Jesukristo: Ang Tinubdan sa Malungtarung Hingpit nga Kalipay
Ni Elder David A. Bednar
Sa Korum sa Napulog Duha ka mga Apostoles
Gikan sa usa ka debosyonal nga pakigpulong, “That They Might Have Joy,” gihatag didto sa Brigham Young University niadtong Disyembre 4, 2018.
Ang matag miyembro sa gipahiuli nga Simbahan sa Ginoo kinsa naningkamot sa paghinumdom ug pagpasidungog sa sagradong mga pakigsaad ug nagsunod sa mga sugo makadawat sa gasa sa malungtarong hingpit nga kalipay.
Ang Belen [Pagkatawo ni Kristo], ni Michael Malm
Bag-ohay lang didto ko sa espirituhanong gamhanang miting sa pagpamatuod ug naminaw pag-ayo sa usa ka mahalaron nga sister nga mipahayag, “ako adunay hingpit nga kalipay tungod sa plano sa Amahan sa kaluwasan.”
Diha-diha klaro ngari nako mao ang kamatuoran nga kini nga babaye wala lamang mamulong og pamilyar nga mga pulong. Ang kahayag nga midan-ag sa iyang mga mata, ang espirituhanong maligdong tono sa iyang tingog, sa iyang hayag ug malinawon nga panagway—tanan mahitungod kaniya mipamatuod sa katinuod sa unsay iyang gisulti. Siya napuno sa hingpit nga kalipay. Misanag kaniya ang hingpit nga kalipay. Sa pagkatinuod, siya nahimong mas sama sa Manluluwas ug sa pagdawat sa Iyang imahe diha sa iyang panagway (tan-awa sa Alma 5:14), usa ka bahin nga mahimong hingpit nga malipayon.
Ang Iyang pagpahayag sa hugot nga pagtuo ang nakahimo kanako sa paghinumdom sa mga pulong sa pipila ka pamilyar nga mga himno:
Hugot nga pagtuo huptan
Kalipay makit-an.1
Maga Santos, dali ug lihok na;
Paglakaw, magmaya. …
Bisan mag-antus niining panaw
Grasya matag adlaw;
Maayong maninguha ta—
Maayo rang tanan! Maayo rang tanan!”2
Katam-is ining pulonga:
“Manunubos buhi Siya!”3
Ug niining panahon sa Pasko, kita moawit:
“Maayong balita sa dakong kalipay nga ako modala
Kaninyo ug sa tanang katawhan.”4
Ug
Kalipay sa kalibutan;
Moabut nang Hari! …
Balika sa tunog,
Balika sa tunog,
Tunog, tunog sa kalipay.5
Sukad nahimong presidente sa Ang Simbahan ni Jesukristo sa mga Santos sa Ulahing mga Adlaw, si Presidente Russell M. Nelson kanunay mipaabut og pagdapit ngadto sa mga tawo sa kalibutan nga naglakip sa saad sa kalipay: “Ang among mensahe ngadto sa kalibutan yano ug sinsero: among gidapit ang tanang anak sa Dios sa duha ka habig sa tabil sa pagduol ngadto sa ilang Manluluwas, dawata ang mga panalangin sa balaan nga templo, pagbaton og malungtarung hingpit nga kalipay, ug mahimong angayan sa kinabuhing dayon.”6
Siya Miayo Kanilang Tanan, ni Michael Malm
Unsa man gayud kining hingpit nga kalipay nga atong gikanta ug gitudlo ug diin kita adunay obligasyon nga itanyag ngadto sa tanang mga tawo? Ug sa unsang paagi kini maangkon? Karon atong ikonsiderar ang mga tubag niining duha ka importanting mga pangutana.
Unsa ang Hingpit nga Kalipay?
Usa ka komon nga depenisyon sa diksyonaryo sa hingpit nga kalipay mao ang “usa ka pagbati sa dakong kahimuot [o] kalipay.”7 Sa pagtandi, ang Giya ngadto sa mga Kasulatan naghulagway sa hingpit nga kalipay isip “usa ka kahimtang sa dakong kalipay [nga moresulta] sa matarung nga pagpuyo.”8 Makapahinam, ang atong panglantaw sa ebanghelyo makatabang kanato nga makasabut nga ang hingpit nga kalipay labaw pa kaysa usa lang ka hamubo nga pagbati o sa emosyon; hinoon, kini mao ang usa ka espirituhanong gasa ug usa ka kahimtang sa pagkatawo ug pagkahimo. Tungod niini nga rason akong gihulagway ang sister nga mihatag sa iyang pagpamatuod nga puno ug nagsanag sa hingpit nga kalipay.
