E tāpe’a ānei te mau ’ohipa i orahia e ’oe ia ’oe ?
’Ua ’aufau a’ena te Fa’aora i te ho’o. ’A mau i tōna rima ’e ’a haere i mua.
’Aita i maoro a’e nei, ’ua ani tō mātou ’episekōpo i tā mātou pāroita ’ia feruri i te tahi mau paruparu ’aore rā, te tahi hara tā mātou e nehenehe e fa’aru’e i ni’a i te ’aira’a mā’a o te ’ōro’a mo’a ’ia hōpoi-’ē-hia atu e Iesu Mesia. Tē vai nei te mau hara i amohia e au i roto i tō’u orara’a feiā ’āpī pa’ari tā’u i tāmata i te upo’oti’a i ni’a iho i te reira, ’aita rā vau i upo’oti’a nā roto i te pure ’aore rā, i tō’u iho pūai. Noa atu tō’u tupura’a i te rahi i te roara’a o te matahiti, ’ua ’ite au ē, ’ua tītauhia iā’u ’ia upo’oti’a i ni’a i te reira nō te tāmau ā i te haere i mua.
I te sābati i muri a’e i te tītaura’a a te ’episekōpo, ’ua fa’aoti ihora vau ē, e tu’u vau hō’ē noa o tā’u mau hara i ni’a i te ’aira’a mā’a o te ’ōro’a mo’a, e fa’ahōho’ara’a tino o te Fa’aora ’e tāna tusia tāra’ehara. ’A fa’aineine ai au e rave i te ’ōro’a mo’a, ha’amana’o a’era vau ē, te ’ahu e tāpo’i ra i te reira e fa’ahōho’ara’a ïa nō tōna ’ahu hunara’a, ’e te faraoa ’e te pape e fa’ahōho’ara’a ïa nō tōna tino ’e tōna toto.
Ma te ’ā’au tae mau ’e te ’ōpuara’a pāpū, ’ua fa’a’āpī au i tā’u mau fafaura’a o te bāpetizora’a ’e ’ua fa’ahiti au i te hō’ē pure i roto i tō’u ’ā’au, ma te ani i te Metua i te ao ra i te tauturu ’e ma te fafau ’ia vaiiho i teie hara i muri. I muri iho, ’ua tupu a’era te hō’ē ’ohipa ’aita roa atu vau i feruri a’e : ’ua ’ore roa tō’u hina’aro ’ia rave i te hara. ’Ua tāmata vau i te reira ravera’a nō te tahi tau taime, ’e ’ua tupu ā te reira ’ohipa nō ni’a i te tahi atu mau hara. E mea fa’ahiahia roa nō te riro ’ei parau mau ?
Fa’atū’ati i tō’u hina’aro e tōna
I te hepetoma i muri iho, ’ua ’ite au e aha te hara tā’u i hina’aro e tu’u i ni’a i te ’aira’a mā’a o te ’ōro’a mo’a, ’aita rā vau i ineine nō te fa’aru’e i te reira. ’Ia ho’i mai au i muri, tē ’ite nei au ē, ’aita tō’u ’ā’au i te vāhi i tītauhia ’ia vai. ’Aita tō’u ’ā’au i tae roa nō te fafau ’ia taui. ’Ua ’ite rā vau ē, ’ua ha’amāuiui roa te hara i te Metua i te ao ra. ’Ua ’ite ho’i au e mea ti’a iā’u ’ia fa’atū’ati i tō’u hina’aro ’e tōna ’e ’ia fa’atumu i tō’u orara’a ’ati a’e iāna nō te riro mai ’ei ta’ata ti’amā. Nō reira ’ua ’imi au i te mau rāve’a ato’a nō te fa’atupu i te reira.
