Ua Faasoa mai e Tagata o le Ekalesia Faamanuiaga mai le Sau, Mulimuli Mai ia te A’u
O upumoni e mafai ona e aoaoina mai le faaaogaina o le Sau, Mulimuli Mai ia te A’u o se punaoa mo suesuega o tusitusiga paia e talafeagai mo tagata uma.
Ua tele lava ni suiga i le Ekalesia talu ai nei, ma e ofoofogia le vaaia o le tele o le faanatinatiina e le Alii o Lana galuega ma le fesoasoani i le talalelei ia salalau atu i le salafa o le lalolagi! O se tasi o suiga tele faapitoa, o le folasaga o le punaoa Sau, Mulimuli Mai ia te A’u i lenei tausaga ua faamanuiaina ai olaga o le toatele o tagata o le Ekalesia o loo soifua i ni tulaga eseese. Mai i ulugalii i fafine ua oti a latou tane i autalavou matutua i tagata matutua ua aunoa ma fanau, o o latou aafiaga i le Sau, Mulimuli Mai ia te A’u e faaalia ai po o fea lava o e i ai i le olaga, o upumoni e mafai ona e aoaoina mai le suesueina o tusitusiga paia e talafeagai mo tagata uma, ma e mafai ona tuuina atu ia te oe ia faamanuiaga e pei o le faamalolosia o lou aiga, faalatalata i le Tama Faalelagi, ma le iloaina ma le mauaina o faaaliga patino. O ni nai tala nei mai tagata o le Ekalesia i le lalolagi atoa o e na fesiligia pe na faapefea e le faaaogaina o le Sau, Mulimuli Mai ia te A’u o se punaoa mo suesuega o tusitusiga paia, ona faamanuiaina o latou olaga:
“Ua ou faitauina moni le tele o tusitusiga paia i le taimi nei nai lo le taimi muamua. … Ua faamanuiaina ai lo matou aiga ma ua faamanuiaina ai au i le mafai ona mafaufau atili i lena mea i se tulaga i aso uma. Ua na o se faatulagaga sili ona lelei i le vaiaso atoa nai lo le taimi muamua.” — Tim Peppers, Iuta, ISA
“Na foliga mai [o tagata uma lava i lo matou aiga] na tele atu lo latou punouai ma sili atu ona fiafia [i a matou suesuega o tusitusiga paia]. Matou te lagona teisi ai le Agaga. … Ua tuufaatasia e lenei polokalama i matou, ma ua mafai ai ona sili atu ona matou fealofani ma fiafia atili i le tasi ma le isi ma faaaloalogia ai manatu o le tasi ma le isi.” —Nicky Christensen, Kentucky, ISA
“O lo’u aafiaga i le Sau, Mulimuli Mai ia te A’u e faapitoa lava aua ou te lagona ai le latalata atili atu i lo’u Tama Faalelagi. Latou te fai mai e le mafai ona e alofa i se tagata e te le iloaina. Ma o le suesueina o soifuaga o perofeta ma Iesu Keriso e mafai ai ona ou iloa ma alofa ia i latou. Ou te lagona ai le alofa o le Tama Faalelagi i mea uma. … Ua atili ai ona ou taliaina le vaai i mea iti Na te faia mo au i aso taitasi ou te lei matauina muamua.” —Carla Imelda Gutierrez, Aai o Mekisiko, Mekisiko
“O le Sau, Mulimuli Mai ia te A’u e mafai ona faamanuiaina moni ai le autalavou matutua nofofua aua o le a luitauina ai i latou e faitau mai tusitusiga paia i aso taitasi … ma ia na ona lagona le alofa o le Atua ma vaai i mea Na te finagalo ia i latou e aoao ai ma mea ua Ia faapolopolo mo i latou.” —Angela Rivera, Kentucky, ISA
“Ua suia ai le ala ou te vaai atu ai i lo’u aafiaga i Aso Sa, ae atonu o le mea e sili atu le taua, ua suia ai le ala ou te vaai ai i lo’u aafiaga faaleaiga. Tatou te fefaamalosiau i le tasi ma le isi ma tuputupu ae faatasi i le vaiaso atoa.” —Kim Peterson, Iuta, ISA
“Ua suia ai le auala ou te suesue ai i tusitusiga paia. … “E musuia au e faitau i aso uma. Ma e matagofie. [Ou te lagona e pei] o lesona ua faia mo au.” —Maria Eugenia Cervin, Aai o Mekisiko, Mekisiko
“O lenei polokalama na ou mafaufau ai i o’u lava talitonuga ma fesoasoani ou te lagona ai le latalata atili atu i le Tama Faalelagi. Ua ou lagonaina atili le filemu i lo’u olaga. Ou te maua ai le olioli sili atu i le sauniaina o lesona i le taimi nei. I le avea ai ma se faiaoga, ou te lagona ai ua faia ai se eseesega i [olaga o au tamaiti aoga].” —Jack Long, Kentucky, ISA
“[Ina ua mavae] lo’u toe foi mai i le fale mai i lau misiona, sa fesoasoani tele ia te au ma le suiga e suesue faatasi ma ou matua i aso uma. [I le taimi ua tuanai,] sa matou suesue taitoatasi ma sa lei i ai lena fesootaiga—sa leai se faamalosiauga masani. Ae talu ai sa amata ona matou suesue o se aiga, ua mafai ona ou iloa le auala na matua faamalosia ai lo’u aiga. … O taimi uma lava matou te suesue ai, e mafai ona matou lagona le Agaga.” —Alan Vela, Aai o Mekisiko, Mekisiko
“Pe a valaauliaina le Agaga i lo’u olaga i aso uma ma i vaega taitasi, ua sili atu lo’u fiafia. Ou te lagona e pei ua sili atu ona lelei lo’u tulaga. Mo au, o le iloaina ma le lagonaina moni o loo i ai le Alii i lou itu, o le auala sili lea ona manaia ua ou maua e taulima ai lou olaga lea ua tumu i le le mautonu ma le le mailoa.” —Jenna Peterson, Kentucky, ISA