Isip usa ka maalamon ug mahigugmaon nga amahan, si Lehi mitudlo sa iyang mga anak nga ang katuyoan gayud sa mortal nga kinabuhi alang sa tanang tawo nga makabaton og hingpit nga kalipay:
“Apan tan-awa, ang tanan nga mga butang nahimo diha sa kaalam kaniya kinsa nasayud sa tanan nga mga butang.
“Si Adan napukan aron ang mga tawo mahimo; ug ang mga tawo naingon, nga unta sila makabaton og hingpit nga kalipay” (2 Nephi 2:24–25).
Si Adan ug Eva mi-summarize sa importante nga mga leksyon nga ilang nakat-unan gikan sa Amahan sa Kahangturan ug sa ilang kaugalingon nga kasinatian. Si Adan mipahayag nga, “Daygon ang ngalan sa Dios, kay tungod sa akong kalapasan ang akong mga mata nabuka, ug niini nga kinabuhi ako adunay kalipay, ug usab sa unod ako makakita sa Dios” (Moises 5:10).
Ug miingon si Eva, “Kon dili pa unta sa atong kalapasan kita dili unta makaangkon og binhi, ug dili gayud masayud sa maayo ug sa dautan, ug sa kalipay sa atong katubsanan, ug sa kinabuhi nga dayon nga gihatag sa Dios ngadto sa tanan nga masulundon” (Moises 5:11).
Ang plano sa Amahan sa kalipay makapahimo sa Iyang mga anak nga makaangkon og pisikal nga lawas ug makaangkon og mortal nga kasinatian, sa pagpili sa matarung sa atubangan sa dautan ug tintasyon, ug pagtabang sa Langitnong Amahan sa Iyang talagsaong plano pinaagi sa dungganan nga mga kaminyoon ug pagkaginikanan.9 Sa katapusan, sa panahon sa atong pagkabanhaw, “ang espiritu ug ang lawas [paga]hiusahon dili na gayud mabahin pag-usab, nga sila unta makadawat sa kahingpitan sa kalipay” (Doktrina ug mga Pakigsaad 138: 17).
Sa Unsang Paagi ang Hingpit nga Kalipay Maangkon?
Nagtuo ko nga ang kalainan tali sa matarung nga hingpit nga kalipay ug kalibutanong mga kalingawan mapanudloon ug makatabang kanato nga mas makasabut sa kinaiya sa tinuod nga hingpit nga kalipay. Ang hingpit nga kalipay nagagikan sa hugot nga pagtuo diha ni Ginoong Jesukristo, takus sa pagdawat ug sa matinud-anong pagtahud sa sagradong mga ordinansa ug mga pakigsaad, ug maningkamot aron makabig pag-ayo ngadto sa Manluluwas ug sa Iyang mga katuyoan. Ang kalingawan mao ang resulta sa “kalipay,” “malagsik [ug] sa kasagaran banha nga aksyon o pinulongan,” o makapahimuot nga lingaw-lingaw.10 Usa ka adlaw nga magsakay-sakay sa Disneyland makalingaw. Takus nga pagpangandam ug pag-apil sa ordinansa sa sakramento makapalipay.
Ang hingpit nga kalipay una sa tanan espirituhanon; ang kalingawan temporal. Ang hingpit nga kalipay malungtaron, ang kalingawan temporaryo. Ang hingpit nga kalipay tulukibon ug bahandianon; ang kaliwangan mabaw. Ang hingpit nga kalipay tibuok ug kompleto; ang kalingawan parsyal. Ang hingpit nga kalipay kabahin sa pagka-mortal ug kahangturan; ang kalingawan kabahin lamang sa pagka-mortal.
Unsa ka importante alang nato nga dili gayud maglibug o ibaylo ang malungtaron, lawom nga hingpit nga kalipay sa mapahinungurong pagka-disipulo alang sa temporaryo ug mabaw nga kalingawan.
