Berglind Guðnason
Árnessýsla, Islande
Berglind (te pae ’aui) ’e tōna tuahine Elín (pae ’atau). ’A topa ai ’o Berglind i roto i te ’aravī rahi ’aita ’oia i ’ite a’e nei, ’ua feruri ’oia ē, e’ita tāna e nehenehe fa’ahou e haere i mua. Nā roto i te fa’a’itera’a i tāna mau ’arora’a i tōna ’utuāfare ’e tōna mau hoa, ’ua ’itehia iāna te ora pae vārua ’e i te ferurira’a nā roto i te mau mauha’a tā te Metua i te ao ra i hōro’a mai.
Mindy Selu, ta’ata pata hōho’a
Tē ma’ihia nei au i te ’aravī mai te 13ra’a o tō’u matahiti. I te hō’ē taime, ’ua rahi roa te ’ati, ’ua tāmata vau e ha’apohe iā’u. ’Ua hepohepo roa vau i tāua taime ra. ’Ua mana’o vau ē, « e’ita roa atu vau e ’oa’oa. E’ita roa atu e oti iā’u te hō’ē ’ohipa. »
I te hō’ē taime ’ua feruri au ē, e fa’aru’e i te ’Ēkālesia, terā te pāhonora’a i tō’u mau fifi nō te mea ’aita tō’u hō’ē ti’aturira’a fa’ahou i te mau mea ato’a. E mea ’ōhie roa ’ia rave i te hō’ē mea ’aita i tītauhia ia ’outou ’ia rave i Islande. E mea ha’iha’i roa te ’Ēkālesia i ’ō nei. ’O vau ana’e ’e tō’u mau tua’ana te tupu nei i te rahi i roto i tā mātou mau piha ha’api’ira’a nō te ’Ēkālesia. ’Ua huru mo’emo’e au, ’e nō te tahi tau taime, ’aita vau i au ’ia haere i te purera’a.
Te rahira’a o te ta’ata i Islande ’ua tu’u rātou i te fa’aro’o i te hiti. E ha’amata te ta’ata i te inu i te ’ava i te ’āpī-roa-ra’a. ’Ua topa vau i roto i te reira ’ohipa, ’e ’aita vau i itoito fa’ahou i roto i te ’Ēkālesia nō te tahi tau taime o tō’u orara’a. ’Aita vau e ’oa’oa nei i te reira, terā rā, te hō’ē te reira tuha’a o tō’u ’itera’a, ’e ’ua ha’api’i mai au nā roto i te reira. ’Ua tuatāpapa vau i te hō’ē a’ora’a nā Elder Jeffrey R. Holland ’e ’ua au vau i tāna i parau : « E ha’api’i mai i te mau mea nō tahito ra, ’eiaha rā e ora i te reira… ’Ia ha’api’i mai tātou i te mea tā tātou e ti’a ’ia ha’api’i mai… ’ei reira tātou e hi’o ai i mua, e ha’amana’o tātou ē,e toro te fa’aro’o i mua i te mau taime ato’a. » 1
I te hō’ē mahana, ’ua hepohepo roa vau, ’ua tai’o vau i tō’u ha’amaita’ira’a pātereāreha. ’A tai’o ai au i te reira, ’ua ’ite a’era vau ē, e ananahi tō’u. E fa’anahora’a tā te Atua nō’u, ’e ’ua here mau ’oia iā’u. Te haerera’a i te purera’a, te ’amura’a i te ’ōro’a mo’a, te tai’ora’a i te mau pāpa’ira’a mo’a, ’e te purera’a, ’ua hōpoi mai te reira i te māramarama ’e te ’oa’oa rahi i roto i tō’u orara’a. ’Ua ’ite ’oi’oi a’era vau ē, « te tauturu pāpū nei te reira iā’u ». I reira tō’u ’itera’a ē, ’ua hina’aro vau i te ’ēvanelia i te mau taime ato’a i roto i tō’u orara’a. I muri a’e i te mau mea ato’a tā’u i ora mai, ’ua ’ite au ē, ’ua fa’aora te ’ēvanelia i tō’u orara’a, ’e e ’oa’oa rahi tō’u i te reira.
