Berglind Guðnason
Árnessýsla, Aiselani
Berglind (agavale) ma lona uso o Elín (taumatau). A o i ai Berglind i le faavauvau e sili ona loloto na feagai ai o ia, sa ia lagonaina sa le mafai ona ia toe ola. E ala i le talanoa atu e uiga i ona tauiviga i aiga ma uo, ua ia maua ai le faamalologa faaleagaga ma faalelagona e ala i meafaigaluega ua saunia e le Tama Faalelagi.
Mindy Selu, Pueata
Sa ou feagai ma le atuatuvale talu mai le 13 o ou tausaga. I se tasi taimi, sa matuai leaga mea uma ma sa oo mai le lagona o le taumafai e faamuta lou lava ola. Sa ou lagona le leai o se faamoemoe i lena taimi. Sa ou mafaufau, “O le a ou le fiafia lava. O le a ou le ausiaina lava se mea.”
Sa i ai se taimi na ou manatu ai o le tuua o le Ekalesia o le tali lea i ou faafitauli aua na ou matuai lagona lava le leai o se faamoemoe e uiga i mea uma. E faigofie lava ona faia le mea e le tatau ona e faia i Iselani. E matuai laitiiti lava le Ekalesia iinei. Sa na o matou ma nai ou tei i a matou vasega i le Ekalesia ao tuputupu ae. Sa ou lagona le tuuatoatasi ma mo se taimi sa ou le fiafia e alu i le lotu.
O le toatele o tagata i Iselani sa faatuatuanai mea tau lotu. E amata ona inupia tagata a o laiti. Sa ou maua i lena mea, ma sa ou le toaga i le lotu mo sina taimi i lou olaga. Ou te le mitamita i lena mea, ae o se vaega o lou aafiaga ma ua ou aoao mai ai. Sa ou suesueina se lauga a Elder Jeffrey R. Holland ma sa ou fiafia i lana saunoaga: “O le tuanai e tatau ona aoao mai ai, ae le o le ola ai. … Pe a tatou aoaoina mea e tatau ona tatou aoaoina , ona tatou tepa atu lea i luma, tatou manatua o le faatuatua e masani lava ona faasino atu i le lumanai.”1
I se tasi aso ao ou matuai mafatia lava, sa ou faitauina ai lou faamanuiaga faapeteriaka. A o ou faitauina, sa ou iloa ai e i ai so’u lumanai. O loo i ai se fuafuaga a le Atua mo au, ma e alofa moni lava o Ia ia te au. O le alu i le lotu, tagofia o le faamanatuga, faitauina o tusitusiga paia, ma le tatalo ua aumaia ai le tele o le malamalama ma le fiafia i lou olaga. Sa vave ona ou iloaina, “E fesoasoani moni lava lenei mea ia te au.” O iina na ou iloa ai na ou manaomia i taimi uma le talalelei i lou olaga. I le ma’ea ai o mea uma sa ou oo i ai, ou te iloa o le talalelei na faasaoina lou ola, ma ou te fiafia tele i lena mea.
O le talanoa i lou atuatuvalega ma aiga ma uo sa fesoasoani tele. Sa faapea foi ona taitaiina atu ai i isi fesoasoaniga. Ou te lei manao e inu ni fualaau pe alu i fono faufautua. Sa ou tau atu pea ia te au lava, “Ua ia te au le Atua.” Ae e saunia e le Atua le tele o isi meafaigaluega, e pei o vailaau ma vaifofo, mo i tatou e faaaoga e faaopoopo i mea faaleagaga.
Ina ua amata ona ou faitauina au tusitusiga paia i aso uma ma latalata atili atu ai i le Atua e ala i le tatalo, sa ou mauaina le tele o faamanuiaga ma faaaliga o lou faamoemoega o le fesoasoani atu i isi. Ou te lagona e pei o le toatele o i tatou e feagai ma faafitauli tau i le soifua maloloina faalemafaufau ma tatou te taumafai e nana. O lou atuatuvale ma ou tauiviga ua aoaoina ai au e sili atu pe a talanoa sao ma fesootai atu i isi. O lau uo faatoa talanoa mai talu ai nei lava ia te au e uiga i lona tauiviga ma le atuatuvale. Sa ma talanoa i ai ma sa ma malamalama moni lava le tasi i le isi.
