O Se Liua Tele o le Loto
Faafetai i le Togiola a Iesu Keriso, e le gata ina mafai ona faamamaina i tatou mai agasala; e mafai foi ona faamaloloina i tatou mai le nofosala.
Ona o le pau o Atamu, na oo mai ai ma’i ma le agasala i le lalolagi. E mafai ona oo uma i le oti i o laua malosiaga patino. I ma’i uma, atonu e leai se tasi e matua taatele pe lofituina e pei o le kanesa. I nisi atunuu, e silia ma le tasi vaetolu o le faitau aofai o le a atiina ae se ituaiga o kanesa, ma e afua mai ai le toeitiiti tasi o vae fa o maliu uma.1 O le kanesa e masani ona amata i se sela e tasi, e matua laitiiti lava ua nao se meavaai faapitoa e mafai ona vaaia ai. Ae e mafai ona faatupulaia ma vave ona sosolo.
O tagata ua aafia i le kanesa e faia se togafitiga ina ia mafai ai ona faamalolo mai le kanesa. O le faamaloloina atoatoa o lona uiga ua le toe i ai se faamaoniga o iloa atu o le mai. Ae ui i lea, e vave lava ona faailoa mai e fomai faapitoa e ui lava e mafai ona faamaloloina se gasegase, ae e le faapea ua manuia o ia.2 O lea, e ui lava o le faamalologa e tuuina mai ai le toomaga ma le faamoemoe, o gasegase o le kanesa e i ai lava le faamoemoe mo se mea e sili atu nai loo le faamalologa — latou te faamoemoe ina ia faamaloloina. E tusa ai ma se tasi o punaoa, “O le tuuina atu o se tagata ua faamaloloina mai le kanesa, e tatau ona faatali ma vaavaai pe toe foi mai le kanesa, o lea la, o le taimi o le vaega taua. Afai e tumau pea se gasegase i le faamalologa mo ni nai tausaga, e mafai ona faapea ua faamaloloina le kanesa. E mafai e kanesa patino ona toe oso ina ua mavae le tele o tausaga o le faamalologa.”3
Faamai ma le Agasala
E tusa ai ma le matautia o le kanesa i le tino, o le agasala e sili atu ona ogaoga i le faatamaiaina o le agaga. O le agasala e masani lava ona amata laitiiti—o nisi taimi e itiiti tele ua le iloa—ae e mafai ona vave faateleina le tuputupu ae. Na te faaleaga, faavaivaia, ona faaumatia lea o le agaga. O le agasala o le mafuaaga autu lea—e moni lava na o le pau lea o le mafuaaga—o le oti faaleagaga i foafoaga uma. O le togafitiga mo le agasala o le salamo. O le salamo moni e 100 pasene le aoga i le tuuina o le tagata agasala i le faamalologa, po o le aumaia o se faamagaloga o agasala. O lenei faamalologa ua ofoina mai ai le toomaga ma le olioli i le agaga. Ae peitai, o le mauaina o se faamagaloga o agasala ma le saoloto mai i ona auga ma aafiaga e le faapea o lona uiga ua matua faamamaina atoatoa le tagata agasala. E i ai se mea e uiga i le loto o le tagata pa’u lea e mafai ai pe gauai atu i le agasala. O lea la, o le agasala e mafai ona toe tupu, tusa lava pe ua tele tausaga talu ona mavae le faamagaloga. O le tumau i le faamagaloga, pe i se isi faaupuga, o le faatumauina o le faamagaloina o agasala, e taua tele mo le manuia atoatoa.
Faamamaina ma Faamaloloina
E fesoasoani lenei talafaatusa tatou te malamalama ai i le faaleagaga, e le gata ina tatou mama mai agasala, ae ia faamaloloina foi i tatou mai le nofosala. O le taua lea e i ai o tatou loto e faia mea lelei e faasaga i lo tatou natura e fai mea leaga e mafai ona faavaivai tagata. Afai tatou te faatuatua, o le a tatou manumalo e le faapea ona ua tatou tuu faamalosi o tatou loto i luga o lo tatou natura, ae ona ua tatou gauai atu o tatou loto i le Atua ma ua suia ai lo tatou natura.
