Kwojjab Maron̄ Ekairir Kōn Ukweļo̧k
N̄an erom em̧m̧anļo̧k, iaar aikuj in ukōt jekjek in kilen aō ukweļo̧k.
“Amen.”
Ikar jillo̧k wōt ke kwojkwoj eo ej letok letak. Ij kōm̧m̧ane juon jar, kōllaajrak n̄an Jemedwōj Ilan̄ men ko iaar kōm̧m̧ane ilo wiik eo ej jem̧ļo̧kļo̧k, wāween ko imaron̄ kar em̧m̧anļo̧k ie. Ij kallim̧ur n̄an oktak. Ij ļōmņak kōn Rilo̧mo̧o̧r eo. Ij bōk kwojkwoj eo. Innām ij kōm̧m̧ane ejja men eo wōt wiik eo tok juon, kanooj bar āliji ejja men ko wōt.
Ium̧win juon iien aitok, ej ta eo iaar ļōmņak kwojkwoj eo ekar: ļōmņak kōn Rilo̧mo̧o̧r eo, ukweļo̧k, im kallim̧ur bwe wiik in enaaj kar oktakļo̧k.
Eaar jab alikkar aō jeļā bwe jekjek in eaar jab jipan̄ eō eddōkļo̧k. Kajjojo wiik ekar jab lukkuun in oktak jān eo im̧aanļo̧k. Jar ko aō make raar ālij in men wōt im jakutkut. Iaar kwaļo̧k wōt ļōmņak ko renana n̄an armej ro me ekoļap aer kōnono ilo jibbon̄ ilo tūrein eo. Ekab kanooj ļap wōt aō alooj TV ilo iien pād bajjōk ko aō ālkin jerbal. M̧wil kein raar āinwōt jab oktak, im jekdo̧o̧n n̄e ekar jab em̧m̧an aō en̄jake kaki, iaar jab kanooj jeļā bar ta n̄an kōm̧m̧ane n̄an julo̧k. Juon men eaar alikkar bwe ejako. Ikar jab jeļā ta eo.
Uwaak eo
Ilo iien kweilo̧k eo eļap iaar lo m̧ōttan eo ekar jako. Būreejtōn Dallin H. Oaks, Rikakpilōklōk eo Kajuon ilo Būreejtōnji eo Kein Kajuon, ekar katakin: “Juon bar jetōbin lōn̄aj im eddōkļo̧k ej iminene eo n̄an ukweļo̧k, men̄e bōd ko reddik. Kain ukweļo̧k rot in emaron̄ waļo̧k kajjojo wiik in ad bōk kwojkwoj eo.”1
Ilo iien eo em̧ōkaj, eaar alikkar etke eaar wōt aō inepata: Iaar ukweļo̧k wōt ilo Jabōt ko. Jān wōt kejekļo̧kjeņ ioon jerawiwi ko aō ilo jejjo wōt minit ko an kwojkwoj eo, iaar kōtļo̧k eō make n̄an eddōkļo̧k ilo kōnōbarbar ilo aolepān wiik eo, ilo jem̧ļo̧kin bōbare oktak eo emaron̄ kar kōm̧m̧an.
Katak eo an Būreejtōn Oaks eaar jipan̄ eō kile jilu wāween ko imaron̄ in kobaiktok m̧ōttan in ejako n̄an ukweļo̧k eo aō.
Ta eo Watōke āinwōt Jerawiwi
Pinmuur eo an Jisōs Kraist ej n̄an aolep men, mekarta iminene ko renana ak kōm̧ad ko an mour in kanniōk—ilo m̧ool aolep men me remaron̄ in bōbrae kōj jān eromļo̧k āinwōt E. Rilo̧mo̧o̧r eo emeļeļe bwe jekdo̧o̧n men ko reddik tata remaron̄ āliktata bōkļo̧k kōj jān iaļ eo An, kōn menin E ekōņaan jipan̄ kōj anjo̧ ioon men ko barāinwōt. N̄an kōm̧m̧an bwe En kōm̧m̧ane, iaar jokāālet n̄an jino ļōmņak kōn men ko ilo juon wāween eoktak—āinwōt men ko me raar dāpij eō jān epaakeļo̧k Rilo̧mo̧o̧r eo.
