Ang Matahum nga Gasa sa Sakrament
Gikan sa pakigpulong sa debosyonal, “Come unto Christ,” nga gihatag didto sa Brigham Young University–Idaho niadtong Septyembre 26, 2017.
Pag-ampo nga kamo mabag-o samtang kamo moambit sa sakrament ug mahinumdom sa Manluluwas.
Niadtong Abril 2017, duna mi oportunidad sa pagtabang sa open house sa Paris France Temple sa wala pa kini ipahinungod niadtong Mayo 21, 2017. Nahimutang sa mga nataran mao ang maanindot nga estatuwa sa Christus. Kopya kini sa 1838 nga orihinal nga masterpiece sa Danish sculptor nga si Bertel Thorvaldsen. Kini nga estatuwa naghatag og importante nga bahin sa mga tanaman ug namahayag ngadto sa tanan kinsa moanhi sa atong pagtuo ni Jesukristo. Ang pagkahalangdon, gidak-on, ug ang pagkapahimutang makapadani. Ang mga bisita makabig niining pagpasundayag sa nabanhaw nga Ginoo ug mobarug kanunay diha niini aron sa pagpalitrato.
Ang estatuwa gitawag nga Christus Consolator. Ang consolator mao ang usa nga mohupay.1 Sa paglipay mao ang paghupay sa laing tawo sa panahon sa kasubo o kahigawad, sa paghatag og tabang, simpatiya, sa pagpadayag sa kasubo sa usa ka tawo, o sa pagpakita og kapuangod alang sa lain.2 Alang kanato, ang Christus nagpadayag niining balaang mga hiyas sa Manluluwas.
Ang orihinal nga Christus Consolator nahimutang sa Vor Frue Kirke, sa Church of Our Lady, sa Copenhagen, Denmark. Gilibutan sa mga estatuwa sa Napulog Duha ka mga Apostoles, ang Christus anaa sa bongbong nga gilibutan sa duha ka kolum. Sa ibabaw ug ubos sa estatuwa mao ang mga kinulit sa naila na nga mga bersikulo gikan sa Biblia.
Gikulit sa ibabaw, sa panel ibabaw sa duha ka kolum, mao kini nga mga pulong sa Danish: “DENNE ER MIN SØN DEN ELSKELIGE HØRER HAM.” Sa Iningles: “This is my beloved Son: hear him.”
Kini nga mga pulong gisulti sa Dios, ang atong Langitnong Amahan, samtang nausab ang dagway ni Jesus sa usa ka bukid atubangan nila ni Pedro, Santiago, ug Juan. Ang kompleto nga bersikulo nag-ingon, “Ug unya usa ka panganud mitabon kanila, ug gikan sa panganud migula ang usa ka tingog nga nag-ingon, Mao kini ang akong Anak nga pinalangga: patalinghugi ninyo siya” (Marcos 9:7).
Sa gitungtungan diin magbarug ang Christus Consolator anaa kini nga mga pulong sa Danish: “KOMMER TIL MIG.” Sa Iningles: “Come unto me.” Sa tanang mga pulong nga gipamulong sa Manluluwas, walay mas nangamuyo ug importante alang nato kay sa “umari kanako.”
Ang kompleto nga bersikulo, “Umari kanako, kamong tanan nga nabudlay ug nabug-atan, ug papahulayon ko kamo” (Mateo 11:28).
Uban niining orihinal nga estatuwa sa Christus Consolator, atong naangkon ang duha ka imbitasyon sa Amahan sa pagpaminaw sa Iyang Bugtong Anak ug sa imbitasyon sa Anak sa pagduol ngadto Kaniya. Sa hingpit nga panaghiusa, ilang gidapit ang tanan sa pagpaminaw ug sa pagduol.