Tatou te le matauina i taimi uma mea o loo tauivi ai isi, ae ou te savali solo i nisi o taimi ma vaai i isi tagata ma iloa ai e silafia e le Atua i tatou taitoatasi. E alofa o Ia ia i tatou ma silafia lelei mea o loo tatou feagai ai. Ma e mafai ona tatou fesoasoani le tasi i le isi.
I ou tauiviga ma le atuatuvale, ua ou iloa ai fesili, “O le a se mea e mafai ona ou aoao mai i lenei tofotofoga?” nai lo o le “Aisea ua oo mai ai ia te au lenei tofotofoga?” Ou te fiafia i le Eteru 12:27, lea e fai mai o mea vaivai e mafai ona avea ma mea malolosi pe afai tatou te faatuatua ia Iesu Keriso. O se faamafanafanaga ia te au i taimi uma.
Sa tatou filifili uma e o mai iinei i le lalolagi. Sa tatou iloa o le a tatou mafatia i tofotofoga. Ma le faamaoni o le mea lena e sili ona taua ai le olaga. Aua ua tatou iloa o loo i ai mea lelei o le a oo mai. Ua tatou iloa afai tatou te mulimuli i le Faaola i vaega faigata uma, e mafai ona tatou maua le ola e faavavau ma nei faamanuiaga uma o loo faatalitali mai mo i tatou.
Ua ou maitauina ma le mautinoa le ala ua suia ai au i lou atuatuvale. E moni le Togiola a le Faaola, ua suia lou loto, ma ua ou malosi atu ai. Ou te lagona ua ese lou tagata nai lo le tagata na ou i ai. E maitau e tagata ma faapea mai, “Ua e sui.” Na fai mai se tasi o teine mai le aoga, “Ua ou iloa se eseesega ma se malamalama ia te oe.” E ese lava aua foi e le o ia o se tagata o le Ekalesia, ma ma te lei talanoa moni lava muamua.
A o ou i ai i se tulaga sili ona leaga o ou atuatuvalega, sa tau mai e tagata ia te au, “O le a faasolo ina lelei.” Sa tele ina ou le lava faalogo atu i ai, ae e ui ina pei e ese lava, ae e moni.
Ae e tatau ona e manao ina ia e lelei atili. Ua ou aoaoina e le mafai ona e faamoemoe ia e manuia e ala i le le faia o se mea. E tatau ona e manao e te fiafia ma talitonu o loo ia te oe le gafatia ma se lumanai. E taua le manatua o loo alofagia oe e le toatele o tagata, e aofia ai lou Tama Faalelagi. O loo i ai uma iina e fesoasoani ia te oe.
Ou te lei mafaufauina lava o le a ou fiafia e pei ona ou i ai nei. O nisi aso o loo ou tauivi pea, ae faatasi ai ma meafaigaluega ua tuuina mai e le Tama Faalelagi ia te au, e mafai ona ou taulimaina. O le taimi nei, pe a ou lagona lou see atu i le atuatuvale, ou te fai ifo ia te au lava e alofagia au, o loo i ai tagata ou te talanoa i ai, ma o le a lelei mea uma.
O le feagai ai ma le atuatuvale ua atili ai ona iloa e Berglind le auala e mafai ona tatou fesoasoani ai i le tasi ma le isi ao feagai ma luitau. “O loo silafia e le Atua tatou taitoatasi, Na te alofa ia te i tatou, ma Na te silafia lelei mea o loo tatou feagai ai. Ma e mafai ona tatou fesoasoania’i.”
Ua vaaia e Berglind se suiga ia te ia lava e ala i ona luitau. “E moni le Togiola a le Faaola,” o loo ia fai mai ai. “Ua suia lou loto, ma ua ou malosi atu. Ou te lagona ua ese lou tagata nai lo le tagata na ou i ai muamua.”
“A o amata ona ou faitauina atili au tusitusiga paia i aso uma,” o le tala lea a Berglind, “Ua ou mauaina le tele o faamanuiaga ma faaaliga o lo’u faamoemoega o le feasoasoani atu i isi. Ou te fiafia i le Eteru 12:27, lea e fai mai o mea vaivai e mafai ona avea ma mea malolosi pe afai tatou te faatuatua ia Iesu Keriso. O se faamafanafanaga ia te au i taimi uma.”