Ilo tōre in kar jipan̄ eō lo jab wanōk ko aō eļapļo̧k aer alikkar im kar jipan̄ eō kōļapļo̧k aō būki ilo m̧ool. Iaar en̄jake juon aorōk eļapļo̧k n̄an juļo̧ki ekar itok ippān tok kōn juon lo̧udin̄din̄ ekāāl me ej itok jān jeļā bwe Kraist emaron̄ jipan̄ eō ilo menin. Ekar alikkar bwe eļan̄n̄e ikōņaan joļo̧k iminene kein, ejjab bwe wōt jar kaki juon alen juon wiik. Ij aikuj in kapilōk ippān Irooj raan otemjej.
Karuwaineneiktok Jipan̄ eo an Rilo̧mo̧o̧r eo
Ukweļo̧k raan otemjej ej kōtļo̧k bwe jen tipdiki eddōkļo̧k eo ad ilo m̧ool ilo ad ribootļo̧k n̄an Jemedwōj Ilan̄. Eļapļo̧k an maron̄ lo ia eo m̧ōjņo̧ ko ad rej pād ie im kajjitōk Ippān kōn jipan̄ eo ejeno̧lok ilo ad kappukōt jeorļo̧k bōd. Kōn jelm̧ae men kein reddik me rej kōttoļo̧k eō jān Rilo̧mo̧o̧r eo aolep raan, jar ko aō em̧ōj aer kar oktak, im barāinwōt m̧akūtkūt ko aō. Ijello̧kin pād wōt ilo iaļ in iminene eo aō ilo an wiik eo eļļāļo̧k, ejjab jem̧ļo̧k aō en̄jake juon ikdeelel n̄an em̧m̧anļo̧k. Ij en̄jake kareel eo an Jetōb ilo jokāālet ko aō. Eļapļo̧k kajoor eo ippa n̄an “kālet kālet eo ejim̧we,”2 eo ijeļā ej itok kōn kajoor in kōmaron̄ eo an Pinmuur eo an Kraist.
Men̄e eaar wōr aō jibadbad ko rem̧m̧an ke iaar kajjieon̄ jerbale jerawiwi ko aō kōn n̄a make, pedped ioon Anij ilo aolepān wiik eo ej ta eo eaar kōm̧m̧ane aolep oktak ko. N̄e ij kōm̧m̧ane menin, ij en̄jake An epaake eō n̄e ij kajjieon̄ in oktak; ejako aō en̄jake āinwōt n̄e Ej kōttar ilo jem̧ļo̧k in tanōļ eo elukkuun in aitok.
Juon Kōļmenļo̧kjeņ eo Ekāāl kōn Kwojkwoj eo
Āinwōt an Būreejtōn Oaks kar kōmeļeļeik, kwojkwoj ejjab pād ie ukwļo̧k—ej juon bun̄tōn ej waļo̧k im bar waļo̧k wiik otemjej. Ej juon iien n̄an ad etale wiik eo ad, kwaļo̧k kam̧m̧oolol n̄an Rilo̧mo̧o̧r eo, im bar kallim̧ur n̄an kōm̧m̧an em̧m̧anļo̧k. Ke ij ukweļo̧k raan otemjej, kwojkwoj eo ej letok juon meļeļe ekāāl n̄an n̄a. Ejako aō aikuj in kanooj kobrak jekjek in ukweļo̧k eo aō n̄an 10 minit. Ijello̧kin, ij lukkuun ļōmņak kōn en̄taan eo an Kraist im bwilōn̄ kōn iakwe eo im tūriam̧o eo An ejjeļo̧k jem̧ļo̧kin. N̄e ij bōk m̧ōttan pilawe eo im dān eo, em̧ool aō en̄jake karreo im pojak n̄an em̧m̧anļo̧k jidik wiik eo tok juon.
Ukweļo̧k ilo wiik eo ej letok n̄an kōj juon iien n̄an kam̧m̧oolol kōn kwojkwoj eo kōn an kabwilōn̄lōn̄. Meļeļe bwe ukweļo̧k ej juon jekjek raan otemjej ekar kōkajoorļo̧k eō n̄an jelm̧ae jabwānōk ko aō kōn peran im kije. Ejako aō en̄jake āinwōt ij makeļo̧k kōn inepata ko aō. Ijello̧kin kar en̄jake lokjak im ebbweer ilo iien ko, imaron̄ in bar akjo̧kwetok kōjatdikdik eo im lan̄lōn̄ eo me iaar en̄jake ilo peptaij.