Nāhea te feiā ’āpī pa’ari i te fa’atupu i te hō’ē ta’a-’ē-ra’a i roto i te fa’aho’i-fa’ahou-ra’a mai ’o tē tāmau noa nei

’Ua rave noa nā te feiā ’āpī pa’ari i te ’ohipa faufa’a i roto i te ’ohipa nō te fa’aorara’a.

’Ia fa’aro’o ana’e ’outou i te hō’ē anira’a manihini a te hō’ē ti’a fa’atere o te ’Ēkālesia ’ia ’āmui i roto i te fa’aho’i-fa’ahou-ra’a mai e tāmau noa nei ’aore rā, ’ia tauturu i te ha’aputuputura’a ia ’Īserā’ela, ’aita ānei ’outou e feruri ē, « E aha tā’u e nehenehe e rave ? O vau ana’e iho », « E mea ’āpī roa vau », « ’Aita ā vau i fa’aipoipohia », ’aore rā, « ’Aita i nava’i tō’u ’ite. E aha te ta’a-’ē-ra’a tā’u e fa’atupu ? »

E tupu terā huru mana’o i roto ia tātou tāta’itahi i te tahi taime. Terā rā, ’a tāmata i te fa’a’ore i te reira huru mana’o tapitapi ’a tai’o ai ’outou i teie mau parau i muri nei :

E 22 matahiti ana’e tō Iosepha Semita ’a ha’amata ai ’oia i te ’īriti i te Buka a Moromona.
E 22 matahiti ato’a tō Oliver Cowdery ’e tō John Whitmer, e 26, (’e e nā ta’ata ’ōtahi rāua to’opiti !) ’a ha’amata ai rāua i te rave i te ’ohipa ’ei pāpa’i parau nō Iosepha.
I te matahiti 1835, ’a pi’ihia ai te Pupu nō te Tino ’Ahuru ma Piti ’Āpōsetolo mātāmua, tei roto tō rātou matahiti i te ārea e 23 ’e tae atu i te 35.
E rave rahi o te feiā mo’a mātāmua tei tomo mai i roto i te ’Ēkālesia ’e tei ha’aparare i te ’evanelia, e feiā ’āpī pa’ari rātou.

’Ei ha’apotora’a, ’ua ha’a te Atua nā roto i te feiā ’āpī pa’ari i te mau mahana mātāmua o te fa’aho’i-fa’ahou-ra’a mai o te ’evanelia a Iesu Mesia. Ta’ata noa mai ia ’outou.

’A tu’u i te reira i roto ia ’outou.

E’ita te ’Ēkālesia e parare nā te mau fenua ato’a i teie mahana mai te mea ē, e feruri te mau ta’ata ato’a ē, e’ita tā rātou e nehenehe e fa’atupu i te ta’a-’ē-ra’a. ’Ē ’o ’outou—’ē, ’o ’outou !—e tuha’a ’outou nō te hō’ē u’i mā’itihia nō te tāmau i te fa’aho’i-fa’ahou-ra’a mai ’e i te fa’atere i te ’Ēkālesia a Iesu Mesia i teie mahana.

’Ua tonohia mai ’outou i’ō nei. I teie nei. Nō te hō’ē tumu.

’A paraparau ai ’oia nō ni’a i tō tātou u’i, ’ua ha’api’i mai te peresideni Russell M. Nelson ē, « tē ora nei ’outou i roto i te ’ahuru-ma-hō’ē-ra’a o te hora ». ’Ua parau te Fatu ē, teie te taime hope’a e pi’i ai ’oia i te feiā ’ohipa i roto i tāna ’ō vine nō te ha’aputuputu i tei mā’itihia i roto i nā poro e maha o te fenua nei. (Hi’o PH&PF 33 :3–6.) ’E ’ua tonohia mai ’outou nō te ’āmui i roto i teie ha’aputuputura’a »¹