Nā roto i tō’u paraparaura’a i tō’u ’aravī i tō’u ’utuāfare ’e i tō’u mau hoa, ’ua tauturu maita’i te reira iā’u. ’Ua arata’i ato’a te reira i te tauturu hau atu. ’Aita vau i hina’aro e ’amu i te rā’au ’aore rā, e fārerei i te taote. ’Ua parau noa vau iā’u iho ē, « Tē vai ra te Atua ». Terā rā, e hōro’a mai te Atua e rave rahi atu mau mauha’a, mai te rā’au ’e te taote, ’ia fa’a’ohipa tātou, ta’a ’ē atu te mau mea pae vārua.
’A ha’amata ai au i te tai’o hau atu i tā’u mau pāpa’ira’a mo’a i te mau mahana ato’a ’e te ha’afātatara’a i te Atua nā roto i te pure, ’ua fāri’i au e rave rahi ha’amaita’ira’a ’e mau heheura’a ē, tā’u ’ōpuara’a o te tauturu ïa ia vetahi ’ē. ’Ua feruri au ē, e rave rahi o tātou e fa’aruru nei i te mau fifi o te ma’i ’aravī, ’e te tāmata nei tātou i te huna i te reira. ’Ua ha’api’i mai tō’u ’aravī ’e tā’u mau ’arora’a ē, e mea maita’i a’e ’ia fa’a’ite ’e ’ia tū’ati i ni’a ia vetahi ’ē. ’Aita i maoro a’e nei ’ua fa’a’ite mai tō’u hoa iā’u i tāna ’arora’a i te ’aravī. ’Ua paraparau māua nō ni’a i te reira ’e ’ua hāro’aro’a mau māua i te tahi ’e te tahi.
E’ita tātou e ’ite i te mau taime ato’a e aha tā vetahi ’ē e ’aro ra, terā rā, i te tahi taime, e orihaere noa vau ma te hi’ohi’o i te tahi atu mau ta’ata ’e ma te ’ite ē, ’ua ’ite te Atua ia tātou tāta’itahi. ’Ua here ’oia ia tātou ’e ’ua ’ite pāpū ’oia ē, e aha tā tātou pā’āto’a e fa’aruru nei. ’E e nehenehe tā tātou e tauturu i te tahi ’e te tahi.
Nā roto i tā’u mau ’arora’a i te ’aravī, ’ua ha’api’i mai au ’ia ui ē, « E aha tā’u e nehenehe e ha’api’i mai i roto i teie tāmatara’a ? » ’eiaha rā, « Nō te aha vau i fāri’i ai i teie tāmatara’a ? » E mea au nā’u te Etera 12:27, tē parauhia ho’i i reira ē, e nehenehe te mau mea paruparu e riro mai ’ei mea pūai mai te mea ē, e fa’aro’o tō tātou ia Iesu Mesia. E tāmāhanahanara’a terā no’u i te mau taime ato’a.
’Ua mā’iti tātou pā’āto’a ’ia haere mai i te fenua nei. ’Ua ’ite tātou ē, e māuiui tātou nā roto i te mau tāmatara’a. ’E e parau mau, nā te reira e fa’anehenehe i te orara’a. Nō te mea ’ua ’ite tātou ē, tē vai ra te mau mea maita’i i muri nei. ’Ua ’ite tātou ē, mai te mea ē, e pe’e tātou i te Fa’aora i roto i te mau tuha’a fifi ato’a, e nehenehe tātou e fāri’i i te ora mure ’ore ’e teie mau ha’amaita’ira’a ato’a e vai nei nō tātou.