Na aoao mai le Tupu o Peniamina, “Ona o le tagata natura o se fili i le Atua, ma sa faapea lava mai le pau o Atamu, ma o le a faapea lava, e faavavau faavavau lava, vagana ai ua gauai atu o ia i uunaiga a le Agaga Paia, ma tuu ese le tagata natura e ala i le togiola a Keriso le Alii” (Mosaea 3:19). I le tali atu i lenei aoaoga ma isi, na tatalo ai le nuu o Peniamina, “E, ia alofa mutimutivale mai ia, ma faaaoga le toto togiola o Keriso ina ia mafai ai ona matou maua le faamagaloga o a matou agasala, ma mafai ona faamamaina o matou loto” (Mosaea 4:2; ua faaopoopo le faamamafa). Ina ua uma ona latou tatalo, na tali mai le Alii i a latou talosaga e lua vaega. Muamua, “sa afio ifo i o latou luga le Agaga o le Alii, ma faatumuina i latou i le olioli, ina ua latou mauaina se faamagaloga o a latou agasala, ma ina ua latou maua le filemu o le mafaufau” (Mosaea 4:3).
O le vaaia o lona nuu ua “faamaloloina,” sa uunaia ai i latou e le tupu o Peniamina i se vaifofo atoatoa e ala i le aoaoina o i latou i le ala e tumau ai i le faamagaloga (tagai Mosaea 4:11–30). “Afai tou te faia lenei mea,” na ia folafola atu ai “o le a outou olioli pea, ma faatumuina i lealofa o le Atua, ma etaofi pea le faamagaloina o a outou agasala” (Mosaea 4:12).
Sa talitonu tagata ma noatia i latou lava i upu a le Tupu o Peniamina, lea na tali mai ai le Alii i le vaega lona lua o la latou tatalo—ina “ia mafai ona faamamaina [o latou] loto.” I le lotofaafetai ma le viiga, sa alalaga atu ai tagata, “O le Agaga o le Alii Mamana Aoao. ua ia faia se liuga tele i totonu o i matou, po o i totonu o o matou loto, ua le toe i ai so matou manao e fai mea leaga, ae ia faia mea lelei e le aunoa” (Mosaea 5:2). Na faamalamalama mai e le Tupu o Peniamina faapea o lenei suiga tele o lona uiga ua fanauina i latou i la le Atua (tagai i le Mosaea 5:7).
“E Faapefea Ona Fai?”
Na aoao mai le perofeta o Alema e tatau ona tatou salamo uma ma toe fanauina—fanauina i la le Atua, ua suia i o tatou loto (tagai i le Alema 5:49). A tatou salamo pea, o le a aveesea e le Alii a tatou agasala uma ma o le a Ia aveesea mea e masani ai pe faatagaina ai ona tatou agasala. Peitai, i upu a Enosa, “Le Alii e, ua faapefea ea ona faia lenei mea?” (Enosa 1:7). O le tali e faigofie, ae e loloto ma faavavau. Ia i latou o e ua faamaloloina mai soo se tulaga, faaletino po o le faaleagaga, na tautino mai le Alii, “Ua faamamaina oe i lou faatuatua” (tagai Mareko 5:34; Enosa 1:8).
O le suiga tele o le loto na oo i ai Alema na faia “e tusa ma lona faatuatua,” ma ua suia loto o e na mulimuli ia te ia a o latou “tuu atu lo latou faalagolago i le Atua moni ma soifua” (Alema 5:12, 13). O loto o le nuu o le Tupu o Peniamina na “liua o outou loto e ala i le faatuatua i lona suafa [o le Faaola]” (Mosaea 5:7).
Afai tatou te maua lenei ituaiga o faatuatua, ina ia mafai ona tatou faatuatuaina le Alii ma o tatou loto atoa, e tatau ona tatou faia le mea e tau atu i le faatuatua ona fai lea o le mea e tau atu i ai le faatuatua. Faatasi ai ma le tele o mea e taitai atu ai i le faatuatua, i le matalalaga o lenei suiga o le loto, ua faamamafaina mai ai e le Alii le anapogi, tatalo, ma le afioga a le Atua. Ma e ui lava o le faatuatua e taitai atu ai i le tele o mea, o le salamo o lona fua muamua lea.