’A feruri nā i te pūai o te 65 000 misiōnare rave tāmau e fa’a’ite nei i te ’evanelia i te mahana tā’āto’a, i te mau mahana ato’a, ’ati a’e te ao nei. ’A feruri nā i te mau feiā ’āpī pa’ari ato’a e rave nei i te mau fafaura’a i roto i te hiero, i te fāna’ora’a i te maita’i o te autahu’ara’a i fa’aho’ihia mai ’e te mau ha’amaita’ira’a o te hiero ’e i te fafaura’a ’ia ha’apa’o maita’i, ’ia ha’apūai i tō rātou mau ’utuāfare, ’e ’ia patu i te bāsileia o te Atua i te fenua nei. ’A feruri na i te feiā ’āpī pa’ari e tāvini nei ’ei feiā fa’atere nō te ’Ēkālesia ’ati a’e te ao nei. ’A feruri na i te feiā e ha’ape’epe’e nei i te pe’e ia Iesu noa atu te mau fa’ahapara’a i ni’a ia rātou. ’Ua riro te feiā ’āpī pa’ari ’ei tuha’a pāpū nō te fa’aho’i-fa’ahou-ra’a mai mai te ’ōmuara’a mai ā. ’E ’ua riro te fa’aho’i-fa’ahou-ra’a mai e tupu tāmau noa nei, ’ei tuha’a pāpū nō te orara’a o te mau melo feiā ’āpī pa’ari e rave rahi, o te ’Ēkālesia.

E aha te aura’a o te fa’aho’i-fa’ahou-ra’a mai nō tātou

Nō te rahira’a o tātou, tō tātou ’āmuira’a i roto i te fa’aho’i-fa’ahou-ra’a mai, nō roto mai ïa i te mau mea i ha’api’ihia ia tātou. Nō Vennela Vakapalli, hō’ē feiā ’āpī pa’ari fa’afāriuhia nō Andhra Pradesh, Initia « te fa’aho’i-fa’ahou-ra’a mai, ’o te ’imira’a ïa i te heheura’a. ’Ua ’imi o Iosepha Semita i te heheura’a i roto i te uru rā’au. ’Ua paraparau ’oia i te Fatu, ’ua tīa’i ’oia i te pāhonora’a, ’ua fa’a’oroma’i ’oia. Terā tā’u mea au roa. » Tē fa’ata’a nei o Vennela, « nā mua a’e ’a fa’aro’o ai au nō ni’a i te fa’aho’i-fa’ahou-ra’a mai, ’aita vau i ’ite rahi roa nō ni’a i te ’imira’a i te heheura’a. Hō’ē o te mau mea rarahi tei fa’atupu i te māere i roto iā’u, o te taime rahi ïa tāna i rave nō te fāri’i i te heheura’a nō ’ō mai i te Atua ra. Terā tā’u i ha’api’i mai i roto i te fa’aho’i-fa’ahou-ra’a mai. »

’Ua fāri’i o Emma ’e o Jacob Roberts, hō’ē nā ta’ata ’āpī fa’aipoipohia, nō Utaha, USA ē, te fa’aho’i-fa’ahou-ra’a mai, o te parau ïa nō te « heheura’a tāmau » —nō tātou iho ’e nō te ao nei— « ’e e fāri’i tātou i te hō’ē peropheta, ’ei ’auvaha parau nō te Atua i ni’a i te fenua nei, nō te ha’apāpū ē, ta’a ’ē noa atu te mau tītaura’a tā te ao nei e fa’atupu mai, tē vai ra hō’ē ta’ata ’o tē ha’a nei ’e ’o tē pure nei ’e ’o tē paraparau nei i te Atua nō te ha’apāpū ē, ’ua ineine tātou, ’e e ti’a ia tātou ’ia fa’aruru i te mau tītaura’a tā te ao e hōro’a mai, ’a taui noa ai ’oia. »

« E rave rahi ’itera’a nō roto mai i te fa’aho’i-fa’ahou-ra’a mai, ’o tē fa’a’ōhie nei ’e ’o tē tāmarū nei i tō’u orara’a » te parau ïa a Jacob. Tē ha’apāpū mai nei teie mau mea ato’a ē, « tē vai nei hō’ē Atua e here nei ia tātou ’e ’o tē ara nei i ni’a ia tātou » te reo ïa o Emma. « Tōna hina’aro, o tō tātou ïa ’oa’oa. ’Ei feiā ’āpī pa’ari, e nehenehe tātou e ti’aturi hope roa ’e e pe’e iāna nō te mea ’ua ’ite tātou ē, tāna ’ōpuara’a, tō tātou ïa ’oa’oa. ’Ua ’ite tātou ē, e mau ta’ata mure ’ore tātou, ’e nā te reira e hōro’a mai iā’u i te ti’aturira’a ’e te fa’aro’o pūai ē, noa atu te ’ohipa tā’u e rave i teienei, ’e noa atu te mau hape tā’u e rave nei i teienei, e nehenehe tā’u e tātarahapa, ’e teie te taime nō te haere i mua ’e nō te ha’api’i mai. »

