Kōjerbal Likio in Etan Kabun̄ in Ekar Jaad Kāliklik bōtaab Ewōr Tokjān
Ļoor naan in kōmeļeļe eo an rikanaan eo ekar āinwōt pidodo, bōtaab ekar aikuji eļapļo̧k kijejeto jān aō kar kōtmene.
Ke Būreejtōn Nelson ekar kōnono kōn kōjerbal jim̧we in etan Kabun̄ in ilo 2018 Oktoba kweilo̧k eo eļap, ennaan eo an ekar lukkuun alikkar n̄an n̄a: “Ej kean̄ eo an Irooj. …
“… N̄an joļo̧k etan Irooj jān Kabun̄ eo An ej juon anjo̧ eļapp n̄an Setan” (“Jim̧we in Etan Kabun̄ in,” Liaona, Okt. 2018).
Iaar kile bwe ij aikuj in bar ļōmņak elmen aō kōm̧m̧ani bwebwenato ko aō ippān ro ipeļakū, ekoba jet armej ro ilo jikin jerbal eo aō me reminene in kar kūr eō “Mormon” ak juon membōr in “Kabun̄ in Mormon.”
Kallim̧ur n̄an kōjerbal likio in etan Kabun̄ in, iaar kōttar n̄an bar juon iien em̧m̧an n̄an kwaļo̧k ke ij juon membōr in Kabun̄ eo an Jisōs Kraist im Armej ro Rekwojarjar ilo Raan-ko Āliktata. Em̧ool, iien eo em̧m̧an eaar itok, bar juon iien kweilo̧k. “Kom̧ Mormon kom̧ armej jouj,” juon eo kōjatdikdik enaaj juon aō armej ekar jiron̄ eō. “Ekwe, kom̧m̧ool,” iaar uwaak. “Āinwōt membōr ro an Kabun̄ eo an Jisōs Kraist im Armej ro Rekwojarjar ilo Raan Ko Āliktata, kōmij tōmak jej aolep jemjān jemjati.” Innām bwebwenato eo eaar wōnm̧aanļo̧k wōt ippān im aolep ro rej kōnono kōn jouj eo an “Mormon ro.”
Men̄e iaar kōm̧m̧ane ijo kuņaō n̄an ba likio in etan likio in Kabun̄ in, ikab de kar en̄jake juon men ekar jab jetjet. Ro jera im m̧ōtta rej watōk wōt n̄a āinwōt m̧ōttan “Kabun̄ in Mormon” im jab lukkuun āinwōt juon rikaļooran Kraist, im jab āinwōt juon membōr in Kabun̄ eo an Kraist em̧ōj an kar jepļaaktok.
Kōjerbal Jim̧we in Āt eo Ekar ke Wōr Tokjān n̄an Jorrāāņ eo?
Ilo leļok letok ko tok jet kōn kabun̄ eo aō, iaar lo aō make ebbwer kōnke kōn ajōbjōb in ba likio in, aitokan etan Kabun̄ in elōn̄ alen ko ilo ejja bwebwenato eo wōt. Jabdewōt eo ikar kōnono n̄ane ekar āinwōt letok n̄an eō en̄jake ko rekōjak. Im bwebwenato eo ekar wōt aolep iien pedped ioon “Mormon ro.”
Ikar kajjieon̄ n̄an kōm̧m̧an bwe leļo̧k letok ko aō ren āinwōt ļapļo̧k aer make waļo̧k. Bōtaab menin ekar ļapļo̧k an pen jān aō kar kōtmene, eļap tata ippān ro ikar jab kōņaan kōmetak er. Iaar jab kōņaan jook ak kakōl kōn mour kōn kabun̄ eo aō, bōtaab ikar barāinwōt jab kōņaan jeļā kajjien āinwōt elej, jān an lōn̄ iaan armej rein kar im̧aanļo̧k ān̄inn̄in eō “Mormon” ippa iaar errā kake. Iaar bar ron̄ elōn̄ membōr ro an Kabun̄ in rej kūr wōt er im membōr ro jet an Kabun̄ in “Mormon ro” ilo kweilo̧k ko rellōn̄ im ilo jekjek ko jet.
