Ua Na’o Tusiga Faatekinolosi: Autalavou Matutua
Mauaina o le Faamoemoe i le Totonugalemu
Ina ua taia malosi Italia e le KOVITI-19, sa ou maua se mafuaaga e pipiimau ai i le faamoemoe.
E alala le tusitala i Catanzaro, Italia
Ou te fiafia i upu faamafanafana na faasoa atu e Iesu i ona soo ina ua mavae Lona Toetu: “Ia i ai le filemu ia te outou” (Ioane 20:19). Pe le ofoofogia ea le folafola atu e le aunoa e lo tatou Faaola i ona soo le filemu? O se aafiaga faapitoa, sa toe faamanatu lata mai ai ia te au lenei upumoni.
Popole ma le Faaasuina
I se tasi po a o matamata i le TV, sa talanoa le au fai talafou e uiga i le KOVITI-19 ma lona aafiaga i Italia, lea ou te nofo ai. Sa latou talanoa e uiga i le maualuga o le fuainumera o tagata na maliliu mai le vairasi ma le aofaiga faatupulaia o i latou ua faamaonia ua aafia ai. E ui ina sa lofituina, ae sa ou le popole tele i ai i lena taimi. Ae pe a ma le lua vaiaso mulimuli ane, ua matua sili atu le leaga ua oo i ai, ma sa faapena foi ma lo’u popolevale.
Sa ou lagonaina le faanoanoa ma le atuatuvale i le lotolotoi o na mea uma. Sa ou popole ina ne’i o’u ma’i. Ma o le taimi muamua lea i lou olaga, sa ou fefe ai ou te alu e faigaluega. Sa tatau ona ou faia totigilima ma se ufimata i soo se taimi lava ou te alu ai i fafo. O se vaiaso mulimuli ane, sa tapu ai le vavao i lo matou atunuu atoa ma sa poloaiina tagata uma ia faaasuina.
I le aluga o lenei taimi sa lei faatagaina i matou e tuua o matou fale sei vagana le faia o se faatauga e taitasi i le vaiaso. Sa faigata le nonofo ai pea i totonu. O sauniga uma lava a le Ekalesia sa taofia mo se taimi le tumau, ma a o o’u faanoanoa ai i lena mea, o le mea na sili ona ou faavauvau ai o le taimi lea na tapunia ai malumalu ona sa ou fuafua e auai i le faamauga o se aiga sa ou aoaoina i la’u misiona. Sa ou lagona le loto nutimomoia ma le leai o se faamoemoe ona o tulaga i le lalolagi.
Ootia i Musika
I se tasi taeao ao ou faitau i tusitusiga paia ma faalogologo i se pese na taua o le “Filemu ia Keriso,” sa ou tatalo ma ole atu i le Tama Faalelagi, “E mafai faapefea ona ou pipiimau pea i le faamoemoe i lenei taimi faigata?”
Ma o le taimi lena na amata ai ona ou gauai atu i upu o le pese:
O lo tatou
faamoemoe,
Ma le malosi
Pe a vaivai.
O Ia le malutaga
I afa fita.
A leai se filemu,
O loo i ai le filemu ia Keriso.1
Sa ou lagona le molimau mai o le Agaga ia te au e moni nei upu. Sa ou tilotilo atu i lau pine faifeautalai tuai ma faalogo i nei upu i lou mafaufau: “Romina, ou te manao ia e maua le filemu lava lea e tasi na e tuuina atu i isi i lau misiona e ala i le faasoa atu o la’u savali o le faamoemoe. O le a lelei mea uma. Ou te le tuua na o oe.”
O lea la, ou te fia faasoa atu lena savali o le faamoemoe! E ui ina sa ou lagonaina le fefe tele ma le popole i lenei taimi o faigata i le lalolagi, ae ou te iloa moni lava o Iesu Keriso, o loo i ai le faamoemoe! Liliu Atu ia te Ia. Faalogo ia te Ia. Mulimuli ia te Ia. E mafai ona tatou maua le filemu ia te Ia. E i ai le mana i le talitonu ia te ia, ma a e faia, o le a ia tuuina atu ia te oe le malosi e tumau ai i le faamoemoe (tagai Eteru 12:4).
Pipiimau i le Faamoemoe
I le lana saunoaga e uiga i le faamoemoe, na aoao mai ai Elder Dieter F. Uchtdorf o le Korama a Aposetolo e Toasefululua, “Faamoemoe i le Atua, o Lona agalelei, ma Lona mana e toe faafouina ai i tatou i le lototele i taimi o luitau faigata.”2 Po o le a le taufaafefe e ono i ai lenei taimi, e mafai lava ona tatou filifili le lototele ma faalagolago i folafolaga a le Alii. Pe a luitauina le olaga, tatou te le tau ole atu i le Tama Faalelagi ina ia suia o tatou tulaga, nai lo lena, e mafai ona tatou talosagaina o ia e sui o tatou uiga faaalia. E mafai ona tatou aoao ma tuputupu ae i soo se tulaga lava.
Ou te iloa o loo faatasi le Atua ma i tatou ma e alofa o Ia i Ana fanau—e oo lava ia i tatou o loo i le totonugalemu o se faama’i oti. Ou te iloa e ala mai ia te Ia, o le a lelei mea uma. Ma ou te iloa e mafai ona ou pipiimau i le filemu lea e sau mai le talitonu ia Iesu Keriso. Ona o Lana Togiola e le iu, ou te le tau fetaia’i ai ma faigata na o a’u.