Pagpangandam sa Kinabuhi
Sa Dili Pa Ikaw Tawgon sa Pagserbisyo
Unsa kaha kanang pagserbisyo og misyon?
Naghunahuna ba ikaw nga moserbisyo og misyon? Kon mao, tingali naghunahuna ka kon unsa kaha kanang magserbisyo og misyon. Ania ang imong kahigayunan sa pagpangutana og full-time nga mga misyonaryo (dili tinuod nga mga misyonaryo, apan kini nga mga tubag maoy kasagaran):
Ikaw: “Hi, elders. Unsa man ang kasagarang adlaw sa misyon?”
Full-time nga mga misyonaryo: “Momata mi og sayo—sa 6:30 sa buntag. Sa mosunod nga duha ka oras, magtuon mi sa ebanghelyo ug sa pinulongan sa among misyon. Ribyuhon namo ang among mga tumong nianang semanaha ug plano sa among adlaw. Maghunahuna gani mi og backup nga mga plano kon dili pwede ang mga tawo. Dayon mogawas, ug motrabaho sa tibuok adlaw, mangita og mga tawo nga katudloan, makigsabut sa trabaho uban sa mga miyembro, ug mga panahon sa patudlo.”
Ikaw: “Gibati ba ninyo ang kamingaw?”
Full-time nga mga misyonaryo: “Oo, ilabi na sa sugod sa among mga misyon. Apan maka-email mi sa among mga pamilya ug makabasa sa mga email gikan kanila kausa sa usa ka semana. Among nakaplagan nga ang labing maayong paagi nga dili mingawon mao ang pagtutok sa among trabaho.”
Ikaw: “Unsay inyong bation nga makig-istorya sa mga dili kaila?”
Full-time nga mga misyonaryo: “Gikulbaan gyud mi bahin niana sa dihang una ming miabut dinhi, apan maanad ra ka niini tungod kay buhaton ni nimo kada adlaw. Nasayud mi nga dili ang tanan nga among ikahimamat gusto nga maminaw sa among mensahe, apan ang pipila interesado, mao nga kinahanglang andam mi sa pagpakig-istorya bisan unsang orasa. Sa tinuod lang makalingaw ang paghimamat og mga tawo ug makaila kanila.”
Ikaw: “Lisud ba ang pagtudlo sa ebanghelyo?”
Full-time nga mga misyonaryo: “Oo, ang pagbuhat niini magkinahanglan og praktis, apan duna tay maayong training sa missionary training center. Itudlo namo ang leksyon sa paagi nga makatubag sa mga panginahanglan ug sa mga pangutana sa mga tawo nga among tudloan. Magtuon mi sa ebanghelyo kada adlaw aron maayo kaming makatudlo niini. Labing importante, mobati kami nga gigiyahan sa Espiritu. Ang pagka-set apart isip mga misyonaryo makatabang.”
Ikaw: “Lisud ba nga trabaho ang misyon?”
Full-time nga mga misyonaryo: “Oo, motrabaho mi og 70 ka oras sa usa ka semana, apan nindot kaayo. Dayag nga maguol mi kon ang mga tawo dili molambo sama sa among gilauman, apan sa kinatibuk-an, usa ka panalangin nga mahimong instrumento sa mga kamot sa Ginoo sa pagtabang sa mga tawo nga mouswag sa espirituhanong paagi. Maningkamot mi sa pagtudlo pinaagi sa gahum sa Espiritu Santo tungod kay nasayud mi nga ang Espiritu lamang ang makatabang sa mga tawo nga makaangkon og mga pagpamatuod ug mahimong makabig.”
Ikaw: “Unsa kaha kon ako dili sigurado nga ako adunay pagpamatuod?”
Full-time nga mga misyonaryo: “OK ra kana—pag-ampo kanunay ug pagbasa sa mga kasulatan! Adto sa simbahan ug sa seminary. Adto sa templo kon makahimo ka. Pagsalig sa Ginoo ug sa Iyang mga pagtulun-an. Daghang mga kahigayunan nga mabati nimo ang Espiritu, mas magkalig-on ang imong pagpamatuod. Pagpraktis sa pagpakigbahin sa imong pagtuo diha sa family home evening. Basaha ang Basahon ni Mormon. Makatabang kini nimo sa pagtudlo sa ebanghelyo.”
Ikaw: “Giunsa ninyo sa pagpangandam sa inyong misyon?”
Full-time nga mga misyonaryo: “Nagtuon mi sa mga kasulatan, ilabi na sa Basahon ni Mormon. Nakatrabaho mi ug gitigum ang among kwarta. Apan naghandom mi nga nakabasa sa Isangyaw ang Akong Ebanghelyo ug nakatambong og mga klase sa mission-preparation pirme. Naghunahuna usab mi nga nakakat-on unta mi unsaon sa pagluto!”
Ikaw: “Sa inyong hunahuna mahimo kaha kong usa ka misyonaryo?”
Full-time nga mga misyonaryo: “Mahimo gyud! Adunay mga 70,000 ka misyonaryo sa tibuok kalibutan. Ug kining tanan nagsugod sa tinguha: ‘Kon kamo adunay tinguha sa pag-alagad sa Ginoo, kamo gitawag ngadto sa buhat’ (D&P 4:3). Apan magkinahanglan usab kini og pagpangandam—kinahanglan kang mangandam dili lang sa espirituhanon apan sa pinansyal, pisikal, ug sa sosyal nga paagi.”
Ikaw: “Unsa pay makatabang nako sa pag-andam?”
Full-time nga mga misyonaryo: “Himoa nga tumong nga mosunod sa ebanghelyo ug motuman sa mga sugo kutob sa imong mahimo. Makatabang kini sa pagpalig-on sa imong pagpamatuod ug makatabang nimo nga mahimong takus sa Espiritu. Kon ikaw usa ka misyonaryo, gusto kang mopamatuod ngadto sa mga tawo gikan sa personal nga kasinatian nga ang ebanghelyo tinuod. Mao nga paggahin og panahon karon sa pagkat-on og dugang mahitungod sa mga baruganan sa ebanghelyo ug sunda kadto nga mga baruganan sa imong kaugalingong kinabuhi.”
Full-time nga mga misyonaryo: “Irekomend usab namo nga imong basahon ang mga pangutana sa sunod nga mga pahina. Mao kana ang ipangutana sa imong bishop o presidente sa branch samtang imong trabahoon ang imong mga papeles sa pagkamisyonaryo. Ang pagkahibalo niini nga mga pangutana makatabang nimo sa pagpangandam. Hisguti kini uban sa imong mga ginikanan ug mga lider sa Simbahan. Adunay daghang mga pangutana, apan ayaw kabalaka—dili ka mo-report dayon ngadto sa missionary training center ugma! Paggahin og panahon nga imong gikinahanglan nga makaandam aron kon moabut na ang unang adlaw sa misyon, ikaw takus, madasigon, ug andam nga moserbisyo.”