Bar Jepļaak n̄an ioon Iaļ eo ālkin Bōro̧ro eo Aō kar Jab Kōtmene
Iaar makeļo̧k im bōro̧ro. Bōtaab iaar kile iaar kōņaan juon mour eoktak. Iaar kōņaan mour n̄an Kraist, im iaar kōņaan erreo n̄an kōjeraam̧m̧an ko an tampeļ.
Iaar jokāālet n̄an pād wōt epaak kapijuknen n̄an etal n̄an kaļōj. Iaar lo̧udin̄din̄ n̄an ikkure ikkure (sport) eo iaar iakwe ilo ļebōļ eo eutiejļo̧k ilo aō jeļā baam̧le eo aō enaaj kar pād ilo jikin alooj eo alooj im rejtake eō. Iaar itok jān juon baam̧le eo ekabwilōn̄lōn̄, im ro jinōm im jema raar katakin kōm aorōk ko im jon̄ak ko an gospel eo an Jisōs Kaist.
Bōtaab āinwōt juon rijikuuļ rikkure ikkure jakōd (soccer) im mour “mour in kaļōj,” iaar kowaan pedped ko kar katakin eō. Iaar etal n̄an kūlaaj im kar ikkure jakōd (soccer) ilo raan in jikuuļ ko (weekday) innām bade ilo jem̧ļo̧k in wiik (weekend), tōmak bwe iaar lo m̧ōņōņō eo em̧ool. Iaar lukkuun in bōd! Bōtaab ej ta eo Saten ej kōm̧m̧ane—ej kōm̧m̧ani men ko rebōd bwe ren lukkuun in kapopo jon̄an ālkin jidik iien rāinwōt rejim̧we.
Mour eo aō eaar m̧ōkaj an erom tōr jān jon̄an ilo iiō eo kein kajilu in aō kaļōj. Iaar kōm̧m̧ani kāālet ko renana im kar lo bwe iaar bōro̧ro. Aolepān kōļmenļo̧kjeņ eo aō kōn mour eaar oktak. Eaar jako an kōn n̄a wōt, bōtaab kōn nin̄nin̄ eo iaar bōro̧ro kake. Naan ko ilo Alma 36: 17–21 kar kōnono kajju tok n̄an aō kōnke iaar en̄jake ekanooj ļap būrom̧ōj im bōd kōn kāālet ko aō, āinļo̧k wōt n̄an ekōjkan an kar Alma en̄jake.
Iaļ eo kōn ukweļo̧k emaron̄ in kar pen im kabbwerer. Iaar lo ekar pen n̄an kwaļo̧k bwe iaar bōd im kar kōm̧m̧an bōd. Jelm̧ae ro iaar iakwe er im jiron̄ er iaar bōro̧ro eaar juon iaan iien ko rekamijak tata ilo mour eo aō. Iaar barāinwōt ioon bisop eo aō im kar aikuj pād ilo juon ko̧o̧njeļ in bōk jān kuņaan, eo ekar jem̧ļo̧k eo n̄an n̄a n̄an maron̄ jab bōk kwojkwoj eo ium̧win jidik iien. Iaar kōņaan wōt etal ettoļo̧k im etan ke menin eaar jab juon m̧ool in mour. Bōtaab ekar m̧ool in. En̄in ekar m̧ool eo ekāāl aō. Ekar wōr juon aō jekjek epen jekdo̧o̧n ta.
Baam̧le eo aō ekar kōraate kāālet ko aō, bōtaab raar barāinwōt iakwe eō im kar kōņaan ta eo em̧m̧an tata n̄an n̄a, ejja āinwōt Jemedwōj Ilan̄. Elōn̄ iien ko iaar kajjitōk ippa make ekōjkan An maron̄ jeorļo̧k aō bōd ālkin aō likjab ekanooj lōn̄ alen. Uwaak eo iaar bōke aolep iien ekar, kōnke E ej iakwe eō im ekōņaan bwe in bar ro̧o̧l n̄an Ippān. Iaar jeļā iaar kaeinepataik ro jinō im jema ilo laļ in, bōtaab ļōmņak eo kōn ewi jon̄an aō kar kainepataik Jema ilo Lan̄ ekar lukkuun kanooj jab kam̧ōņōņō.