’Ua tauturu ato’a taua huru ha’apāpūra’a ra ia Ramona Morris, hō’ē feiā ’āpī pa’ari nō Barbades, ’a ’ite ai ’oia nō te taime mātāmua i te parau nō te fa’aho’i-fa’ahou-ra’a mai. Ta’a ’ē atu te tahi mau mea, ’ua noa’a tōna ’itera’a pāpū ē, tei i’ō nei te Metua i te ao ra nō tātou. E hōro’a mai te fa’aho’i-fa’ahou-ra’a mai i te hau i te feiā e fa’a’āfaro i tō rātou orara’a, ’e e fa’a’āfaro i te fa’anahora’a a te Atua nō rātou.

Terā rā, noa atu ē, ’ua hōpoi mai te hāro’aro’ara’a i te fa’aho’i-fa’ahou-ra’a mai i te māramarama i roto i tōna orara’a, ’ua fāri’i ato’a ’oia ē, « nō tōna ātea i te pū fa’aterera’a o te ’Ēkālesia, e mea fifi ’ia nati i ni’a i te ’evanelia terā rā, nō te pūai o tō’u ’itera’a pāpū nō ni’a i te ’evanelia i fa’aho’ihia mai, ’ua ’ite au ē, noa atu tō’u ātea, e nehenehe ā vau e ’ite ē, e tuha’a vau nō te fa’aho’i-fa’ahou-ra’a mai, ’e ’aita vau i vai ’ōtahi noa. »

’E ’aita roa. Tē ’āmui nei te feiā ’āpī pa’ari ’ati a’e te ao nei i roto i te fa’aho’i-fa’ahou-ra’a mai nā roto i te tāvinira’a i te hiero, te ’ā’amu ’utuāfare, ’e te ’ohipa misiōnare. Nā roto i tō tātou hāro’aro’ara’a i te heheura’a o te ta’ata iho ’o te noa’a ia tātou nā roto i te ’itera’a i te ’ōrama mātāmua a Iosepha Semita ’e te fa’aho’i-fa’ahou-ra’a mai, e nehenehe tātou pā’āto’a e ’imi ’ia ’ite i te hina’aro o te Atua, ’e e aha tā rātou tuha’a i roto i te fa’aho’i-fa’ahou-ra’a mai e tāmau noa nei.

Feiā ’āpī pa’ari nō te arata’i i te ’Ēkālesia

E feiā ’āpī pa’ari paha tātou, terā rā, e nehenehe tātou e riro ’ei feiā fa’atere i roto i te ’Ēkālesia i teienei. Noa atu ē, ’o ’ōna ana’e te melo o te ’Ēkālesia i roto i tōna ’utuāfare, ’ua ha’apūaihia ’o Janka Toronyi nō Győr, nō te fenua Hongrie, nā te ’āmuira’a atu tōna hoa feiā ’āpī pa’ari i roto i te tahi atu mau huru o te fa’aho’i-fa’ahou-ra’a mai : « e rave rahi o tō’u mau hoa tei haere i te misiōni, ’e e mea maita’i roa ’ia ’ite i tō rātou haerera’a i mua, ’e ’ua ho’i mai rātou, ’e ’ua tupu rātou i te rahi i roto i tō rātou mau ’itera’a. E ’ohipa fa’ahiahia ïa nō tātou pā’āto’a. E mea fa’ahiahia i te mau taime ato’a ’ia ’ite i tō’u mau hoa feiā ’āpī pa’ari ’ōtahi ’ia tāvini i roto i tō rātou mau pi’ira’a, ’e i te tahi taime, te mau rāve’a o te roa’a ia rātou, mai te rirora’a ’ei tauturu i roto i te mau ’āmuira’a FSY (nō te pūai o te feiā ’āpī). Mai te huru ra iā’u ē, e ’ere te fa’aho’i-fa’ahou-ra’a mai nō ni’a noa i te ha’api’ira’a i te ta’ata i te ’evanelia—nō ni’a i te ha’apūaira’a i tō tātou mau melo. »

