Estranghero Kinsa Kapamilya
Jeff Messerly
Utah, USA
Paghulagway pinaagi ni Allen Garns
Usa ka lawom na nga gabii, ang akong anak nga si Garrett mitawag gikan sa Eau Claire, Wisconsin, USA. Siya ug ang iyang asawa, nga si Shelly, ug ang ilang mga anak, nagbiyahe gikan sa Alabama, diin si Garrett nagbansay sa military, sa Minot Air Force Base sa North Dakota. Mipasabut siya nga samtang nagbiyahe sila sa Wisconsin, si Shelly nasakit og grabe. Nakakita sila og ospital, ug si Shelly nakaiskedyul nga operahan sa apendiks pagkasunod buntag.
Giasikaso nako ang paglarga ug sa pag-adto nila, apan dili ko makaabut didto hangtud sa mosunod nga adlaw. Ang akong anak nabalaka mahitungod kon unsaon sa pag-atiman ang iyang mga anak—usa ka singko anyos, usa ka tuig, ug tulo ka bulan nga bata—samtang ang ilang inahan operahan. Walay kaila sa maong dapit, nakahukom siya nga motawag sa bishop sa Minot, bisan og wala pa sila magkita. Ang bishop sa Minot miingon nga iyang kontakon ang bishop sa Eau Claire.
Pagkasunod buntag, ang bishop sa Eau Claire, uban sa presidente sa Relief Society, nakigkita ni Garrett sa iyang hotel. Miingon sila nga malipay sila nga moatiman sa mga bata samtang si Shelly operahan. Dayon miingon si Shelly nga siya malinawon sa hingpit sa pagtugot sa duha ka estranghero—kinsa ka pamilya sa ebanghelyo—mobantay sa iyang mga anak. Sa akong pag-abut sa Eau Claire, nagpaayo na si Shelly ug ang akong mga apo nahibalik na ngadto kaniya ug ni Garrett. Mapasalamaton kami sa tabang nga among nadawat sa among panahon sa panginahanglan.
Paglabay sa pipila ka semana, nagtan-aw ko sa kinatibuk-ang komperensya sa Oktubre 2016 sa dihang si Presidente M. Russell Ballard, Akting nga Presidente sa Korum sa Napulog Duha ka mga Apostoles miingon, “Asa man kamo moadto aron makakita og detalyado ug dinasig nga han-ay sa organisasyon sa Simbahan diin kamo gitudloan ug gisuportahan sa mga lalaki ug babaye nga mapasaligon kaayo nga moserbisyo sa Ginoo pinaagi sa pagserbisyo kaninyo ug sa inyong pamilya?” (“Kang Kinsa Man Kami Moadto?” Liahona, Nob. 2016, 91).
Nakahunahuna dayon ko sa unsay nahitabo namo didto sa Eau Claire. Usa ka panalangin nga dili lang miyembro sa Simbahan apan miyembro usab sa pamilya sa ebanghelyo, diin kita makaserbisyo ug makapanalangin sa usag usa bisan asa pa kita.