Mao kini ang atong dalan balik sa atong langitnong panimalay. “Kami nagtuo nga pinaagi sa Pag-ula ni Kristo, ang tanan nga mga katawhan mahimo nga maluwas, pinaagi sa pagsunod sa mga balaod ug mga ordinansa sa Ebanghelyo” (Mga Artikulo sa Hugot nga Pagtuo 1:3). Ang matag tawo makaduol ngadto ni Jesukristo sa hingpit pinaagi sa pagdawat sa gipahiuli nga ebanghelyo. Kita “makadawat sa gipahiuli nga ebanghelyo pinaagi sa pagbaton og hugot nga pagtuo kang Jesukristo ug sa Iyang Pag-ula, paghinulsol, pagpabunyag, pagdawat sa gasa sa Espiritu Santo, ug paglahutay hangtud sa katapusan.”3
Ang Doktrina ni Kristo
Mao kini ang hiniusa nga mensahe sa Amahan ug sa Anak. Gusto Nila nga ang tanang mga anak sa Langitnong Amahan mosunod sa doktrina ni Kristo. Karon, aron nga walay kalibug, ang mga pulong “ang doktrina ni Kristo” nagpasabut nga pareha sa ebanghelyo ni Kristo.
Sa paghatag og gibug-aton sa panaghiusa sa Amahan ug sa Anak sa Ilang mensahe kabahin sa doktrina ni Kristo, atong tan-awon kini nga tsart.
|
Total | |||||
|
Hugot nga Pagtuo |
1 |
2 |
4 |
1 |
8 |
|
Paghinulsol |
5 |
4 |
4 |
3 |
16 |
|
Bunyag |
10 |
0 |
13 |
3 |
26 |
|
Espiritu Santo |
8 |
2 |
6 |
1 |
17 |
|
Paglahutay |
3 |
0 |
0 |
3 |
6 |
|
Amahan |
14 |
5 |
20 |
25 |
64 |
Nasayud kita nga ang mga kapitulo nga gihisgutan dinhi ang (2 Nephi 31; 3 Nephi 9; 3 Nephi 11; ug 3 Nephi 27) naglakip sa doktrina ni Kristo. Kini nga mga kapitulo naghisgot kanunay sa hugot nga pagtuo, paghinulsol, bunyag, ang Espiritu Santo, ug paglahutay hangtud sa katapusan. Ang gidaghanon sa mga higayon nga kini gihisgutan gikalkulo. Sa inyong makit-an, ang hugot nga pagtuo gihisgutan og 8 ka higayon; paghinulsol, 16 ka higayon; bunyag, 26 ka higayon; ang Espiritu Santo, 17 ka higayon; ug paglahutay hangtud sa katapusan, 6 ka higayon.
Unsay makapasurprisa, hinoon, mao nga makita usab nato nga ang Amahan gihisgutan makadaghan niini nga mga kapitulo. Gani, gihisgutan gayud siya og 64 ka higayon, labaw kay sa paghisgot sa bunyag.4 Gikan niini, makahibalo kita nga ang doktrina ni Kristo mao ang doktrina sa Amahan ug sa Anak.
Tan-awon nato ang duha ka mga pakisayran ngadto sa Amahan:
“Ug ang Amahan miingon: Paghinulsol kamo, paghinulsol kamo, ug pagpabunyag sa ngalan sa akong Hinigugmang Anak.
“Ug usab, ang tingog sa Anak midangat ngari kanako, nag-ingon: Siya nga gibunyagan sa akong ngalan, ngadto kaniya ihatag sa Amahan ang Espiritu Santo, sama ngari kanako; busa, sunod kanako, ug buhata ang mga butang diin kamo nakakita kanako nga mibuhat. …
“Ug ako [Nephi] nakadungog og usa ka tingog gikan sa Amahan, nag-ingon: Oo, ang mga pulong sa akong Hinigugma tinuod ug matinud-anon. Siya kinsa molahutay hangtud sa katapusan, ang mao maluwas” (2 Nephi 31:11–12, 15).
Ang Amahan, ang Anak, ug ang Espiritu Santo nagpamatuod nga mao kini ang bugtong paagi.