’Ua ’ite te feiā ’āpī pa’ari nō Hongrie ē, o rātou te feiā fa’atere o te ’Ēkālesia nō ananahi. « E hina’arohia tātou ’e e tītauhia ia tātou ’ia ’ite i te ’ohipa, e ’ere i te mea ’ōhie i te tahi taime » te mana’o ïa ’o Janka. « Tē ha’ape’epe’e nei te Fatu i tāna ’ohipa ’e tei roto tātou i te reira ’ohipa. I te tahi taime tē feruri nei tātou ē, ’nāhea e ti’a ai iā’u ’ia rave i te reira ? Terā rā, e mea fa’ahiahia ’ia ’ite ē, e ti’aturi rahi tō tō tātou feiā fa’atere i roto ia tātou. E mea maita’i roa nō te feiā ’o tei here i te ’Ēkālesia, ’e e ’itera’a pāpū pūai tō rātou, nō te mea, ’ua ’ite tātou ē, i te hō’ē mahana, e amo tātou i te reira hōpoi’a. Tei ia tātou te hōpoi’a nō tō tātou iho tupura’a rahi i te pae vārua. »

’Ua ’āmui ’o Sean ’e ’o Stefany Joseph, nō Auteraria tō’o’a o te rā, i roto i te fa’aho’i-fa’ahou-ra’a mai, nā roto i te arata’ira’a i te feiā ’āpī i roto i tā rāua pāroita. « Nō’u nei, te ’āmuira’a i roto i te fa’aho’i-fa’ahou-ra’a mai, ’o te tauturura’a ïa i te u’i nō ananahi ’ia hāro’aro’a e aha te ’evanelia, ’e nāhea te reira i te tauturu ia rātou ’e ia vetahi ’ē i roto i tō rātou orara’a » te reo ïa o Stefany. « E nehenehe tātou e tauturu ’ia fa’atupu i te hō’ē niu pa’ari a’e nō te ’Ēkālesia i roto i tō tātou fenua a muri a’e. »

« E hina’aro tātou e tauturu i te feiā ’āpī ’ia noa’a te ’itera’a pāpū nō te Buka a Moromona ’e nō Iosepha Semita ’e ’ia ’ite ē, e tamari’i mau rātou nā te Atua nō rātou iho », tē nā reira nei ’o Sean. « ’Aita tātou e hina’aro i te reira ’ia riro ’ei ’ohipa tā rātou i hīmene noa i roto i te Paraimere—tē hina’aro nei tātou ’ia ’ite mau rātou ē, e parau mau te reira. »

Nō Vennela rā, ’e ’ere i te mea ’ōhie i te mau taime ato’a ’ia ora i te ’evanelia, ’ua ’ite rā ’oia ē, ’e fa’auru te pūai o te mau melo feiā ’āpī pa’ari i reira ia vetahi ’ē ’e e tauturu i te fa’aho’i-fa’ahou-ra’a mai ’ia haere i mua. « I’ō nei, e mea ha’apa’o maita’i te feiā ’āpī pa’ari pā’āto’a. Tē ’imi nei rātou i te mau rāve’a nō te fa’a’ite i tō rātou ’itera’a pāpū » tāna ïa parau. « E au mātou mai te mau pionie i Initia nei. Tē haere nei mātou i terā vāhi ’e terā vāhi, ’e tē fa’aru’e nei te tahi pae o mātou i tō mātou mau ’utuāfare. E mea fifi te orara’a i’ō nei, terā rā, tē mā’iti noa nei ā mātou ’ia ha’apa’o i te ’evanelia. Tē hōro’a mai nei te mau pāpa’ira’a mo’a iā’u e rave rahi ti’aturira’a, te pūai ’e te itoito. »

Noa atu te huru te vāhi tei reira tātou, ’ei feiā ’āpī pa’ari, e nehenehe tā tātou e tāmau noa ’ia noa’a te fa’aurura’a rahi i ni’a i te fa’aho’i-fa’ahou-ra’a mai e tāmau noa nei, nā roto i tō tātou fa’aro’o ’e te fafaura’a i te ’evanelia.