Ang Manunubos mao ang katapusan ug bugtong tinubdan sa malungtaron ug mahangturong hingpit nga kalipay. Si propeta Jacob mipamatuod: “Apan, tan-awa, ang matarung, ang mga santos sa Usa nga Balaan sa Israel, sila kinsa nagtuo sa Usa nga Balaan sa Israel, sila kinsa nakaantus sa mga kasakit sa kalibutan, ug wala panumbalinga ang kaulaw niini, sila makapanunod sa gingharian sa Dios, nga giandam alang kanila gikan sa katukuran sa kalibutan, ug ang ilang hingpit nga kalipay mahingpit sa kahangturan” (2 Nephi 9:18).
Ang Tinuod nga Tinubdan sa Kalipay
Tungod sa plano sa Langitnong Amahan ug sa Pag-ula sa Manluluwas, ang sinsero nga paghinulsol nagdapit kanato nga moduol ug mosalig diha ni Jesukristo, ang tinuod nga tinubdan sa hingpit nga kalipay. Palihug hunahunaa og maayo ang tubag sa mga katawhan ni Haring Benjamin sa iyang mga pagtulun-an mahitungod sa Pag-ula sa Manluluwas:
“Ug karon, nahinabo nga si hari Benjamin mihimo og pagtapos sa iyang pakigpulong sa mga pulong diin gisulti ngadto kaniya pinaagi sa usa ka anghel sa Ginoo, nga siya mitan-aw libut sa pundok sa mga katawhan, ug tan-awa sila nangatumba sa yuta, kay ang kahadlok sa Ginoo miabut kanila.
“Ug sila nagsud-ong diha sa ilang mga kaugalingon nga kalibutanon nga kahimtang, gani ubos kay sa abug sa yuta. Ug silang tanan misinggit og kusog uban sa usa ka tingog, nag-ingon: O kaloy-i, ug dihogi sa inula nga dugo ni Kristo nga kami mahimo nga makadawat sa kapasayloan sa among mga sala, ug ang among mga kasingkasing mahimo nga putli; kay kami mituo kang Jesukristo, ang anak sa Dios, kinsa milalang sa langit ug sa yuta, ug sa tanan nga mga butang; kinsa manaog nganhi taliwala sa mga katawhan.
“Ug nahinabo nga human sila makapamulong niini nga mga pulong ang Espiritu sa Ginoo midangat diha kanila, ug sila napuno sa hingpit nga kalipay, ingon nga nakadawat og usa ka kapasayloan sa ilang mga sala, ug nagbaton og kalinaw sa ilang tanlag, tungod sa naghingapin nga hugot nga pagtuo diin sila aduna diha kang Jesukristo kinsa moanhi,” (Mosiah 4:1–3).
Tungod sa plano sa Langitnong Amahan ug sa Pag-ula sa Manluluwas, ang pagkamasulundon nagdapit kanato sa pagsunod ni Jesukristo, ang tinuod nga tinubdan sa hingpit nga kalipay. Ang Manluluwas mipahayag ngadto sa Iyang mga disipulo:
“Kon tumanon ninyo ang akong sugo, magapabilin kamo sa akong gugma; maingon nga gituman ko ang mga sugo sa akong Amahan ug nagapabilin ako diha sa iyang gugma.
“Kining mga butanga gisulti ko kaninyo, aron ang akong kalipay magapabilin diha kaninyo, ug ang inyong kalipay mamahingpit” (Juan 15:10–11).
“Ug walay tawo nga makadawat sa usa ka kahingpitan hangtud nga siya maghupot sa iyang mga sugo.
“Siya nga maghupot sa iyang mga sugo makadawat og kamatuoran ug kahayag, hangtud siya pagahimayaon diha sa kamatuoran ug masayud sa tanan nga mga butang” (Doktrina ug mga Pakigsaad 93: 27–28).
Tungod sa plano sa Langitnong Amahan ug sa Pag-ula sa Manluluwas, ang pagserbisyo nagdapit kanato sa pagsunod sa kinaiya ni Jesukristo, ang tinuod nga tinubdan sa hingpit nga kalipay. Bag-o nakong nabasa ang pamahayag ni Kevin J Worthen, presidente sa Brigham Young University, mahitungod sa tumang hingpit nga kalipay. Siya miingon, “Ako mianhi aron motuo nga usa ka sukod sa atong mahangturong pag-uswag mao kon unsa ka dako sa hingpit nga kalipay ang atong makuha gikan sa pagserbisyo.”11
Si Alma ang Batan-on misulti sa iyang anak nga si Helaman: “Ako naghago sa walay paghunong, nga ako makakabig og mga kalag ngadto sa paghinulsol; nga ako makadala kanila sa pagtilaw sa hilabihan nga kalipay diin ako mitilaw; nga sila unta usab matawo sa Dios, ug mapuno sa Espiritu Santo” (Alma 36:24).