Ej wōt, iaar lukkuun en̄jake makeļo̧k im jōbwābwe ilo allōn̄ ko ruo im̧aan in bōro̧ro eo aō, jab kanooj jeļā ta eo ij aikuj in kar kōm̧m̧an tok ālik. Ke eaar ļapļo̧k an m̧ool aō jar n̄an Jemedwōj Ilan̄ kōn tōl im jipan̄, iaar ekkatak bwe iaar jab lukkuun makeļo̧k. E ekar iien otemjej pād kōttar aō kappukōt E. Ekar wōr juon aō oktak in bōro eo elukkuun in kajoor. Iaar kōņaan mour juon mour eoktak. Iaar kōņaan mour n̄an Kraist. Iaar kōņaan erom erreo n̄an bōk kwojkwoj bar juon alen. Iaar kōņaan erom erreo n̄an m̧are ilo tampeļ eo juon raan, jet men ko me iaar ļōmņak ekar kanooj in pen tōpari kōnke bōd ko aō.
Innām ekar iien me iaar ekkatak kajoor eo em̧ool an Jisōs Kraist āinwōt aō Rilo̧mo̧o̧r. Iaar lo ekanooj in lōn̄ tūriam̧o kake ko rejouj jān Irooj ilo allōn̄ ko ruwatimjuon rekkadu. Iaar bōk eļapļo̧k tōmak jān kar m̧okta ilo mour eo aō. Ekar tōmak eo ilo Jisōs Kraist me eaar kōtļo̧k bwe in kāālet kaajiriri n̄an leddik eo nejū eaorōk. Metak eo kōn likūt leddik eo nejū n̄an kōkaajiriri eaar kanooj in ļap. Bōtaab lan̄lōn̄ eo iaar en̄jake ilo jipan̄ bar juon leddik nejin Anij bōkļo̧k e n̄an baam̧le eo an indeeo em̧ool ekar ļapļo̧k. Iaar oktak n̄an em̧m̧anļo̧k jān en̄jake jab in, āinwōt ad aolep maron̄ in eļan̄n̄e jej m̧ool in būrom̧ōj im ukweļo̧k—kōtļo̧k an Irooj kemour kōj bar juon alen.
Aolep raan jān iien eo ikar jeraam̧m̧an.
Kwoj lo, iaar barāinwōt kōkaajiriri ke iaar nin̄nin̄, im jiljino allōn̄ ālkin likūt leddik eo nejū n̄an kōkaajirir, iaar lo im bar koba ippān lukkuun jinō. Ekar jab juon kabwilōn̄lōn̄ eo edik. Ejjab to ālkin wōt, iaar ioon ļeo pāleō ilju jekļaj eo iaar āliktata m̧areik ilo tampeļ. Ij kiiō jinen emen bar ajri ro raiboojoj.
Aō kar bōro̧ro ilo kar jab kōtmene im leļo̧k m̧aanje eo nejū n̄an kōkaajiriri ekar ukōt mour eo aō n̄an indeeo. Ekar kanooj ļap aō ekkatak kōn n̄a make im kōn iakwe eo ewōr me an Anij im Jisōs Kraist n̄an n̄a im kajjojo iaad. Jān metak bar, metak, dān in kōmejaaļaļ ko, jar ko jab kwaļo̧ki, im jar ko kar uwaaki, iaar lo kōjatdikdik, iakwe, jeorļo̧k bōd, tūriam̧o, im jouj. Iaar ekkatak bwe kaajiriri ej kōn iakwe. Iaar ekkatak n̄an kaorōk bōk m̧ōttan kwojkwoj eo. Iaar ekkatak bwe iaar jab lukkuun in kar jōbwābwe—Iaar aikuj in bar ro̧o̧l n̄an iaļ eo me iaar jōbwābweļo̧k jān e. Ke iaar lukkuun m̧ool in ukweļo̧k jān jerawiwi ko aō im kar ekkatak n̄an pedped ioon im wōr tōmak ilo Kraist, Eaar kōro̧o̧ltok eō n̄an oror eo An im kar kōjeraam̧m̧an mour eo aō eļap jān jon̄an. Pinmuur eo an Jisōs Kraist ej lukkuun m̧ool, im An jouj ebwe n̄an kōjwōj aolep (lale Ether 12:27).