Mafaufau i fuaiupu nei e lua mai le tusi a Helamana o loo taua ai nei mataupu faavae. Muamua, tatou te faitau i se nuu o e sa “anapopogi ma tatalo soo, ma faasolo atili mausali ma atili mausali ai i le faatuatua ia Keriso seia oo ina faamamaina ma faapaiaina o latou loto, o le faapaiaga lea e oo mai ona o lo latou tuu atu o o latou loto i le Atua” (Helamana 3:35). Ona tatou aoao lea mai ia Samuelu le perofeta sa Lamana, “O tusitusiga paia, ioe, o valoaga a perofeta paia, ua taitai . i le faatuatua i le Alii, ma i le salamo, le faatuatua ma le salamo lea ua aumai ai se liliuga o le loto” (Helamana 15:7).
Faalagolago i le Atua
O i e tatau ona tatou malolo ai ma faailoa atu o lenei suiga tele ua tatou fai atu ai ua faia ia i tatou; e le o faia e i tatou. E mafai ona tatou salamo, suia a tatou amioga, o tatou uiga, e oo lava i o tatou manaoga ma talitonuga, ae e le oo i ai lo tatou mana ma le malosi e suia ai lo tatou natura. Mo lenei suiga tele, tatou te matuai faalagolago atoatoa ai i le Atua Silisili Ese. O Ia o Le e faapaiaina malie o tatou loto ma suia lo tatou natura “pe a uma mea uma e mafai ona tatou faia” (2 Nifae 25:23). O lana valaaulia e tumau ma mautinoa: “Salamo, ma o mai ia te au ma le faamoemoe atoa o le loto, ma o le a ou faamaloloina ai [outou]” (3 Nifae 18:32; ua faaopoopo le faamamafa).
O le aafiaga o le faamaloloina mai le agasala o le mafai lea ona tatou “suia mai lo [tatou] tulaga faaletino ma pa’ū, i se tulaga o le amiotonu. avea ma ona atalii ma afafine; Ma faapea ona [tatou] avea ma tagata fou” (Mosaea 27:25, 26). E faasusulu mai o tatou foliga le Malamalama o Keriso. E le gata i lea, ua tau mai e tusitusiga paia ia i tatou e faapea “e le agasala se tasi o e ua fanau mai i le Atua” (1 Ioane 5:18). E le faapea ona e le mafai ona tatou faia se agasala, ae ona o le taimi lenei o lo tatou natura o le aua nei agasala. O se suiga tele lena, e moni lava.
E tatau ona manatua o le iloaina o se suiga tele o le loto o se faagasologa i le aluga o taimi, ae le o se vaega i le taimi. O le suiga e masani lava ona faifaimalie, o nisi taimi i ni vaega itiiti ua tau le mailoa, ae e moni, e mamana, ma e tatau ai.
Afai e te lei oo i se suiga tele faapea, ou te fesili atu ia te oe: Ua e salamo ea ma maua se faamagaloga o au agasala? E te suesue i tusitusiga paia? Po o e anapogi ma tatalo e le aunoa, ina ia mafai ona e atili mausali ma atili mausali i le faatuatua ia Keriso? E lava lou faatuatua e faalagolago ai i le Alii ma lou loto atoa? Pe o e tu mausali ea i lena faatuatua? O e vaavaaia o ou mafaufauga, upu, ma galuega ma tausia poloaiga a le Atua? Afai e te faia nei mea, o le a e olioli pea, ma faatumuina i le alofa o le Atua, ma faatumauina pea le faamagaloga o au agasala. Ma afai e te tumau i le faamagaloga, o le a faamaloloina oe, manuia, ma suia!
E ia Iesu Keriso le mana e faamamaina ai i tatou mai a tatou agasala ma faamalolo ai foi i tatou i a tatou agasala. E malosi tele o ia e laveai, ma i lena iuga, ua malosi ai o Ia e suia. Afai o le a tatou gauai atu o tatou loto ia te Ia, faaaoga le faatuatua e ala i le faia o suiga uma e mafai ona tatou faia, o le a Ia faaaogaina lona mana e aumai ai lenei liuga tele o le loto (tagai Alema 5:14).