Mga Pangutana ug mga Tubag
Unsa nga mga kalihokan ang angay nakong buhaton sa akong libreng panahon aron mahimo kining mas bililhon?
Pagtuon sa Doktrina
Usa sa labing maayong paagi sa paggamit sa imong libreng panahon mao ang pagtuon sa doktrina sa Ginoo. Gikan sa mahangturong panglantaw, ang pagbasa sa mga kasulatan, mga artikulo sa magasin sa Simbahan, ug ubang makadasig nga mga materyal mas makaayo kanimo kay sa pagbuhat sa laing mga kalihokan.
Josh C., edad 13, Tennessee, USA
Pagtrabaho sa usa ka Produkto nga Mahimong Makompleto
Buhata ang butang nga mas importante. Usahay giusikan nako ang akong panahon sa paghimo og walay bili nga mga butang, sama sa pag-surf sa internet og duha ka oras, ug magbasol niini pagkahuman. Makahimo ka sa pagsulay sa pagpalambo og bag-ong talento, motrabaho sa Personal nga Kauswagan o Katungdanan ngadto sa Dios, magtudlo og igsoon o higala, mananom, magsulat og istorya, o mag-organisar—ang mga posibilidad walay katapusan. Ang lagda nga akong gisunod mao ang pagsiguro sa paggamit sa akong libreng panahon mao nga nagtabang kini nako sa pagtrabaho sa usa ka produkto nga mahimong makompleto.
Kimberly A., edad 19, Alaska, USA
Pagtuon sa Basahon ni Mormon
Akong himoon ang akong libreng panahon nga mas makahuluganon ug bililhon pinaagi sa pagtuon sa Basahon ni Mormon. Mao kini ang sukaranang bato sa atong relihiyon ug, sa mga pulong ni Propeta Joseph Smith, kita “labi nga maduol sa Dios pinaagi sa pagsunod sa iyang mga lagda, kay sa bisan hain nga basahon” (pasiuna sa Basahon ni Mormon).
Lynne T., edad 18, Accra, Ghana
Himoa Kon Kinsa Ikaw Gusto nga Mahimo
Adunay kinutlo sa akong sala nga nag-ingon, “Pangutan-a ang imong kaugalingon kon ang imong gibuhat karong adlawa nagdala ba nimo nga mas mahiduol sa asa nimo gusto ugma.” Hunahunaa ang matang sa tawo nga gusto nimong mahimo ug ang imong mga tumong. Pilia ang pagbuhat sa mga butang nga makatabang nimo nga makab-ot kadto nga mga tumong. Buhata ang mga butang nga makatugot nimo sa pagbaton sa Espiritu uban nimo ug nga subay sa mga sumbanan sa Alang sa Kalig-on sa Kabatan-onan.
Amy P., edad 16, Kentucky, USA
Kanta o Paminaw sa mga Himno
Ang kalihokan nga akong ganahan nga buhaton sa akong libreng panahon mao ang pagkanta og mga himno. Gihimo nako nga tumong nga makasag-ulo og daghan nga mga himno sa Simbahan kutob sa akong mahimo. Kasagaran akong i-download ang pipila ka mga himno nga gusto nakong makat-unan aron ako makapaminaw niini bisan unsang orasa nga duna koy libreng higayon.
Justice O., edad 16, Orlu, Nigeria
Maghimo og mga Tumong
Kinahanglang hunahunaon nimo pag-una ang matang sa tawo nga ikaw gusto nga mahimo sa pipila ka tuig. Dayon makahukom ka unsay angay nimong buhaton karon sa imong libreng panahon aron makab-ot kana nga tumong. Sa katapusan sa matag adlaw, naghunahuna ko unsay akong mga tumong ug naghimo og iskedyul kon unsay akong buhaton pagkasunod adlaw sa akong libreng panahon.
Elder Agostinelli, edad 20, Chile Santiago West Mission