Ang pagbalik-balik sa mga pulong gikan sa Mateo, ang Amahan ug ang Anak nagsulti nato nga kita kinahanglang moduol ngadto ni Kristo ug isangon ang Iyang yugo ngari kanato tungod kay ang kabudlay nga atong gidala mahimong magaan ug kita makapahulay. Kitang tanan nagdala og sagubangunon. Tingali kita nagsagubang sa sala, kasubo, adiksyon, sakit, kasaypanan, o kaulawan. Niini nga mga kalisud, ang pagtan-aw ngadto ni Kristo makahatag og kaayohan ug paglaum ug kahupayan.
Ang doktrina ni Kristo—hugot nga pagtuo, paghinulsol, bunyag, ug ang gasa sa Espiritu Santo—wala himoa aron lang masinati kana nga kalihokan sa usa ka higayon. Ang atong teyolohiya nagtudlo nato nga kita mahimong hingpit pinaagi sa pagbalik-balik nga “mosalig sa hingpit diha” sa doktrina ni Kristo. (2 Nephi 31:19). Nagpasabut kini nga atong balikon ang mga lakang sa doktrina ni Kristo sa atong tibuok kinabuhi. Ang matag lakang naghimo sa nag-unang lakang, ug ang pagpasunod gitumong nga masinati pagbalik-balik.
Sa atong pagpakita og hugot nga pagtuo, mas molig-on kini. Samtang magpadayon kita sa paghinulsol, molambo kita. Kita mouswag, pinaagi sa atong kaugalingong mga paningkamot, gikan sa panagsa nga mga kasinatian uban sa Espiritu Santo ngadto sa paghimo Kaniya nga kanunay nga kauban. Agi og dugang, samtang kita moagi sa kinabuhi, makakat-on kita sa mga hiyas ni Jesukristo ug makapalambo niining maong mga kalidad.5 Samtang kita mahimong mas sama Kaniya, ang atong mga kasingkasing mausab ug kita makahimo sa paglahutay hangtud sa katapusan (tan-awa sa, pananglitan, 2 Nephi 31:2–21; 3 Nephi 11:23–31; 27:13–21; Moroni 4:3; 5:2; 6:6; D&P 20:77, 79; 59:8–9).
Sayon nga makita kon sa unsa nga paagi nga ang mga lakang sa doktrina ni Kristo mabalik-balik ug matukod sa tibuok kinabuhi. Apan unsa man ang mahitungod sa bunyag? Kita, human sa tanan, nabunyagan alang sa atong kaugalingon og kausa.
Ang Sakrament sa Panihapon sa Ginoo
Sa pagtubag niini nga pangutana, kinahanglan natong ikonsiderar ang bantugang libro sa teyolohiya nga gisulat ni Elder James E. Talmage (1862–1933) sa Korum sa Napulog Duha ka mga Apostoles nga giulohan og The Articles of Faith [Ang mga Artikulo sa Hugot nga Pagtuo]. Una kining gimantala niadtong 1899 ug nakatubag sa mga pangutana mahitungod sa Simbahan ug sa pundasyon nga mga pagtulun-an alang sa mosunod nga mga henerasyon kinsa nakabasa ug nagtuon niini.
Sa talaan sa mga sulod, makita nato nga sa matag kapitulo, gawas sa pasiuna, may kalabutan sa usa sa ikapulog tulo nga mga artikulo sa hugot nga pagtuo.6 Ang pipila ka mga artikulo sa hugot nga pagtuo gipasabut sa sobra sa usa ka kapitulo, apan ang matag kapitulo may kalabutan sa usa ka artikulo sa hugot nga pagtuo.
Makapaikag, ang kapitulo 9, nga giulohan nga “Ang Sakramento sa Panihapon sa Ginoo,” makita sunod sa kapitulo mahitungod sa Espiritu Santo.7 Gikonektar kini ni Elder Talmage sa ikaupat nga artikulo sa hugot nga pagtuo.
