Aduna Koy Barko nga Himoon

Ni Elder Juan Pablo Villar

Sa Seventy

Ang kasinatian ni Nephi nakatabang nako nga makakita unsaon pag-atubang ang mga hagit sa akong kaugalingong kinabuhi.

Sa dihang gisultihan nako ang akong mga ginikanan nga gusto kong moserbisyo og misyon, wala sila malipay. Ang akong magulang, si Ivan, ug ako mao lang ang mga miyembro sa Ang Simbahan ni Jesukristo sa mga Santos sa Ulahing mga Adlaw sa among pamilya. Mipasakop ko sa dihang 18 anyos ko, ug karon, paglabay sa usa ka tuig, nakahukom ko nga moserbisyo og full-time. Bisan og ang akong mga ginikanan sa katapusan nagkauyon nga tugutan ko nga moadto, ang akong Papa mipasidaan nga kon mouli na ko, dili siya makagarantiya nga mopadayon siya sa pagbayad sa akong matrikula [tuition] sa kolehiyo.

Hinoon, nasayud ko nga kon moserbisyo ko, ang Ginoo motabang kanako.

Sa akong tibuok misyon, nalipay ko sa dihang nakakita ko sa mga tawo nga mihangup sa ebanghelyo ni Jesukristo ug miuswag padulong sa kaluwasan. Sa dihang nakauli na ko, misugod ko pag-usab sa akong pagtuon. Apan wala madugay ang akong amahan miingon, sama sa iyang gipasidaan, “Dili na ko makabayad pa.”

Sa unsang paagi nga nahitabo kini? Naghunahuna ko. Miserbisyo ko og misyon. Gibuhat nako unsay gusto sa Ginoo nga akong buhaton. Nganong nahitabo man kini kanako?

Pagtuon ug Pagtrabaho

Dayon nakahinumdom ko nga dunay nabasahan diha sa Basahon ni Mormon. Si Nephi, kinsa misunod sa tanang kasugoan, gisugo sa paghimo og barko, butang nga wala pa gayud niya mahimo sukad (tan-awa sa 1 Nephi 17:8, 49–51). Gibati nako nga daw aduna koy “barko” nga himoon. Dako kaayo kadto nga problema nga wala ko kahibalo unsaon sa pagsulbad, busa nag-ampo ko alang sa inspirasyon.

Sa wala madugay si Ivan nakigsulti kanako. “Juan Pablo, nakadungog ko nga ang atong amahan dili na mobayad sa imong matrikula,” miingon siya.

“Tinuod kana,” mitubag ko. “Morag wala na gyud ko ani!”

Yano ang tubag ni Ivan, apan nakadasig kini kanako. “Nasayud ka ba nga pwede ka nga magtuon ug magtrabaho?” miingon siya. “Nianang paagiha, makahimo ka sa pagbayad sa imong matrikula.” Mao kadto ang unang higayon nga nakaamgo ko nga makahimo ko sa duha! Wala madugay nakakita ko og part-time nga trabaho nga nakatugot nako sa pagpadayon sa akong pagtuon.

Naghunahuna ko pag-usab mahitungod ni Nephi ug sa barko: “Karon ako, si Nephi, wala … mihimo og barko subay sa paagi sa mga tawo; apan ako mihimo niini sumala sa paagi diin gipakita sa Ginoo kanako” (1 Nephi 18:2).

Kon naminaw pa ko sa akong kaugalingon, hunungon na unta nako ang akong edukasyon. Apan ang Ginoo midasig kanako, pinaagi sa mga pulong sa akong igsoon, sa pagpadayon. Usahay kon aduna kitay mga hagit sa atong kinabuhi, maghunahuna kita nga ang Ginoo wala mopanalangin kanato. Apan klaro nako karong nakita kon sa unsang paagi Siya mipanalangin kanako og oportunidad nga molambo ug motubo.

Ayaw Pag-undang!

Samtang estudyante, naminyo usab ko. Dayon, sa dihang hapit na nako makompleto ang akong kurso, nakaamgo ko nga dili ko ganahan sa akong gitun-an. Gusto ko nga moundang. Apan miingon ang akong asawa, “Dili ka mahimong moundang. Wala ka masayud unsay giandam sa Ginoo kanimo, mao nga kinahanglan imong tiwason.”

Naghunahuna na usab ako ni Nephi. Bisan kon gipasipad-an siya sa iyang mga magulang, wala siya moundang. Hinoon, si Nephi midangup sa Dios ug midayeg Kaniya. “Wala ako magbagulbol batok sa Ginoo tungod sa akong mga kasakit,” miingon siya. Sa katapusan gibuhian siya, ug “nahinabo nga ako, si Nephi, nangulin sa barko, nga kami milawig pag-usab padulong sa gisaad nga yuta.

“Ug nahinabo nga human kami molawig sulod sa daghan nga mga adlaw kami miabut sa gisaad nga yuta” (1 Nephi 18:16, 22–23).

Naminaw sa tambag sa akong asawa, akong gihuman ang akong kurso. Apan misugod ko pagtrabaho sa lahi nga linya sa panarbaho.

Paglabay sa pipila ka tuig, aduna koy kusog nga impresyon nga kinahanglan nakong palamboon ang akong edukasyon, ug akong gibati nga kinahanglan ko nga moeskwela sa graduate school. Sa dihang gisugdan nako ang proseso sa pag-apply, usa sa unang mga butang nga gipangutana ko mao nga kon duna ba koy bachelor’s degree. Nianang higayuna, ang mga pulong sa akong asawa dali nakong nahinumduman: “Wala ka masayud unsay giandam sa Ginoo kanimo, mao nga kinahanglang imong tiwason.” Kon wala nako humana ang akong bachelor’s degree, dili unta posible kanako ang pagkab-ut sa akong master’s degree.

Ang mga Propeta Mogiya Kanato

Matag higayon nga mobasa ko sa Basahon ni Mormon, mangutana ko sa akong kaugalingon, Unsay gusto niining propeta gikan sa liboan ka tuig na ang milabay nga akong mahibaloan ug gamiton sa akong kinabuhi ug sa kinabuhi sa akong pamilya? Si Nephi, sama pananglit, mitudlo kanako nga kinahanglang andam kita kon ang Ginoo motawag kanato, mosalig Kaniya, ug matinud-anong moserbisyo Kaniya.

Nasayud ko sa walay pagduha-duha nga kon ang Ginoo motawag kanimo, moandam Siya sa agianan, sama sa Iyang gibuhat alang ni Nephi (tan-awa sa 1 Nephi 3:7).