Mga Miyembro Mipakigbahin sa mga Panalangin gikan sa Dali, Sunod Kanako
Ang mga kamatuoran nga inyong makat-unan gikan sa paggamit sa Dali, Sunod Kanako isip usa ka kapanguhaan sa pagtuon sa kasulatan importante sa tanan.
Dunay daghan kaayong kausaban sa Simbahan karong bag-o, ug talagsaon kaayo kon giunsa sa pagpadali sa Ginoo ang Iyang buhat ug pagtabang nga mokatap ang ebanghelyo sa tibuok kalibutan! Usa ka dakong kausaban mao kana, ang pasiuna sa Dali, Sunod Kanako nga kapanguhaan karong tuiga nga nakapanalangin sa kinabuhi sa daghang mga miyembro nga nagpuyo sa lain-laing mga kahimtang. Gikan sa mga magtiayon ngadto sa mga biyuda ngadto sa mga young adult ngadto sa mga hamtong nga wala nay mga anak, ang ilang mga kasinatian uban sa Dali, Sunod Kanako nagpakita nga bisan asa pa kamo sa kinabuhi, ang mga kamatuoran nga inyong makat-unan gikan sa pagtuon sa kasulatan importante sa tanan, ug kini makahatag ninyo og access ngadto sa mga panalangin sama sa paglig-on sa inyong pamilya, pagpaduol ngadto sa Langitnong Amahan, ug sa pag-ila ug pagdawat og personal nga pagpadayag. Ania ang pipila ka istorya gikan sa mga miyembro sa tibuok kalibutan kinsa gipangutana kon sa unsang paagi nga ang paggamit sa Dali, Sunod Kanako isip usa ka kapanguhaan sa pagtuon sa kasulatan nakapanalangin sa ilang kinabuhi:
“Sa tinuod ako nakabasa og dugang nga mga kasulatan karon kay sa akong naandan. … Kini nakapanalangin sa among pamilya ug kini mipanalangin kanako nga maghunahuna mahitungod niana og dugang matag adlaw. Mas maayo kini nga paagi sa tibuok semana kay sa kaniadto.” —Tim Peppers, Utah, USA
“[Ang tanan sa among pamilya] daw mas moapil ug mas interesado [sa among pagtuon sa kasulatan]. Mas nabati namo og dugang ang Espiritu. … Kini nga programa mihiusa namo, ug kini nakahimo namo nga mas magkasinabut ug malingaw sa pakig-uban sa usag usa ug pagtahud sa mga opinyon sa matag usa.” —Nicky Christensen, Kentucky, USA
“Ang akong kasinatian uban sa Dali, Sunod Kanako talagsaon tungod kay kini naghimo kanako nga mas maduol sa akong Langitnong Amahan. Moingon sila nga dili kamo makahigugma sa usa ka tawo nga wala ninyo mailhi. Ug ang pagtuon sa mga kinabuhi sa mga propeta ug ni Jesukristo nagtugot kanako nga makaila kanila ug mahigugma kanila. Nakapahimo kini kanako nga mobati sa gugma sa Langitnong Amahan sa tanang mga butang. … Nakahimo kini kanako nga mas makakita sa gagmay nga mga butang nga Iyang gihimo alang kanako matag adlaw nga wala nako mamatikdi kaniadto.” —Carla Imelda Gutierrez, Siyudad sa Mexico, Mexico
“Ang Dali, Sunod Kanako siguradong makapanalangin sa mga young single adult tungod kay kini mohagit nila sa pagdala sa mga kasulatan matag adlaw … ug mobati sa gugma sa Dios ug makakita unsa ang Iyang gusto nga ilang makat-unan ug unsa ang Iyang giandam alang kanila.” —Angela Rivera, Kentucky, USA
“Nakapausab kini kon giunsa nako pagtan-aw ang akong kasinatian sa Dominggo, apan tingali ang mas importante, kini nakapausab kon giunsa nako pagtan-aw ang kasinatian sa akong pamilya. NaIig-on namo ang usag usa ug nagdungan sa paglambo sa tibuok semana.” —Kim Peterson, Utah, USA
“Nakapausab kini sa paagi sa akong pagtuon sa mga kasulatan. … Nadasig ko nga magbasa kada adlaw. Ug kini maanindot. [Akong gibati nga] ang mga leksyon gihimo alang kanako.” —Maria Eugenia Cervin, Siyudad sa Mexico, Mexico
“Kini nga programa nakapakonsiderar nako sa akong kaugalingong mga pagtuo ug nakatabang nako nga mas maduol sa Langitnong Amahan. Gibati nako ang dugang kalinaw sa akong kinabuhi. Nakita nako ang dugang nga kalipay sa pagpangandam sa mga leksyon karon. Isip usa ka magtutudlo, kini naghimo kanako nga mobati nga kini nakahimo og kalainan sa [akong mga estudyante] nga mga kinabuhi.” —Jack Long, Kentucky, USA
“[Human] ako makapauli gikan sa akong misyon, nakatabang kini nako og daghan uban sa transisyon sa pagtuon sa akong mga ginikanan matag adlaw. [Kaniadto,] magtuon kami sa tinagsa ug kami wala niana nga koneksyon—nga walay pagpalig-on sa usag usa. Apan sukad sa among pagsugod sa pagtuon isip usa ka pamilya, akong nakita kon sa unsang paagi ang akong pamilya nalig-on sa hilabihan. … Matag higayon nga magtuon kami, mabati namo ang Espiritu.” —Alan Vela, Siyudad sa Mexico, Mexico
“Sa dihang gidapit ang Espiritu sa akong kinabuhi matag adlaw ug matag bahin niini, mas malipayon kaayo ako. Gibati nako nga ako nagbuhat og mas maayo pa. Alang nako, ang pagkahibalo ug pagbati nga ang Ginoo anaa sa akong kiliran mao gayud ang labing maayong paagi nga akong nakita sa pag-atubang sa akong kinabuhi nga puno sa kawalay kasiguroan ug sa wala mahibaloi.” —Jenna Peterson, Kentucky, USA