Sa sinugdanan sa kapitulo 9, si Elder Talmage misulat, “Sa atong pagtuon sa mga baruganan ug mga ordinansa sa Ebanghelyo, sumala sa gipasabut sa ikaupat nga mga Artikulo sa Hugot nga Pagtuo, ang hilisgutan sa Sakrament sa Panihapon sa Ginoo nga angay nga hatagan og atensyon, ang pagsunod niini nga ordinansa nga gikinahanglan gikan sa tanan kinsa nahimong mga miyembro sa Simbahan ni Kristo pinaagi sa pagsunod sa mga kinahanglanon sa hugot nga pagtuo, paghinulsol, ug bunyag pinaagi sa tubig ug sa Espiritu Santo.”8
Uban niadtong mga pulong sa hunahuna, makita nato ngano nga si Elder Talmage milambigit sa sakrament sa ikaupat nga artikulo sa hugot nga pagtuo. Ang sakrament mao ang sunod nga ordinansa nga gikinahanglan sa tanan human makumpirmahi nga miyembro sa Simbahan.
Ang sakrament mao ang sunod nga ordinansa nga gikinahanglan sa tawo human makadawat sa Melchizedek Priesthood.
Ang sakrament mao ang sunod nga ordinansa nga gikinahanglan sa mga indibidwal human ma-endowed sa templo.
Ang sakrament mao ang sunod nga ordinansa nga gikinahanglan sa magtiayon human ma-seal.
Ang sakrament mao ang sunod nga ordinansa nga atong gikinahanglan. Ang sakrament mao ang yawe sa pagbaton og hugot nga pagtuo kang Jesukristo, sa paghinulsol sa sala, ug sa pagbati sa impluwensya sa Espiritu Santo sa atong kinabuhi. Mao kini ang mekanismo diin kita makabag-o sa atong mga pakigsaad ug mga panalangin sa bunyag.
Ang Handbook 2 nag-ingon, “Ang mga miyembro sa Simbahan gisugo nga magpundok kanunay aron moambit sa sakrament sa paghinumdom kanunay sa Manluluwas ug sa pagbag-o sa mga pakigsaad ug mga panalangin sa bunyag.”9 Mangutana mo, “Unsa nga mga panalangin?” Sa tinuod, ang nagpadayon nga paghatag sa Espiritu Santo mao ang usa ka panalangin sa bunyag. Apan ang makalimpyo nga epekto sa bunyag, usa sa labing talagsaong mga panalangin niini, nabag-o ba usab?
Ikonsiderar kini nga pamahayag ni Presidente Dallin H. Oaks, Unang Magtatambag sa Unang Kapangulohan: “Gisugo kita sa paghinulsol sa atong mga sala ug sa pagduol ngadto sa Ginoo uban sa masulub-on nga kasingkasing ug mahinulsulon nga espiritu ug moambit sa sakrament. … Kita mosaksi nga kita andam sa pagdala diha kanato sa ngalan ni Jesukristo, ug sa kanunay mohinumdom Kaniya, ug maghupot sa Iyang mga sugo. Kon kita motuman niini nga pakigsaad, ang Ginoo mobag-o sa epekto sa paglimpyo sa atong bunyag. Nahimo kita nga limpyo ug makabaton kanunay sa Iyang Espiritu uban kanato.”10
Mopasidaan kita nga “ang sakrament wala maestablisar isip piho nga paagi sa pagdawat og kapasayloan sa mga sala.”11 Sa laing mga pulong, dili nato tuyuon nga magpakasala sa Sabado sa gabii ug magpaabut nga milagrosong mapasaylo pinaagi sa pag-ambit sa piraso sa pan ug pag-inom sa tubig sa Dominggo. Ang paghinulsol mao ang usa ka proseso nga nagkinahanglan og pagbasol ug pagsalikway sa sala. Ang giplano nang daan nga paghinulsol dili madawat sa Manluluwas.
Mokwalipay kita sa makalimpyo nga gahum ni Jesukristo kon kita takus nga moambit sa sakrament.12 Mao kini ang paagi nga moamping sa atong kaugalingon nga “walay buling gikan sa kalibutan” (D&P 59:9). Ang sakrament sa Panihapon sa Ginoo tukma human sa bunyag sa balik-balik nga paggamit sa doktrina ni Kristo sa kauswagan sa mga Santos sa Ulahing mga Adlaw paingon sa kahingpitan.