’Ua ha’apae au i te mau huru fa’ahemara’a ato’a ’o te nehenehe e arata’i atu i teie nei hara. ’Ua taui au i te huru o tā’u tai’ora’a i tā’u mau pāpa’ira’a mo’a i te mau mahana ato’a ’e ’ua feruri pāpū vau i te reira ’e ’ua fa’a’ohipa i te reira i roto i tō’u orara’a. ’Ua fa’atumu vau i ni’a i te rirora’a ’ei ta’ata parau-ti’a i roto i tā’u fafaura’a ’ia taui, ’e ’ua ’imi au i te mau mahana ato’a ’ia ’imi i te hina’aro o te Fatu i ni’a iho i tō’u. ’Ua tu’u vau iāna nā mua, nō te mea ’ua ’ite au ē, e’ita tā’u e nehenehe e fa’aru’e i teie hara i muri ma te ’ore te mana o te tāra’ehara o te Fa’aora. Nā roto i te tāmaura’a i te tu’u iāna nā mua, ’ua ti’a iā’u ’ia fa’aru’e i teie hara i ni’a i te ’aira’a mā’a o te ’ōro’a mo’a. I te hope’a, ’ua ti’amā vau i te hō’ē mea tei tāpe’a noa iā’u i muri nō te mau matahiti e rave rahi.
Nā roto i teie rāve’a, ’ua tupu vau i te rahi i pīha’i i tō’u Metua i te ao ra ’e tō’u Fa’aora. ’Ua feruri au ia rāua i te hi’o-noa-ra’a mai iā’u i te roara’a o teie mau matahiti ma te fa’a’oroma’i ’e te here–ma te ’ite ē, i te hope’a, e fa’aru’e au i te mau hara tei ha’afifi i tō’u haerera’a i mua. ’E ’a ineine ai au nō te fa’aru’e i te reira, e haere mai Iesu Mesia nō te fa’ati’a iā’u–nō te rave i tō’u rima ’e nō te hōro’a mai iā’u i te fa’a’orera’a i tā’u mau hara ’e i te pūai. ’Ua hōro’a a’ena mai ’oia i te hō’ē rāve’a e ti’a ai iā’u ’ia ti’amā i tā’u mau hara nā roto i tāna tāra’ehara. ’Ua ’aufau ’oia i te ho’o nō tō’u mau paruparu, tō’u mau hape ’e tā’u mau hara. Tītau-noa-hia iā’u ’ia ti’aturi iāna.
E nehenehe tā ’oe e haere i mua
I roto i taua taime ra, ’ua tai’o vau i te tahi mau parau nō roto mai ia Elder Richard G. Scott (1928–2015) nō te Pupu nō te Tino ’Ahuru Ma Piti ’āpōsetolo tei hōro’a mai iā’u i te tahi tūra’ira’a iti tā’u i hina’aro : « Mai te mea ē, e mea huehue tō ’outou orara’a ’e tē feruri ra ’outou ē, e mea au ’ore ’outou ’e e mea ti’amā ’ore… ’eiaha e ha’ape’ape’a. ’Ua’ ite a’ena ’oia i te reira. Tē tīa’i nei ’oia ia ’outou ’ia tūturi i raro ma te ha’eha’a ’e ’ia rave i te mau ta’ahira’a mātāmua. ’A pure nō te pūai… ’A pure ’ia nini’ihia mai te here o te Fa’aora i roto i tō ’outou ’ā’au ».1
’A hīmene ai mātou « Tē māere nei au » (tā’u hīmene au roa a’e) i te hepetoma i muri atu, ’ua ta’i pāpū te mau ta’o tāta’itahi ; e ’ua māere au—’ua ri’ari’a vau i te mea ē, ’ua ’īriti-’ē-hia te mau mea tā’u i ’aro e rave rahi matahiti. ’Ua ri’ari’a vau i te mea ē, nā roto i te mana o te tāra’ehara a te Fa’aora, e nehenehe au e haere i mua. E nehenehe tāna e fa’aora i te mau hara ato’a ’e te mau pēpē ’e ma te ’ore e vaiiho i te hō’ē tāpa’o i muri. ’Aita i tītauhia iā’u ’ia tāpe’ahia vau e te mau ’ohipa i orahia mai e au.
E rave rahi ā ’o te ti’a iā’u ’ia ’apo mai ’e ’ia upo’oti’a, tē haere ra rā tō’u orara’a i ni’a. Tē ’ite nei au i te ’oa’oa ’e te hau rahi atu ā. Tē fa’a’ite nei au i te ’ā’au mēhara hau atu ā. Tē ha’afātata nei au i te Metua i te ao ra ’e i te Fa’aora ’e tē pūai nei tō’u ’itera’a pāpū nō rāua. ’Ia mā’iti au i te mau mahana ato’a ’ia tāmata fa’ahou, e ha’afātata atu vau ia rāua ’e i te ta’ata tā rāua i ’ite e nehenehe au e riro mai.