Ikar lo eō make kajjitōk eļan̄n̄e kōjerbal likio in etan Kabun̄ in ekar lukkuun in aorōk n̄e ļōmņak ko aolep men ko jet. Āt in “Mormon”, ālkin men otemjej, ekar em̧m̧an ilo kōļmenļo̧kjeņ ko an elōn̄ armej ro—erom juon “Mormon” ekar kōjeraam̧m̧an eō. Ak n̄an bar riiti ekōnono eo an Būreejtōn Nelson, kar im̧we eō bwe menin elukkuun aorōk, men̄e ekar kōm̧m̧ane jet apan̄ ko ilo bwebwenato. Kōn menin iaar bar kallim̧uri eō make.
Juon Iien n̄an Kam̧ool kōn Kraist
Iien eo tok juon ikar kōjerbal liko in etan Kabun̄ in, ikar loļo̧k juon m̧ōtta ilo juon m̧ōn jar ilo bar juon kabun̄. Juon ekar itok n̄an eō im kōn juon ettōn̄ dikdik kar kajjitōk eļan̄n̄e ikar juon Mormon. Iaar ba, “Ij juon membōr in Kabun̄ eo an Jisōs Kraist im Armej ro Rekwojarjar ilo Raan-ko Āliktata.” Ekar jino kajjitōkin eō jet kajjitōk ko, kajjojo kajjitōk rekar jino kōn: “Kabun̄ in Mormonej ke tōmak … ?” Im kajjojo iien, ij jino uwaak eo aō kōn naan eo: “Ilo Kabun̄ eo an Kraist kar kōjepļaaktok, kōmij tōmak … ?”
Bwebwenato in ekar wōnm̧aanļo̧k āinwōt in emen ak ļalem kōttan. Ke eaar jeļā bwe iaar jab bōk taitōļ eo “Mormon,” eaar kajju kajjitōk ippa, “Kwojjab Mormon ke?”
Kōn menin iaar kajjitōk ippān eļan̄n̄e ejeļā wōn eo kar Mormon—ekar jab jeļā, iaar ba n̄an e ke Mormon ekar juon rikanaan, juon rikōjparok bwebwenato, juon ritariņae eutiej, im juon m̧ōttan rikien ilo Amedka ko etto. Ij utiej n̄an koba ippān juon em̧m̧aan me ekar wujelpļo̧k n̄an jerbal in jipan̄ n̄an Anij im ro jet.
“Bōtaab,” iaar wōnm̧aanļo̧k wōt, “Mormon eaar jab mej kōn jerawiwi ko aō. Mormon eaar jab toorļo̧k bōtōktōkin kōn n̄a ak en̄taan ilo Gethsemane ak mej ioon dōbwāāl eo. Mormon ejjab aō Anij. Jisōs Kraist ej aō Anij im aō Rilo̧mo̧o̧r. E ej aō Ripinmuur. Im ej kōn Etan me ikōņaan bwe ren jeļā kajjiō ilo raan kein āliktata, im ej kōn Etan ij kōjatdikdik bwe rej jeļā kajjiō rainin.”
Iaar en̄jake an kam̧ool eo an Jetōb jipan̄ eō ilo naan in kam̧ool in ekadu n̄an in m̧ōtta ekāāl. Ālkin jejjo jekōn in ikōn̄ ko, ekar ba, “Em̧ōj, kwoj juon Kūrjin ke?”
Iaar uwaak, “aaet, ij juon Kūrjin,” “im juon membōr in Kabun̄ eo an Kraist kar jepļaaktok.”
Pukōt n̄an ļoor naan in kōmeļeļe eo an rikanaan eo ekar āinwōt pidodo, bōtaab ekar aikuji eļapļo̧k kijejeto jān aō kar kōtmene. Ij kabde wōt jab wānōk ilo ļoor aolep men ko me kajjitōk ippa n̄an kōm̧m̧ani. Bōtaab ilo aolep jekjek ko, ij kiiō kanooj lale n̄an kōjerbal likio in etan Kabun̄ in.
Ij kam̧m̧oolol kōn Jetōb eo me ij en̄jake n̄e ij kam̧ool n̄an ro jet kōn aō Rilo̧mo̧o̧r im aō membōr ilo Kabun̄ eo An. Kiiō ewōr juon aō wāween eļap n̄an lukkuun kam̧ool kōn E im Kabun̄ eo An ekar jepļaaktok jabdewōt iien kajjitōk ippa kōn aō juon “Mormon.”