Kinahanglan nga mosunod kita niini nga dalan, uban sa sakrament nga mahimong sunod nga ordinansa sa bunyag ug sa pagdawat sa Espiritu Santo. Ang pagpangandam alang sa sakrament nagkinahanglan og konsiderasyon ug atensyon. Dili kamo makapaabut sa sakrament nga mahimong espirituhanong kasinatian kon kamo nagdali-dali, nag-text sa inyong telepono, o kon dili ba nabalda.
Mao nga sayo og adto sa simbahan. Samtang magsugod ang himno sa sakrament, siguroha nga ang inyong hunahuna nakatutok sa Manluluwas, sa Iyang Pag-ula, sa Iyang gugma, ug sa Iyang kapuangod. Pag-ampo nga kamo mabag-o samtang moambit kamo sa sakrament ug mohinumdom Kaniya.
Usa ka Leksyon gikan sa Rwanda
Niadtong 1994 usa ka makalilisang nga dinaghan nga pagpamatay nahitabo didto sa Rwanda. Mga 600,000 ug 900,000 ka tawo ang gipatay sulod lang sa 60 ngadto sa 90 ka adlaw.
Sa katapusan, ang Simbahan nakaestablisar og branch sa kapital sa siyudad sa Kigali. Maayo ra ang kahimtang sa branch—nga walay full-time nga mga misyonaryo. Niadtong 2011 nagserbisyo kami sa Africa Southeast Area sa dihang among nahibaloan, subo lang, nga ang atong rehistrasyon isip usa ka simbahan sa nasud sa Rwanda dili balido, nga nagpasabut nga ilegal ang atong gibuhat isip usa ka simbahan. Nahibaloan usab namo nga ang atong meetinghouse, ang giusab nga duha ka andana nga building, wala matudlo sa lokal nga gobyerno isip dapit alang sa mga miting sa Simbahan. Ang Area Presidency, nga mikonsulta sa atong unang kontak sa Korum sa Napulog Duha ka Apostoles, mihimo og makapasubo nga desisyon sa pagsira sa branch. Ang atong mga miyembro dili na makahimo og mga miting sa Simbahan.
Ang mga abogado sa Kigali, Salt Lake City, ug Johannesburg, South Africa, nagsugod sa pagpaningkamot sa pagsulbad sa mga problema. Niining higayuna, ang mga Santos nagsige og pangutana kon kanus-a sila magkapundok pag-usab. Milabay ang mga bulan nga walay nahimo o kauswagan.
Human sa mga 10 ka bulan, miadto kami sa Kigali aron sa pagbisita sa mga Santos didto ug sa pagpaningkamot sa pag-awhag kanila. Sa wala pa namo buhata mihangyo mi nga kini ibutang sa prayer roll sa templo sa sinemana nga miting sa Unang Kapangulohan ug sa Korum sa Napulog Duha ka mga Apostoles.
Sa Martes sa wala pa ang among nakaiskedyul nga biyahe gikan sa Johannesburg ngadto sa Kigali, gipahibalo kami nga, sa makasurprisa nga lihok, ang gobyerno mihatag og temporaryo nga rehistrasyon didto sa Kigali. Dayon sa pagka-Huwebes sa samang semana, ang zoning commission mihatag og eksemsyon gikan sa ordinansa sa zoning. Ang mga Santos sa Kigali sa makausa makamiting na sa atong building nga wala makasupak sa balaod.
Usa kini ka milagro! Ang mga miyembro dali nga gipahibalo nga ang branch magmiting sa Dominggo. Miabut kami sa Biyernes ug midapit sa mga miyembro nga mosimba. Pag-abut sa Dominggo, ang tanang mga miyembro—tanan sila—ug daghan sa ilang higala ang misimba. Sayo silang miabut, madasigon sila nga nagkapundok pag-usab. Samtang ang sakrament gipanalanginan ug gipaambit, kaming tanan nakasinati og dili ordinaryo nga pagbag-o, pagkalagsik, ug pagkalimpyo sa espiritu.
