O Le Faataitaiga a le Faaola o le Faiga o ni Uo
Tatou te oo uma i le vaitau o le tuuatoatasi, ae o le faataitaiga a le Faaola ua aoao mai i tatou i ni nai mea e uiga i le faia o ni uo.
Atapue mai le Getty Images
I le avea ai ma talavou matutua, tatou te oo uma lava i le vaitau o le tuuatoatasi—see ese atu i le aoga, foi mai i le aiga mai se misiona, o le teteaga, ua na o le pau lea o le tagata o le Ekalesia i lo outou eria, e fou mai i le uarota, nofofua, faaipoipo atu i se tagata e aluese soo mai le fale, o le avea ma se matua fou, ma le tele o isi mea. O nisi vaega o le soifuaga e le mafai ai ona faigofie le faia o ni uo.
Ae e le faapea ai e le mafai ona fai. E faapei o mea uma, o loo taoto le tali i le mulimuli i le Faaola. Sa saunoa Elder Ronald A. Rasband o le Korama a Aposetolo e Toasefululua e faapea, “I faigauo, e pei foi o isi mataupu faavae uma o le talalelei, o Iesu Keriso o lo tatou Faaaoao sili.”1 O nisi nei o mea e mafai ona tatou aoao mai le faataitaiga a le Faaola e uiga i le faia o ni uo.
Saili Atu i Latou
E faataua e Iesu ia faauoga. Sa ia manaomia le fesoasoani ma le lagolagosua a isi (e pei o i tatou uma lava!) e faataunuu ai Lana galuega i le lalolagi, ae nai lo le faatalitali mo tagata sao e faaali mai i Lona faitotoa, sa Ia alu atu ma maua i latou! Sa alu o ia i nofoaga atonu e le masani lava ona alu i ai (tagai i le Luka 5:3 – 10), Sa savalivali solo o Ia (tagai i le Mareko 1:16; Ioane 1:36), ma sa Ia valaaulia foi tagata i Lona fale (tagai i le Ioane 1:39).
Atonu tatou te le manaomia ni uo e pei foi ona faia e le Faaola, ae e matua taua lava mo i tatou ona siomia e ni tagata lelei. Afai o loo e i ai i se tulaga fou o le olaga e te manaomia ai ni uo, saili atu i latou. Auai i le lotu ma isi gaoioiga, faailoa atu oe lava, faataitai ni mea fou, talimalo i se faatasiga, auauna atu ma le faamaoni (po o ai lava e te auauna atu i ai atonu e manaomia foi se uo!), ma o le a e maua oe lava o siosiomia e i latou o le a avea ma ni uo.
Faailoa Atu le Lelei i Isi
Ou te fiafia ina ua feiloai Iesu ma Natanielu ma fai mai, “Faauta, o se Isaraelu moni lava, ua leai se ila!” (Ioane 1:47). Soo se taimi lava ou te mafaufau ai i lenei fuaiupu, e faamanatu mai ai ia te au ia ou saili ma faailoa atu le lelei ua ou iloa i isi.
O le “Susuga” a Fred Rogers, o le sa tomai faapitoa i le faiga o ni uo, sa ia faailoa mai foi o le vaavaai mo le lelei i isi o se uiga faa-Keriso. “Ou te talitonu o le agaga faafetai o se mea paia,” o lana tala lea. “Pe a tatou vaavaai mo mea e sili ona lelei i le tagata o loo tatou faatasi i le taimi nei, o loo tatou faia lava ia mea e faia e le Atua. O lea la, o le alofa ma le talisapaia o o tatou tuaoi, o lo tatou auai lava lea i se mea moni lava e paia.”2
Tatalo mo Au Uo
O nisi o aafiaga faalelalolagi e sili ona manatua pea faatasi ma le Faaola sa i ai ina ua tatalo o Ia mo isi. Na faamauina e Sa Nifae e faapea “e le mafai foi ona ofi i le manatu o se tagata le olioli na tumu ai o [latou] loto i lena aso na [latou] faalogo ai i le tatalo a Keriso i le Tama mo i [latou]” (3 Nifae 17:17). Atonu o a tatou tatalo e le pai atu e faapei o Ana tatalo, ae e mafai lava ona tatou faaaoga le taimi e tatalo ai mo i latou tatou te popole i ai.
E le gata i le tatalo mo a outou uo, e mafai foi ona tatalo ia maua ni uo. A o e “filifili ma le Alii i au mea uma e fai” (Alema 37:37)—e aofia ai lou popolega e uiga i le tuuatoatasi ma le manaomia o ni uo—e le gata o le a Ia “taitai [outou] mo le lelei,” o le a Ia taitai foi oe i le lelei—o tagata lelei o e mafai ona avea o ni uo lelei.
Vaai atu i le Faaola
E silafia e Iesu o tatou lagona pe a tatou lagonaina le tuuatoatasi ona o Ia foi “ua masani ma tiga” ma le tuuatoatasi (Mosaea 14:3). E tusa lava pe o tatou o ni uo lelei, o le a tatou maua pea lava vaitau po o taimi o le tuuatoatasi. Ae e mafai foi ona avea le tuuatoatasi ma faamanatu ia i tatou o le tiutetauave paia o le alofa o le tasi i le isi (tagai i le Ioane 13:34).
Afai o loo e tauivi i se vaitau o le tuuatoatasi i le taimi nei, ia vaai atu i le faataitaiga a le Faaola. I luga ae o se isi lava tagata, ia fai o Ia ma au uo. O Ia—ma lo tatou Tama Faalelagi—o le a le tuua lava oe e tuuatoatasi.