Mga Pangutana sa Pag-interbyu

Kon kamo mopili sa pagserbisyo og misyon, kamo ug ang inyong mga lider gusto nga kining sagrado nga panahon sa pagserbisyo mahimong malipayon ug makadasig. Uban niana nga tumong sa hunahuna, importante nga kamo andam, takus, ug makahimo sa pagserbisyo.

Aron matabangan kamo nga makaandam, aniay mga pangutana nga ipangutana sa inyong bishop o presidente sa branch aron sa pagtino sa inyong pagkaandam. Mahimong hisgutan ninyo kini bisan unsang orasa uban kaniya ug uban sa inyong mga ginikanan o sa mga lider sa Simbahan.

Katakus ug Pagpamatuod

1. Aduna ka bay hugot nga pagtuo ug pagpamatuod sa Dios ang Amahan sa Kahangturan; sa Iyang Anak, nga si Jesukristo, ug sa Espiritu Santo?

Pamatuod: “Bisan ngadto sa pagsulay sa akong mga pulong, ug pagbansay sa usa ka tipik sa hugot nga pagtuo, oo, bisan kamo kutob ra sa pagtinguha sa pagtuo, tugoti kini nga tinguha nga molihok diha kaninyo, gani hangtud kamo motuo sa paagi nga kamo makahatag og luna alang sa usa ka bahin sa akong mga pulong” (Alma 32:27).

2. Aduna ka bay pagpamatuod nga si Jesukristo mao ang Bugtong Anak sa Dios ug ang Manluluwas ug Manunubos sa kalibutan? Palihug ipakigbahin ang imong pagpamatuod kanako. Sa unsang paagi ang Pag-ula ni Jesukristo nakapanalangin sa imong kinabuhi?

3. Unsa man ang kahulugan sa paghinulsol nganha kanimo? Mibati ka ba nga imong nahinulsulan ang tanan nimong nangaging mga kalapasan?

Paghinulsol:

“Pinaagi niini kamo masayud kon ang usa ka tawo naghinulsol sa iyang mga sala—tan-awa, siya mokumpisal kanila ug mobiya kanila” (D&P 58:42–43).

4. Ipakigbahin ba nimo ang imong pagpamatuod kanako nga ang ebanghelyo ug ang Simbahan ni Jesukristo gipahiuli pinaagi ni Propeta Joseph Smith ug nga si Presidente Russell M. Nelson usa ka propeta sa Dios?

5. Aduna ka bay pagpamatuod sa pagkatinuod sa Basahon ni Mormon?

6. Ang full-time nga misyonaryo nga pagserbisyo nagkinahanglan nga mosunod sa mga sumbanan sa ebanghelyo. Unsa ang imong nasabtan mahitungod sa mosunod nga mga sumbanan?

a. Ang balaod sa kaputli

Kabahin sa balaod sa kaputli, kanunay ba ikaw nga nagsunod sumala sa unsay gihisgutan? Kon wala, kanus-a man nahitabo ang (mga) kalapasan? Unsay imong nahimo sa paghinulsol?

Balaod sa kaputli: “Ang kaputli mao ang sekswal nga kalimpyo, usa ka kondisyon nga ‘makapahimuot ngadto sa Dios’ (Jacob 2:7). Aron mahimong putli, ikaw kinahanglan nga limpyo sa moral nga paagi sa imong mga hunahuna, mga pulong, ug mga aksyon. Kinahanglan wala kay bisan unsang sekswal nga pakigrelasyon sa dili pa ikaw maminyo sa legal nga paagi” (Matinud-anon sa Tinuhoan: Usa ka Pakisayran sa Ebanghelyo [2004], 91).

b. Paglikay sa pornograpiya

Paglikay sa pornograpiya: Si Presidente Dallin H. Oaks sa Unang Kapangulohan mipasabut nga ang pagtan-aw sa pornograpiya adunay lain-laing ang-ang sa kadaot gikan sa aksidente nga pagtan-aw ngadto sa pagkaanad sa paggamit, o pagkaadik. Ang pagkahibalo sa lebel sa pag-apil makatabang sa usa ka tawo pagpangita sa angay nga solusyon. Pagkat-on pa og dugang sa “Nagpaayo gikan sa Pagkalit-ag sa Pornograpiya,” Liahona, Okt. 2015, 50–55; ug sa overcomingpornography.org.

c. Ang balaod sa ikapulo

d. Ang Pulong sa Kaalam, naglakip sa paggamit sa drugas o pag-abuso sa giresita nga mga tambal

e. Pagbalaan sa Adlaw nga Igpapahulay

f. Ang pagkamatinuoron sa tanan nimong isulti ug buhaton

Nagsunod ba ikaw subay niining tanang mga sumbanan? Nagsunod na ba ikaw karon sumala niini? Mosunod ba ikaw subay niini isip usa ka full-time nga misyonaryo?