Nahinumduman namo, sa miting, natingala ngano nga wala namo mabati ang sama nga espiritu matag semana samtang miambit kami sa sakrament. Gitan-aw namo ang mga Santos ug nakabantay nga mianhi sila gigutom ug giuhaw sa sakrament. Ang ilang hugot nga pagtuo, kakugi, ug pailub nakahatag natong tanan og mga panalangin. Misaad mi nga bisan asa kami makaambit sa sakrament pag-usab, hinumduman namo kini nga kasinatian uban sa mga Santos sa Kigali. Mapasaligon kami nga kami usab gutumon sa mga panalangin sa pag-ambit sa sakrament.
Mahinumduman ninyo nga human pasiugdahi sa Manluluwas ang sakrament taliwala sa mga Nephite, giingnan Niya sila nga ang sakrament mao ang yawe sa pag-establisar sa ilang kaugalingon diha sa Iyang sukaranan. Siya miingon:
“Ako mohatag nganha kaninyo og usa ka sugo nga kamo magbuhat niini nga mga butang [ang pag-ambit sa sakrament]. Ug kon kamo sa kanunay magbuhat niini nga mga butang bulahan kamo, kay kamo natukod diha sa ibabaw sa akong lig-on nga sukaranan.
“Apan kon kinsa diha kaninyo magbuhat kapin ug kulang niini wala matukod sa akong lig-on nga sukaranan, apan natukod sa usa ka balason nga tukuranan; ug sa pagbundak sa ulan, ug sa pag-abut sa mga lunop, ug sa paghuros sa mga hangin, ug mohampak diha kanila, sila matumba” (3 Nephi 18:12–13).
Ang sakrament mao ang usa ka maanindot nga gasa nga atong madawat matag Dominggo nga makatabang nato sa atong yutan-ong kauswagan. Pinaagi sa sakrament, makasinati ta og importante nga elemento sa doktrina ni Kristo, magpaduol nato ngadto sa atong Manluluwas ug makasinati sa Iyang gugma ug kapasayloan sa atong kinabuhi. Mapasalamaton kita alang niining mga higayuna matag semana, nga makatabang nato nga magpabiling nakatutok sa Manluluwas.
“Alang lang Kanako”
Usa namo ka higala sa South Africa mipakigbahin kon giunsa niya pagkaamgo niini. Sa dihang bag-o pa nga kinabig si Diane, mitambong siya og usa ka branch sa gawas sa Johannesburg. Usa ka Dominggo, samtang naglingkod siya diha sa kongregasyon, ang desinyo sa chapel nakahimo nga wala siya makit-i sa deacon sa dihang gipaambit ang sakrament. Nasagmuyo si Diane apan walay gisulti. Ang laing miyembro nakabantay nga wala siya mapaambiti sa sakrament ug gisulti kini ngadto sa branch president human sa miting. Sa dihang misugod na ang Sunday School, si Diane gidala ngadto sa usa ka klasrom nga walay tawo.
Usa ka tighupot sa priesthood misulod. Miluhod siya, mipanalangin og pipila ka tinapay, ug gihatagan si Diane og usa ka piraso. Iya kining gikaon. Miluhod siya pag-usab ug mipanalangin sa tubig ug mihatag kaniya og usa ka gamay nga kopa. Iya kining giinom. Si Diane adunay duha ka paspas nga nagsunod nga mga hunahuna: “Oh, siya [ang tighupot sa priesthood] mihimo niini para lang gayud kanako,” ug dayon, “Oh, Siya [ang Manluluwas] mihimo niini para lang gayud kanako.” Pinaagi sa sakrament, gibati ni Diane ang gugma sa Langitnong Amahan.