’Ua ’ite pāpū roa vau i tō’u tauira’a nā roto i tō’u ’aravī. E mea mau te tāra’ehara a te Fa’aora, ’ua tauihia tō’u ’ā’au, ’e ’ua pūai atu vau. Mai te huru ē, e ta’ata ta’a ’ē au i tei te mātāmua ra. Tē ’ite nei te ta’ata ’e te parau nei ē, « ’Ua taui ’oe ». ’Ua parau roa mai te hō’ē tamāhine nō te fare ha’api’ira’a, « tē ’ite nei au i te hō’ē ta’a-’ē-ra’a ’e te hō’ē māramarama i roto ia ’oe ». E mea huru ’ē ri’i, nō te mea e ’ere ’oia i te melo nō te ’Ēkālesia, ’e ’aita ho’i māua i paraparau pāpū na nā mua a’e nei.
’A vai ai au i roto i te taime fifi roa o tō’u ’aravī, ’ua parau mai te ta’ata iā’u ē, « E maita’i ’oe ». ’Ua nava’i roa vau i te fa’aro’ora’a i te reira, terā rā, noa atu te huru ’ē o te reira, e parau mau rā.
Terā rā, tītauhia ’ia ’outou ’ia hina’aro ’ia maita’i mai. ’Ua ha’api’i mai au ē, e’ita outou e maita’i mai ma te rave ’ore i te hō’ē noa a’e ’ohipa. Tītauhia ’ia ’outou ’ia hina’aro ’ia ’oa’oa ’e ’ia ti’aturi ē, e pūai ’e e ananahi tō ’outou. E mea faufa’a ’ia ha’amana’o ē, ’ua herehia ’outou e te mau ta’ata e rave rahi, tae roa atu i tō ’outou Metua i te ao ra. Tei reira rātou pā’āto’a nō te tauturu ia ’outou.
’Aita vau i feruri noa a’e ē, e ’oa’oa vau mai tā’u e ’oa’oa nei i teie taime. I te tahi mau mahana, e fifi ri’i noa ā vau, terā rā, nā roto i te mau mauha’a tā te Metua i te ao ra i hōro’a mai, e nehenehe tā’u e arai i te reira. I teienei, ’ia ’ite ana’e au ē, tē fifi ra vau, e parau vau iā’u iho ē, ’ua herehia vau, tē vai ra te mau ta’ata tā’u e nehenehe e paraparau, ’e e ’āfaro mai te mau fifi.
’Ua tauturu te fa’arurura’a i te ’aravī ia Berglind ’ia ’ite ē, nāhea e ti’a ai ia tātou ’ia tauturu i te tahi ’e te tahi i roto i te mau tāmatara’a. « ’Ua ite te Atua ia tātou tāta’itahi, ’ua here ’oia ia tātou, ’e ’ua ’ite pāpū ’oia ē, e aha tā tātou pā’āto’a e fa’aruru nei. ’E e nehenehe tātou e tauturu i te tahi ’e te tahi ».
’Ua ’ite ’o Berglind i te hō’ē tauira’a i roto iāna iho nā roto i tāna mau tāmatara’a. « E parau mau te tāra’ehara a te Fa’aora », tāna ïa parau. « ’Ua tauihia tō’u ’ā’au, ’e ’ua pūai atu vau. Mai te huru ē, e ta’ata ta’a ’ē au i tei te mātāmua ra ».
« ’A ha’amata ai au i te tai’o hau atu i tā’u mau pāpa’ira’a mo’a i te mau mahana ato’a », te parau ïa a Berglind, « ’ua fāri’i au e rave rahi ha’amaita’ira’a ’e mau heheura’a ē, tā’u ’ōpuara’a ’o te tauturu ïa ia vetahi ’ē. E mea au nā’u te Etera 12:27, tē parauhia ho’i i reira ē, e nehenehe te mau mea paruparu e riro mai ’ei mea pūai mai te mea ē, e fa’aro’o tō tātou ia Iesu Mesia. E tāmāhanahanara’a terā no’u i te mau taime ato’a ».