Hinumdumi ang kalipay ni Ammon samtang siya misaysay sa iyang misyonaryo nga buhat taliwala sa mga Lamanite:
“Tan-awa, ang akong hingpit nga kalipay napuno, oo, ang akong kasingkasing tugob sa hingpit nga kalipay, ug ako malipay diha sa akong Dios. …
“Tan-awa, pila ka libo sa atong mga kaigsoonan nga siya mibuhi gikan sa mga kasakit sa impyerno; ug sila gidala sa pag-awit sa matubsanon nga gugma, ug kini tungod sa gahum sa iyang pulong nga ania kanato, busa kita wala bay dako nga katarungan sa paglipay? …
“… Karon kini mao ang akong hingpit nga kalipay, ug ang akong dako nga pagpasalamat; oo, ug ako mohatag og mga pasalamat ngadto sa akong Dios sa kahangturan” (Alma 26:11, 13, 37).
Walay Kadaut nga Mahitabo Kon Naa sa Duol sa Maghuhupay, ni Michael Malm
Tungod sa plano sa Langitnong Amahan ug sa Pag-ula sa Manluluwas, ang mga hagit ug kasakit nagdapit kanato sa pagbayaw sa atong mga mata (tan-awa sa Isaias 40: 26; Salmo 123:1–2) ngadto ni Jesukristo, ang tinuod nga tinubdan sa hingpit nga kalipay. Ang bililhong panan-awon nga gihatag pinaagi sa gipahiuli nga ebanghelyo nagtugot kanato nga makakat-on sa mga leksyon nga nag-andam kanato alang sa kahangturan pinaagi sa mga kalisdanan sa pagka-mortal. Ang atong mga pag-antus ug dili maayong panghitabo “mabuntog diha sa hingpit nga kalipay ni Kristo” (Alma 31:38) ug nagpahinungod alang sa atong kaayohan. (tan-awa sa 2 Nephi 2:2), “nga ang [atong] binuhatan mahimo unta nga kaayohan sa [atong] kalag.” (2 Nephi 32:9). Sa ingon ang hingpit nga kalipay molahutay sa mga panahon ug pinaagi sa mga kasinatian nga maayo ug dautan tungod sa atong kahibalo sa plano sa Amahan ug sa Pag-ula sa Manluluwas.
Ang pagtuo diha ni Ginoong Jesukristo, paghinulsol, pagkamasulundon, pagserbisyo, ug usa ka panglantaw sa ebanghelyo mahitungod sa mga pagsulay nga atong masinati sa pagka-mortal ang tanan nagdapit nato sa pagduol ngadto sa tinubdan sa malungtarung hingpit nga kalipay—nga Si Jesukristo. Dapiton ko kamo sa pag-ila, sa pagtuon ug mainampoong mamalandong sa dugang nga mga baruganan nga makapahimo nato nga makadawat niining importante nga espirituhanong gasa sa hingpit nga kalipay.
Usa ka Hingpit nga Kalipay nga Saad
Ang malungtarung hingpit nga kalipay dili usa ka panalangin nga gireserba sa pipila ka pinili. Hinoon, ang matag miyembro sa gipahiuli nga Simbahan sa Ginoo nga naningkamot sa paghinumdom ug motahud sa sagradong mga pakigsaad ug mosunod sa mga sugo makadawat niini nga gasa, sumala sa kabubut-on ug tayming sa Dios. Niining panahon sa Pasko, hinaut nga ang matag usa nato maningkamot sa pagpasalamat sa hingpit sa langitnon nga gasa sa hingpit nga kalipay. Samtang ato kining buhaton, kita magsugod nga makakita og bag-ong panan-awon ug makadungog sama sa “Santos, mga anghel mag-awit,” samtang atong “balika[n] ang tunog” ug “simbahon gyud ang Dios.”12
Akong ideklarar ang akong pagsaksi sa buhing reyalidad ug pagkabalaan ni Ginoong Jesukristo. Malipayon akong mopahayag sa akong sigurado nga pagsaksi sa buhing reyalidad ug pagkabalaan ni Ginoong Jesukristo.