Ang iyang pagkaamgo nga ang sakripisyo sa Manluluwas alang gayud kaniya nakatabang kaniya nga mobati nga duol Kaniya ug mimugna og dakong tinguha nga ipabilin kini nga pagbati diha sa iyang kasingkasing, dili lang sa Dominggo apan sa matag adlaw. Iyang naamguhan nga bisan tuod naglingkod siya diha sa kongregasyon aron sa pag-ambit sa sakrament, ang mga pakigsaad nga iyang gibag-o matag Dominggo ang iyaha ra gayud. Ang sakrament nakatabang—ug padayon nga nagtabang—ni Diane nga mabati ang gahum sa diosnong gugma, moila sa impluwensya sa Ginoo diha sa iyang kinabuhi, ug mas mapaduol ngadto sa Manluluwas.13
Ang among imbitasyon pareha ra sa kang Moroni:
“Oo, duol ngadto kang Kristo, ug paghingpit diha kaniya, ug ilimud ang inyong mga kaugalingon sa tanan nga dili diosnon; ug kon kamo molimud sa inyong mga kaugalingon sa tanan nga dili diosnon, ug mohigugma sa Dios uban sa tibuok ninyo nga gahum, hunahuna ug kusog, niana ang iyang grasya igo alang kaninyo, nga pinaagi sa iyang grasya kamo mahimo nga hingpit diha kang Kristo; ug kon pinaagi sa grasya sa Dios kamo mahingpit diha ni Kristo, kamo dili makahimo sa paglimud sa gahum sa Dios.
“Ug usab, kon kamo pinaagi sa grasya sa Dios mahingpit diha ni Kristo, ug dili maglimud sa iyang gahum, niana kamo pagasantoson diha ni Kristo tungod sa grasya sa Dios, pinaagi sa pagpaagas sa dugo ni Kristo, nga anaa sa pakigsaad sa Amahan ngadto sa kapasayloan sa inyong mga sala, nga kamo mahimo nga balaan, nga walay lama.” (Moroni 10:32–33).
Kini mahitabo samtang atong gamiton ang doktrina ni Kristo, magtan-aw sa sakrament nga mao ang sunod nga ordinansa sa bunyag ug pagdawat sa Espiritu Santo. Niining paagiha, kita makasalig “sa hingpit diha sa mga maayo nga buhat kaniya kinsa gamhanan sa pagluwas” (2 Nephi 31:19). Mapasalamaton usab kami sa sakrament—nagtudlo kini ug nagpahinumdom kanato matag semana sa unsay gibuhat sa Manluluwas kanato. Mapasalamaton kaayo kita ngadto Kaniya tungod kay nasayud kita nga Siya miula alang sa matag usa kanato.
Sa dihang ang Manluluwas nakigsulti ngadto sa mga Nephite, miingon Siya kon ang ulan, hangin, ug mga baha moabut. Wala Siya moingon nga kon. Gani, ang ulan, hangin, ug mga baha moabut ngadto sa tanan. Apan Siya misulti kanato nga ang paagi nga kita naestablisar diha sa Iyang sukaranan mao ang pagtan-aw Kaniya samtang kita moambit sa sakrament (tan-awa sa 3 Nephi 15:9; 18:1).
Ang panahon moabut sa matag usa sa inyong kinabuhi nga adunay pagduha-duha nga moadto sa simbahan ug moambit sa sakrament. Kon wala pa kana mahitabo, mahitabo ra kana. Apan hibaloi kini: kon kamo mosunod sa direksyon sa Manluluwas ug moambit sa sakrament uban sa masulub-on nga kasingkasing ug mahinulsulon nga espiritu, mabu-bu ang mga panalangin diha kaninyo nga maoy makahimo ninyo nga lig-on, solido, ug maestablisar sa lig-ong pundasyon nga mao si Jesukristo. Ang inyong desisyon sa pagbuhat sa ingon makaapekto sa kahangturan. Inyong maestablisar ang inyong kaugalingon diha kang Jesukristo ang mag-uugmad ug maghihingpit sa atong pagtuo.