuon sa mga pakigpulong sa kinatibuk-ang komperensya, nagtan-aw sa mga video nga hinimo sa Simbahan, ug naghisgot unsay ilang nakat-unan. Kon ang kabatan-onan mas nakaapil sa proseso sa pagkat-on, mas dako ang kahigayunan nga sila mogamit sa ilang digital nga mga device sa angay nga paagi.
Pangita og Balanse
Sa atong paggamit sa teknolohiya sa atong mga leksyon, importante nga mahinumduman nga ang atong paggamit sa teknolohiya nagkinahanglan og balanse. Kinahanglan nga kita mabinantayon sa pagsiguro nga ang teknolohiya dili mahimo nga mao ang leksyon o makababag nga mobati sa Espiritu Santo.
Agig dugang, ang pipila ka estudyante walay digital nga mga device ug kinahanglang dili mobati nga sinalikway. Gawas sa pagtan-aw sa mga video nga hinimo sa Simbahan, ang mga kalihokan nga mahimo sa digital nga mga device diha sa classroom kinahanglan nga mahimo usab sa mga kasulatan nga anaa sa papel ug sa mga kopya sa mga magasin sa Simbahan.
Dugang pa, adunay mga panahon nga ang mga digital nga mga device dili angay. Pananglitan, kon ang mga estudyante o mga magtutudlo naghatag og pagpamatuod, angay ra usab alang sa mga magtutudlo sa mahigugmaong paagi sa pagdapit sa mga estudyante sa paghipos sa ilang mga cell phone ug mobati unsay gitudlo sa Espiritu kanila.
Pakita og Pailub
Sa katapusan, alang sa pipila ka kabatan-onan, ang pagkat-on sa paggamit sa digital nga mga device sa angay nga paagi diha sa klase tingali magkinahanglan pa og panahon. Ang Kristohanong mga magtutudlo sa bisan hain nga classroom magpakita og pailub uban sa gugma ngadto niadtong nakigbisog.
Teknolohiya: Usa ka Kalamboan Dili usa ka Hulga
Ang pagtabang sa kabatan-onan sa paggamit sa teknolohiya sa angay nga paagi makapanalangin kanila sa ilang tibuok kinabuhi, ug kini makapalambo sa atong mga klase. Sama sa gipakigbahin ni Elder Richard G. Scott (1928–2015) sa Korum sa Napulog Duha ka mga Apostoles, “Ang teknolohiya, kon masabtan ug gamiton sa matarung nga mga katuyoan, dili hulga apan kalamboan ngadto sa espirituhanong komunikasyon.”2
Isip Kinatibuk-ang Kapangulohan sa Sunday School, among gidapit ang mga magtutudlo sa paggamit sa teknolohiya diha sa ilang mga leksyon ug sa paghimo sa tanang paningkamot sa pagtabang sa kabatan-onan nga makat-on sa paggamit sa teknolohiya sa matarung nga mga katuyoan. Kon kamo mangayo og tabang sa Langitnong Amahan sa inyong mga paningkamot, Siya motubag niadto nga mga pag-ampo.