Lima ka Kamatuoran nga Nakatabang nga Mapahimutang ang mga Nangagi sa Tukmang Panglantaw
Ang pagsabut sa atong kasaysayan naglakip sa proseso sa pagkat-on ug pagdiskobre nga maoy makapalig-on sa atong mga pagpamatuod, makatabang nga kita malikay sa pagduha-duha, makaistorya sa pinakamaayong mga sugilanon, makahibalo sa tinuod nga doktrina, ug makapalambo sa atong panghunahuna. Apan kon wala ang tukmang panglantaw, ang mga nangagi mamahimong tinubdan sa kalibug nga mopaus-os sa pagpamatuod ug makamugna og pagduha-duha.
Kining lima ka baruganan gikan ni Keith Erekson, Church History Library director, makatabang nga atong masabtan ang nangagi.
1. Ang nangagi wala na—mga tipik na lamang ang nagpabilin. Sa atong panglantaw sa karon, ang nangagi ingon og wala na gayud. Apan ang mga tipik sa nangagi nagpabilin. Kinahanglang tun-an nato ang mga rekord nga milahutay samtang hinumduman nga kini wala gayud magrepresentar sa tanang nangagi.
2. Ang mga kamatuoran dili maoy molitok, apan ang mga tig-istorya ang molitok. Tungod kay ang nagpabiling mga tipik sa nangagi dili kompleto, ang ubang tawo mosulay sa pagsumpay sa mga tipik aron maistorya ang sugilanon. Kinahanglan nga ikonsiderar nato sa kanunay kon si kinsa ang nag-istorya sa sugilanon, giunsa nila sa pag-istorya, ug kon nganong ila kining giistorya.
3. Ang nangagi lahi kay sa kasamtangan (ug OK ra kana). Samtang maningkamot kita sa paghatag og kahulugan sa mga tipik sa nangagi ug sa mga istorya nga gisugilon mahitungod niini, madiskubrihan nato nga ang nangaging panglantaw lahi sa atong mga panglantaw. Ang matag temporal nga aspeto sa tawhanong kasinatian mausab paglabay sa panahon sa ginagmay ug sa dinagkong paagi.
4. Ang mga pagbana-bana nga gihimo karon makadaot sa nangagi. Tungod kay ang nangagi lahi man sa atong panahon, kinahanglan nga magmatngon kitang dili magbana-bana sa mga nangagi nga ibase sa atong mga ideya ug mga prinsipyo karon. Sa kasagaran, ang gitawag og mga problema sa nangagi sa pagkatinuod mga ngil-ad lamang nga mga pagbana-bana nga gihimo karon.
5. Ang pagkat-on sa kasaysayan nagkinahanglan og pagpaubos. Sa atong mapanglantawan karon, dayag nga mas nahibalo kita kaysa mga partisipante unsay resulta sa mga nangagi, apan kita gamay ra usab og nahibaloan bahin sa ilang kasinatian sa pagsunod niini. Nagkinahanglan og pagpaubos ang pagdawat nga kita wala mahibalo sa tanan, sa paghulat nga mapailubon sa dugang pang mga tubag, ug sa padayon nga pagkat-on.