O le Faaaogaina o le Igoa Atoa o le Ekalesia sa Faigata ae sa Aoga Lava
O le mulimuli ai i faatonuga a le perofeta na foliga mai e faigofie, ae na iu ai ina sili atu se taumafaiga e faia nai lo le mea na ou faamoemoeina.
Ina ua saunoa Peresitene Nelson e uiga i le faaaogaina o le igoa sao o le Ekalesia i le konafesi aoao ia Oketopa 2018, sa matua manino lana savali ia te au: “ O le poloaiga a le Alii. …
“… O le aveesea o le suafa o le Alii mai le Ekalesia a le Alii o se manumalo tele lea mo Satani” (“O Le Igoa Sa’o o le Ekalesia,” Liahona, Nov. 2018, 87, 88).
Sa ou iloaina e tatau ona ou toe mafaufau i le auala e taulimaina ai a’u talanoaga ma i latou na siomia a’u, e aofia ai ni tagata faatau i la’u galuega o e na masani ona valaauina au o se “Mamona” ma se auai i le “Ekalesia Mamona.”
Ona o le tautinoga e faaaoga le igoa atoa o le Ekalesia, sa ou faatali mo le isi avanoa e faailoa ai lou auai i le O Le Ekalesia a Iesu Keriso o le Au Paia o Aso e Gata Ai. E sa’o lava, na toe oo mai lena avanoa, i se tulaga faapisinisi. “O outou na o Mamona o ni tagata agalelei,” sa tau mai e se ono avea ma tagata faatau. “Ia, faafetai lava,” sa ou tali atu ai. “I le avea ai ma tagata O Le Ekalesia a Iesu Keriso o le Au Paia o Aso e Gata Ai, matou te talitonu o i tatou uma lava o uso ma tuagane.” Ona faaauau lea o le talanoaga ia te ia ma isi tagata uma e talanoa e uiga i le agalelei o “Mamona.”
E ui ina sa ou faia la’u vaega i le tauina o le igoa atoa o le Ekalesia, ae sa ou lagonaina lava se mea e le’o atoatoa. Sa vaai pea au uo ma paaga ia te au o se vaega o le “Ekalesia Mamona” ma e le’i faapea o se soo o Keriso, po o se ua avea o se sui o le Ekalesia toefuataiina a Keriso.
Pe Na Aoga le Taumafaiga?
I le aluga o isi fegalegaleaiga e uiga i lo’u faatuatuaga, sa ou lagonaina le lofituina ona o le faafaigata o le ta’uina faafia o le igoa atoa ma le umi o le Ekalesia i le talanoaga lava lea e tasi. O tagata uma na ou talanoa i ai na pei o faalia ni foliga ese. Ma o le talanoaga e taulai pea lava i “Mamona.”
Sa ou taumafai e fai ni lagona masani i a’u fegalegaleaiga. Ae o lenei mea na iu ina sili atu ona faigata nai lo le mea sa ou faamoemoeina, aemaise lava i tagata taitoatasi ou te lei fia faaitaina. Ou te lei manao e foliga ou te le malamalama pe e le taua le ola i lo’u faatuatuaga, ae ou te lei manao foi e foliga ita, talu ai o le toatele o nei tagata sa latou valaauina muamua au “Mamona,” ma sa ou taliaina. Sa ou faalogo foi i le toatele o tagata o le Ekalesia o loo valaauina pea i latou lava ma isi tagata o le Ekalesia o “Mamona” i fonotaga eseese ma isi fegalegaleaiga.
Sa oo ina ou fesiligia pe o le faaaogaina o le igoa atoa o le Ekalesia e taua moni lava i le fuafuaga o mea tetele. O le faailoga o le “Mamona”, e i ai lava i mafaufau o le toatele o tagata—o le avea ma se “Mamona” sa masani ona avea ma se aseta ia te au. Ae i le toe foi atu i le lauga a Peresitene Nelson, sa faagaeetia au i le taua moni lava, e tusa lava pe na mafua ai ni faigata i talanoaga. O lea na ou toe tuuto ai au lava ia.
O se Avanoa e Molimau atu ai e uiga ia Keriso
O le isi taimi na ou faaaogaina ai le igoa atoa o le Ekalesia, sa ou asiasi atu ai i se uo i se ekalesia o se isi faatuatuaga. Na sau se tagata ma se ataata susulu e fesili mai pe o au o se Mamona. “O a’u o se tagata O Le Ekalesia a Iesu Keriso o le Au Paia o Aso e Gata Ai.” Na ou fai atu ai. Sa amata ona ia fesili mai ia te au i nisi o fesili, na amata i le: “Pe talitonu le Ekalesia Mamona …?” Ma o taimi uma, sa ou amataina lau tali i le fuaitau: “i le Ekalesia toefuataiina a Keriso, matou te talitonu …”
O lenei faiga na toe fefaafo’ia’i ai i le faafa pe lima foi. Ina ua ia matauina ou te le taliaina le faalaniga o le “Mamona”, sa ia fesili sa’o mai ia te au, “E le o oe ea o se Mamona?”
O lea na ou fesili ai ia te ia pe na te iloa o ai Mamona—na te lei iloa. Sa ou fai atu ia te ia o Mamona o se perofeta, o se tusitalafaasolopito, o se taitai aoao, ma o se tagata faaupufai i Amerika anamua. Ua ou faamamaluina i le ta’ua faatasi ma se tamalii sa tuuto tele i le galuega a le Atua ma isi.
“Ae,” sa ou faaauau, “sa lei maliu ai Mamona mo au agasala. Sa lei faamaligiina e Mamona lona toto mo au pe mafatia i Ketesemane pe maliu i luga o le satauro. O Mamona e le o sou Atua. O Iesu Keriso o lou Atua ma lou Faaola. O Ia o lo’u Faaola. Ma o Lona suafa ou te manao ia lauiloa ai au i le aso gataaga, ma o Lona suafa ou te faamoemoe ia iloa ai nei au.”
Sa ou lagonaina le faamautinoaga o le Agaga o loo lagolagoina au i lenei molimau puupuu i lau uo fou. Ina ua mavae ni nai sekone o le filemu, sa ia faapea mai, “o oe la, o se Kerisiano?”
“Ioe, o au o se Kerisiano,” sa ou tali atu ai, “ma se tagata o le Ekalesia toefuataiina a Keriso.”
O le saili e mulimuli i aoaoga a le perofeta na foliga mai e faigofie, ae na iu ina sili atu ona tele ni taumafaiga nai lo le mea sa ou faamoemoeina. Ou te le atoatoa lava i le mulimuli i mea uma lava ua poloaiina ai au e fai. Ae i soo se tulaga lava, ou te mautinoa nei le faaaogaina o le igoa atoa o le Ekalesia.
Ou te faafetai mo le Agaga ou te maua pe a ou molimau atu i isi e uiga i lou Faaola ma lou auai i Lana Ekalesia. Ma o lenei ua ou maua se auala maoae e molimau atu ai ia te Ia ma Lana Ekalesia toefuataiina i soo se taimi e fesiligia ai au e uiga i le avea ai ma “Mamona.”