O Lau Taua e faasaga i le Tuuatoatasi
E alala le tusitala i Prague, Czech Republic.
I le tele o itu, o le auai i le Ekalesia na faateleina ai le tuuatoatasi na ou lagonaina talu mai le teteaga a ou matua. Ae na fesoasoani foi ou te maua ai se auala e foia ai lou tuuatoatasi.
Atapue mai le Getty Images
Mo se taimi e sili ona umi i lou olaga, sa ou lagona ai e peiseai sa na o au lava. I le taimi muamua, o le tuuatoatasi o se lagona fou ia te au, aua ou te sau mai se aiga e toalima, a o tamaitiiti, sa masani ona ou fiafia i le toatele o tagata ma le pisapisao e siomia ai au i le fale. Sa ou iloa sa ou le tuuatoatasi lava.
O le mea e faanoanoa ai, i tausaga o lou talavou, sa tetea ai ou matua. Ina ua mavae lena, sa amata lava ona ou lagonaina le tuuatoatasi. Sa ou taumafai e mafaufau po o le a se mea e fai, e alu ese mai lou sone mafanafana e faia ni uo i le aoga. Sa ou faamoemoe ou te fiafia i le masaniga o le toatele o tagata i le aoga, e pei ona ou masani ai i le aiga. Ae e ui lava ina sa siomia au e tagata, sa ou lagona pea le tuuatoatasi. O lenei lagona sa faaitiitia i ni nai tausaga mulimuli ane, ina ua ou auai i le Ekalesia.
I se tasi aso sa tuitui mai ai faifeautalai tamaitai i lou faitotoa ma e sa talia e lou tina. Ou te manatua lana tali atu ia te i laua, “Ia, ou te le fiafia i ai, ae atonu e fiafia i ai lau tama teine. Faatali, o le a ou alu e aumai o ia.”
Ina ua amata ona ou talanoa atu ia te i laua, sa ou lagonaina le Agaga o tau mai ia te au e faalogo. Ina ua mavae ni nai masina o le faalogo atu ma le aoaoina, sa ou iloa ai o le mea lenei sa ou saili i ai. E ui lava e le o le lagona lea sa amata ai, o lau faaiuga e papatisoina sa le na o le fesoasoani ia te au e latalata atu ai i le Alii ae faapea foi ona faaiu ai lau taua faifai pea e faasaga i le tuuatoatasi.
Lagonaina o le Tuuatoatasi o se Tagata Liliu Mai
Ina ua ou filifili ou te manao e papatiso, sa le i fai sao mai lava lou aiga e uiga i lea mea. E ui lava e toatasi lou tuagane ma lou tina sa auai i lou papatisoga, sa teena au e isi tagata o le aiga ona ua matou le toe faasoaina le lotu e tasi.
I le amataga, sa fai lava si faigata, ma sa ou lagonaina le tuuatoatasi sili atu nai lo se isi lava taimi. Ae ina ua mavae se taimi, o se tasi o ou tausoga na filifili e avea ma se Hindu faamaoni, e ese foi mai le talitonuga a le vaega o totoe o lo matou aiga. Sa ia faaaloalo i lau filifiliga e auai i le Ekalesia aua na faapena foi ona faia e ia. Ona o lana faataitaiga o le alofa mai ia te au, o nisi o tagata o lou aiga ua le toe teenaina au.
I le aoga, sa ou iloa ai ua le toe fetaui lava ma au. Ma i le galuega, na tilotilo mai tagata ia te au i se auala ese lava ina ua ou fai atu ia i latou ua papatisoina au. Sa ou le lagonaina le matamuli—e le sese lau faaiuga, ma sa ou iloa lena mai le taele o lou loto—ae sa le malamalama au uo ua suia lou olaga, ma o le toatele o i latou ua filifili e le toe avea ma ni uo ia te au.
Fai Ni Uo Fou
E ala i nei aafiaga faigata uma, sa ou tatalo pea, ma na ou lagonaina le mafanafana sa folafola mai e le Agaga i se faamanuiaga faaperisitua na ou maua. I se tasi aso sa ou fesili atu ai, i le tatalo, “Aisea ou te lagona ai le tuuatoatasi?” Ma sa ou maua se tali po o se folafolaga—o le a ou faia ni uo fou, uo o e o le a malamalama ia te au.
