Ua Na’o Tusiga Faatekinolosi: Autalavou Matutua

Faia o Galuega Paia i le Kuarenitini

Saunia e Kaith Ashley Moranf

A o tapunia ai malumalu, e mafai ona faaauauina lo tatou fesoasoani i le galuega paia mai le fale.

E alaala le tusitala i Manila, Filipaina.

Ou te lei faamoemoe e faalogo i upu e pei o nei na faasoa mai e le Au Peresitene Sili i le masina ua tea: “Ina ua uma ona iloiloina ma le totoa ma le agaga tatalo, ma se naunautaiga ina ia avea ma tagatanuu i le lalolagi, ua tonu ai ia i matou e taofi uma a tatou gaoioiga i le malumalu.”¹

Atonu e pei o au, o loo e tau mafaufau pe faapefea ona e feagai ma taimi faigata i le taimi nei e aunoa ma nei nofoaga paia o le filemu. O iinei i le atu Filipaina, na tapunia ai malumalu a o lei faatinoina le kuarenitini a le nuu, o lea sa ou naunau ai lava e toe foi mai i le maota o le Alii mo se taimi umi.

Ae ua ou iloaina lava se mea taua a o kuarenitini. E ui lava ina tapunia faitotoa o le malumalu, ae o le galuega o le sauniaina o sauniga e le o punitia. O loo i ai pea o tatou tuaa i le isi itu o le veli, o loo faatalitali mai mo i tatou e aoao atili e uiga ia i latou. Afai o loo e sailia ni auala e valaaulia ai lagona paia o auaunaga i le malumalu i totonu o lou aiga, o ni nai manatu nei:

Suesue i le gafa o lou aiga i le FamilySearch.org.
Taumafai e fai le faasinoupu o igoa. E le iu lona tauia nai lo taaloga faavitio!
Faaaoga tekinolosi e fesootai ai ma aiga o loo soifua.
Tusi i lalo ni tala o lou lava aiga.

Ua ou matauina le auala e “liliu ai loto” o tagata o lo’u aiga, e pei ona faamatalaina i le Malaki 4:6, ma faasaoina mai ai i matou mai le ita, musua, ma le leai o se faamoemoe. Ma e ui lava e le o se mea malie le kuarenitini, ae ou te faafetai mo le avanoa ua tuuina mai ai ia te au e fesoasoani ai i le faiga o mea e tatau ona fai mo le malumalu.

E mafai ona avea lenei mea ma se taimi paia i o tatou olaga. Atonu o lenei faama’i oti o le a faamanatu mai ai ia i tatou le taua o malumalu. Atonu o le a tatou talisapaia ai le avanoa e asiasi atili atu i le malumalu nai lo le taimi muamua. E pei ona ta’ua mai i le faasilasilaga a le Au Peresitene Sili, “O se fetuunaiga le tumau lenei, ma matou te tulimatai atu i le aso o le a toe tatala ai malumalu.”²

E le mafai ona ou faatali mo le aso o le a mafai ai ona tatou toe tuu atu sauniga faaola i o tatou tuaa! Seia oo mai i lena aso, o loo tele lava galuega e mafai ona tatou faia.

Faamanuiaga o le Faamalologa

Na saunoa mai Elder Dale G. Renlund o le Korama a Aposetolo e Toasefululua e faapea “a o tatou auai i le faatinoina o talafaasolopito o aiga ma galuega o le malumalu i le aso, o ia i tatou lava … le aia tatau i faamanuiaga o le ‘faamalologa’ na folafola mai e perofeta ma aposetolo. … O lenei lisi umi e aofia ai faamanuiaga nei:

Faateleina le malamalama e uiga i le Faaola ma Lana taulaga togiola;
Faateleina le tosinaga a le Agaga Paia e lagona ai le malosiaga ma le taitaiga mo tatou lava olaga;
Faateleina le faatuatua, ina ia mafai ona faalolotoina ma tumau le liuaina i le Faaola;
Faateleina le tomai ma le faaosofia e aoao ai ma salamo ona o le malamalama po o ai i tatou, o fea tatou te o mai ai, ma se vaaiga manino i le mea tatou te o i ai;
Faateleina le faaleleia, faapaiaina, ma le puleaina o faatosinaga i o tatou loto;
Faateleina le olioli e ala i se tomai faateleina e lagona ai le alofa o le Alii;
Faateleina faamanuiaga faaleaiga, e tusa lava po o a o tatou tulaga faaleaiga i le taimi nei, tuanai, po o le lumanai pe o le a foi le le atoatoa e ono i ai tatou gafa faaleaiga;
Faateleina le alofa ma le talisapaia mo tuaa ma tagata soifua o aiga, ina ia tatou le toe lagona le tuuatoatasi;
Faateleina le mana e iloatino ai vaega e manaomia ona faamaloloina ma o lea la, faatasi ai ma le fesoasoaniga a le Alii, e auauna atu ai i isi;
Faateleina le puipuiga mai faaosoosoga ma faatosinaga malolosi a le fili; ma le
Fesoasoani faateleina e fonofono ai loto atuatuvale, nutimomomo, po o le loto popole ma faaatoatoa e ua faamanualia “(”Galuega o Talafaasolopito o Aiga ma le Malumalu: Faamauga ma le Faamalologa, “ Ensign po o le Liahona, Me 2018, 47).