Te ananahi o te ’Ēkālesia : tei ia tātou noa

O tātou te ananahi o te ’Ēkālesia. Tei roto tātou i te ’arora’a hope’a. Tē ti’aturi nei te Metua i te ao ra i ni’a ia tātou nō te tauturu iāna ’ia rave i tāna ’ohipa—tāna ’ohipa te tauira’a i te orara’a e a muri noa atu. ’Ua ’ite ’oia ’ua nava’i tō tātou pūai nō te haere tāmau i mua ’e nō te ’aro i te mau mea ato’a e vai ra i roto i te rima o te ’enemi. ’E tē paruparu nei te mana’o o te Sātane. ’Ua ’ite ’oia ē, tē ’aro nei ’oia i te hō’ē ’arora’a e pau ’oia, nō te mea e upo’oti’a te ’ohipa a te Fatu.

« ’Ua ’ite tātou ē, tē ha’ape’epe’e nei te Fatu i te ’ohipa ’e ’aore e ta’ata e nehenehe e tāpe’a i te reira » te parau ïa a Janka. « ’Ua ’ite tātou ē, e tupu mau te reira, noa atu te huru. Terā rā, ’ua tītauhia ia tātou ’ia fa’aoti e riro ānei tātou ’ei tuha’a nō te reira ’e e tauturu i te reira ’ia haere i mua ’aore rā, ’ia māta’ita’i noa nā te hiti. E ti’amāra’a tō tātou nō te riro ’ei tuha’a nō te reira, ’e e ’itera’a pāpū tō tātou ’ia ti’a ia tātou ’ia mā’iti i te mea tano ’e ’ia mā’iti e pe’e i te Mesia. ’Ua tītauhia ia tātou ’ia riro ’ei tuha’a nō te reira. »

Nō reira, tei ia tātou te mā’itira’a nō tei hea pae tātou.

Tei ia tātou te fāri’ira’a i te itoito nō te ti’a nō te mea tā tātou e ti’aturi nei.

Tei ia tātou te ’imira’a i te heheura’a nō tātou iho nō tō tātou orara’a.

Tei ia tātou te fa’ati’ara’a i te mau tāmatara’a fifi tā tātou e fārerei nei, nō te ha’apūai i tō tātou fa’aro’o i te Fa’aora.

Tei ia tātou te pe’era’a iāna ’e ’ia rave i te mau mea ato’a e ti’a ia tātou ’ia rave nō te arata’i mai ia vetahi ’ē iāna ra.

Tei ia tātou te tāpe’a-māite-ra’a e tae atu i te hope’a mai te maita’i e ti’a ia tātou.

Tei roto mau tātou i te mau mahana hope’a nei. E mai te mea ra ē, te arata’ira’a i te ’Ēkālesia i roto i te mea tā peresideni Nelson e pi’i nei ē, « te tau tu’ura’a pāpū noa a’e i roto i te ’ā’amu o te ao nei »² e hōpoi’a ri’ari’a mau ïa. Terā rā, ’a feruri na i te reira—’ua ti’aturi pāpū te Metua i te ao ra ia tātou ’e ’ua fa’ata’a ’oia ia tātou ’ia tae mai i te fenua nei i teie taime ta’a ’ē, teie taime tā tātou e fa’aruru nei i te mau fa’ahemara’a e rave rahi ’e te mau fa’anevanevara’a ’e te mau mana’o pāto’ito’i e rave rahi.

Nā roto i te tonora’a mai te Metua i te ao ra ia tātou i roto i te tau tu’ura’a faufa’a rahi, ’aita ’oia i fa’aineine ia tātou ’ia manuia ’ore. ’Ua ’ite ’oia i tō tātou faufa’a, tō tātou pūai, tō tātou itoito, ’e i te hope’a roa, ’ua ’ite ’oia ē, e nehenehe tā tātou e fa’atupu i te ta’a-’ē-ra’a i roto i te fa’aho’i-fa’ahou-ra’a mai o te ’Ēkālesia, noa atu tō tātou matahiti ’aore rā, tō tātou ti’ara’a ta’ata fa’aipoipo. Noa atu te fifi rahi o tō tātou mau tāmatara’a, ’aore rā, noa atu te fifi o te fa’aterera’a ’e te fa’a’itera’a i te ’evanelia nā te fenua nei, mai te mea ē, tei tō tātou pae ’oia, o vai te nehenehe e ’aro mai ia tātou ? E tauturu ’oia ia tātou ’ia rave fa’aoti i te mea teimaha.