Ang Langitnong Amahan Mitubag sa Akong Pag-ampo

Raquel E. Pedraza de Brosio

Utah, USA

Nagpuyo pa kami sa among kaugalingong nasud, sa Argentina, sa dihang ang akong bana ug ako nagsugod sa among pamilya. Mga returned missionary kami ug nasayud nga usa ka panalangin nga maminyo sa templo sa Ginoo. Nadasig kami nga maglakaw balik ngadto sa Langitnong Amahan.

Nasayud kami nga ang plano sa kaluwasan naglakip sa mga pagsulay, apan misalig kami nga mabuntog namo ang bisan unsa pinaagi sa pagtuo ug pag-ampo. Apan wala kami magpaabut nga ang kalisdanan nga moabut namo dili mohunong. Pagsulay human sa laing pagsulay daw kanunay moabut kanamo.

Usa ka hapon ako nag-inusara, mibati nga subo kaayo ug naghilak nga dili mahupay tungod sa among pagsulay. Wala ko kahibalo unsa ang buhaton. Matag higayon ako naningkamot nga mohunong sa paghilak, gibati lang nako nga mas naguol ug nag-antus.

Dayon naghunahuna ko mahitungod sa daghang mga lalaki ug mga babaye nga mipakigbahin nako kon unsa ka bililhon ang pag-ampo alang kanila panahon sa malisud nga mga higayon. Duna koy pagpamatuod sa pag-ampo, apan ang akong hunahuna ug espiritu nag-antus nga sa akong pagtuo dili na ko makakita sa mga pulong nga isulti.

Naghilak, nagluhod ko tupad sa akong higdaanan ug uban sa akong tibuok kasingkasing, nanghangyo ko sa Langitnong Amahan og kahupayan ug kalinaw. Wala ko mangayo og kasulbaran o nga mawala ang pagsulay. Nanghangyo lang ako sa kalinaw.

Samtang nag-ampo ko, nakadungog ko og tuktok sa atubangan namong pultahan. Giablihan nako kini, nga naghilak gihapon, ug nakita ang usa ka sister gikan sa Relief Society. Misulti siya nga nagtrabaho siya sa maong dapit ug mihunong nga nagsakay sa iyang motorsiklo. Ang akong nabuhat mao lamang ang paggakus kaniya. Miingon siya, “wala ko kahibalo kon ngano, apan gibati nako nga kinahanglan kong mohunong ug makigkita kanimo.”

Nanglingkod kami sa may lamesa sa kusina ug mitabang siya nako nga mokalma. Human makigsulti kaniya sa pipila ka minuto, gibati nako sa katapusan nga wala ko mag-inusara ug nga ang Langitnong Amahan nakadungog sa akong pag-ampo.

Usa ka panalangin nga makahimo sa pagpakigsulti sa akong Langitnong Amahan pinaagi sa pag-ampo. Naminaw siya nako sa akong panahon sa panginahanglan ug mipadala sa usa sa Iyang mga anak sa pagtabang nako. Mapasalamaton ako niini nga sister nga nakadungog sas inspirasyon sa Espiritu ug misunod niini.