Ma sa ou faia! Sa ou faia ni uo fou, o nisi e le lolotu i le Ekalesia ae e faaaloalo ma alolofa pea ia te au. Sa ou faia foi ni uo i le Ekalesia o e ua avea e pei o se aiga ia te au.
I le avea ai o se tagata matamuli, o le talanoa atu i tagata e le o se mea e sili ona faigofie ia te au. O le tele o le taimi na ou tuu atu i tagata e faalatalata mai ia te au, ae i le aoga maualuga sa le toatele nisi sa fia talanoa mai ia te au. Sa ou fiafia na ou manatua ai lenei togafiti tuai na ou aoaoina—sa ou ataata. O le tele o le ataata o se tagata, o le tele foi lea o le faalatalata atu i ai o tagata. Sa ou iloa o le tele o lou ataata i tagata, o le tele foi lea o le amata ona talanoa mai ia te au ma faigofie ai ia te au ona avea ma uo ia i latou.
Tutu Faatasi ma le Tama Faalelagi
O se tali lelei i lau tatalo o le saunoaga a Peresitene Thomas S. Monson (1927–2018) “Ia Lototele e Tu Na o Oe” (Liahona, Nov. 2011, 60–67). I le aluga o taimi, na aoao mai e lenei lauga se mea taua e tasi e uiga i le tuuatoatasi: e te le tu lava na o oe pe a tutu faatasi ma le Alii.
E i ai pea aso e faigata ai ia te au ona tutu faatasi ma Ia. O le mata’u i isi tagata e tauemu mai ia te au ma ou talitonuga e faigata. Ua i ai tagata e tau mai ia te au e faapea o soo se tapuaiga e faavalevalea, ma ua taitaiina au faapei o se mamoe gugu. Ina ua iloa e uiga i lau lotu, o nisi tagata ua manatu mai ia te au e peiseai sa ou maua i se faamai pipisi matautia. O nei aafiaga uma na faia ou te lagona ai sina le mautonu ma le tuuatoatasi. O se taua i aso uma, ae o se tasi ou te manumalo ai i aso uma, pea lava pea, ona o le fesoasoani ma le lagolago atoa a le Alii.
I aso taitasi, ou te taumafai ai e mulimuli i le Agaga. Soo se taimi lava ou te faalogo ai i le Agaga ma talanoa i tagata, o musumusuga mai le Agaga e mafai ai ona ou auauna atu i isi. Ou te maua ai se avanoa e manatua ai, ou te le o tuuatoatasi lava. O le mea aupito sili ona taua, o le faalogo i le Agaga ou te maua ai le avanoa e faasoa atu ai lau molimau. Ua ou iloa o le faasoa atu o lou talitonuga i lenei auala e fesoasoani ai ia te au e faaitiitia ai le fefe ma malamalama atili ai isi ia te au. Ae ou te lei iloaina, sa le tuuatoatasi lava au—o le talanoa atu i soo se tasi sa ou talanoa i ai i le taimi lena—sa ou tu faatasi ma le Agaga. Faatasi ai ma le Agaga i lou itu, e le mafai lava ona tuuatoatasi oe.
I le tele o tausaga ma taimi o le lagonaina o le tuuatoatasi, na tau mai e le Alii ia te au pea lava pea o au o lona afafine faapelepele, ma e alofa o Ia ia te au. E mafai faapefea ona ou lagona le tuuatoatasi pe afai o i ai loʼu Tama o loo ma tutu faatasi? E mafai faapefea ona ou lagonaina le tuuatoatasi pe afai e na o le tasi le tatalo le mamao ese ma Ia?
I lau taua i aso taitasi ma le lagona tuuatoatasi, ou te valaau i lou Tama Faalelagi e le na o le tu mai i ou tafatafa ae e fesoasoani mai pea ia te au ou te tu i Ona tafatafa. Ou te iloa e lei aluese lava o Ia mai ia te au e tau atu i soo se mea na o au lava, ma e tu pea o Ia i ou tafatafa, ma alofa mai ia te au.