Kapasidad ug Pagkasakto

7. Aduna ka bay bisan unsa nga legal aksyon nga wala pa mahuman batok kanimo?

8. Nakahimo ka ba og seryoso nga pagsupak sa kriminal nga balaod, gidakop man ikaw o wala, nakombikto ka ba, o ang rekord gikuha ba gikan sa permanente nga rekord?

9. Nakaabuso ba ikaw sa sekswal nga paagi og usa ka bata sa bisan unsang paagi, nakasuhan ikaw o wala, nakombikto, o ang rekord gikuha ba gikan sa permanente nga rekord?

10. Nakahimo ba ikaw og bisan unsa nga laing seryoso nga kalapasan o dili maayong binuhatan nga kinahanglang masulbad sa dili pa ang imong misyon?

11. Aduna ka bay gisuportahan, nakig-uban, o uyon sa bisan unsa nga pundok o usa ka tawo kansang mga pagtulun-an o mga binuhatan sukwahi o supak ngadto o batok niadtong gihuptan sa Ang Simbahan ni Jesukristo sa mga Santos sa Ulahing mga Adlaw?

12. Aduna ka bay wala mabayri nga mga utang? Sa unsa nga paagi nga kini nga mga utang mabayran sa dili pa ang imong misyon o dumalahon samtang ikaw nagserbisyo og misyon?

13. Aduna ka bay pisikal, mental, o emosyunal nga kondisyon karon nga makapalisud nimo sa pagmintenar og normal nga misyonaryo nga iskedyul, nga nagkinahanglan nga ikaw motrabaho og 12–15 ka oras sa usa ka adlaw, lakip sa pagtuon sulod sa 2–4 ka oras sa usa ka adlaw o pagbiseklita hangtud 8–10 ka oras sa usa ka adlaw, ug uban pa?

Daghang mga kondisyon sa katakus ug panglawas nga makapugong nimo sa pagserbisyo og malampusong misyon mahimong mabuntog. Pangayo sa tabang nga imong gikinahanglan. Kon aduna ka pay nagpadayon nga mga problema sa panglawas sa panahon nga andam na ka nga moserbisyo, pahibaloa ang imong bishop o presidente sa branch. Makahatag kini og higayon sa Simbahan sa pagkonsiderar sa imong sitwasyon sa dili pa ikaw i-assign sa misyon. Pananglitan, tan-awa ang istorya ni Sister Fletcher human niini nga mga pangutana.

14. Nadayagnos ka naba o natambalan alang sa dyslexia o ubang mga problema sa pagbasa? Kon mao, komportable ka ba nga mobasa og kusog sa mga kasulatan ug ubang mga dokumento? Nagtuo ka ba nga ikaw makasag-ulo sa angay nga mga kasulatan ug ubang impormasyon uban sa tabang sa imong kompanyon? Sa unsa nga mga paagi ikaw makasulbad niini nga problema.?

15. Nadayagnos na ba ikaw o natambalan sa problema sa pagsulti? Kon mao, komportable ba ikaw mosulti atubangan sa uban? Gibati ba nimo nga ikaw adunay igo nga mga himan sa pagtabang nimo nga makat-on, motudlo, ug makigsulti?

16. Natambalan ba ikaw o gitambalan sa bisan unsa sa mosunod nga mga kondisyon: attention deficit disorder (ADD), attention deficit hyperactivity disorder (ADHD), kakulba, depresyon, obsessive compulsive disorder (OCD), o autism spectrum disorder (lakip sa Asperger’s)? Kon anaa, palihug ipasabut.

17. Kon ikaw gitambalan sa usa niini nga mga kondisyon ug wala padayuna ang pagtambal, gibuhat ba nimo ubos sa direksyon sa doktor? Kon wala, nganong mihunong ka? Unsa may imong kondisyon nga wala tambali o walay medikasyon? Kanus-a ang katapusang higayon nga ikaw gitambalan alang niini nga mga isyu?

Pangitaa ang mga video ug ubang mga kapanguhaan sa pagpangandam sa misyon sa lds.org/go/81850.