Dijitol Nomo: Blong Ol Yang Adalt
Fofala Lesen abaot Laet blong Ol Taem blong Tudak
Taem we wol sik ia i stap hang olsem wan klaod blong tudak ova long wol ia, i gat plante wei yet blong letem laet i saen i kam.
Hem we i raet i stap laef long Vorones Oblast, Rasia.
I no longtaem i pas, mi tekem dog blong mi i go wokbaot, nao mi luk wan grei klaod i stap we ol laet blong saen i stikim hem i go tru. Hem i rimaenem mi long wol sik ia we i stap gohed. Nomata ol situesen i mekem se i luk se ol samting oli tudak mo oli mekem man i fraet, semmak olsem klaod ia, lav we Lod i gat long yumi i strong moa bitim hemia, i semmak olsem san.
Wan Inglis toktok i stap talem se: “Evri klaod i gat wan silva laen raon long hem,” we i minim se evri samting we i save kam agensem yumi i stap tijim wan samting long yumi we bae yumi tekem gud aot long hem. Taem mi bin stap tingting abaot wanem i bin helpem mi blong stap kwaet long ol las manis ia, mo wanem nao i no bin help tumas, mi bin luksave se i gat fofala trutok we mi filim se bae i gohed blong blesem laef blong mi, afta we hadtaem ia i finis.
1. Yumi Stap Sef Taem Yumi Folem Profet
Ol nius long sosol media abaot en blong wol mo ol giaman nius ripot abaot fasin blong krietem sam rod blong kilim vaeres ia oli no mekem mi mi filim gud moa abaot laef. Iven sapos ol mesej ia oli blong helpem ol pipol blong stap sef mo helti, oli jes mekem mi mi gat moa fraet bitim we mi fraet finis. Eksampol: afta we mi luk nambasikis stori abaot wei we samfala lif oli sapos blong kilimded koronavaeres, mi tingbaot se mi tingting tumas se mi mi gat inaf defren kaen lif blong kuk we i stap long kabod blong mi, antap long wari ia se bae mi ded o no.
Long taem blong wan jeneral konfrens, tu yia i pas, Presiden Russel M. Nelson i bin invaetem yumi blong tekpat long wan 10 dei taem blong livim kakae, mo no luk media we i stap tekem ol nogud mo rabis tingting i kam long maen.1 Kaonsel blong hem i ring olsem wan woning long mi, mekem se mi nomo yusum sam ap blong sosol media we i bin stap kakae taem blong mi. Mi kam moa hapi mo mi nomo wari tumas.
Naoia, mi luksave se mi nidim blong klinap long ol evri dei fasin blong mi long saed blong media. Mi luklukbak wetem sapraes mo mi tingting: ?Presiden Nelson i bin save, long tetaem ia, se sosol media bae i wan ples blong givap hop mo givim nogud tingting tedei, long taem ia blong bigfala hadtaem? I tru. Yumi stap sef taem yumi folem profet. Ol toktok blong ol lida blong yumi, blong Jos, oli olsem wan laet blong san we i saen i katemaot ol samting we i mekem tingting i fasfas mo i saenem rod i go blong gat pis.
2. Fasin blong Stap Rere I Faet Agensem Fraet
Wan nara samting we i bin mekem se mi no filim gud, i blong harem ol pipol, we, olsem long taem blong Noa, oli stap jikim ol narawan from se oli stap rere mo oli tok stret. Mi ting se sam pipol oli bin developem ol fasin we oli no kea long wanem i kam long fiuja. Olgeta we oli waes tru, oli stap folem advaes blong ol profet mo oli traem evri wei blong oli dipen long olgetawan.
Blong plante yia, ol lida blong Jos oli bin tijim yumi blong yumi no stap gat kaon, blong yumi skul gud blong save lukaot gud yumi mo ol nara man, blong yumi gat kaekae mo wota i stap long storej, mo blong sevem mane sapos i posibol. Mi save se evri situesen i defren, mo sam kantri oli no givim raet long ol sitisen blong olgeta blong storem kaekae mo ol nara saplae i stap. Be iven long ol kaen situesen ia, i luk se wanwan long yumi i stap faenem wan samting blong mekem blong rere gud moa from fiuja.
Mi filim sef moa taem mi mekem efot ia blong stap obei mo save kam kolosap long Lod wetem tras taem mi stap askem help. Blong rere olsem, i olsem wan nara laet blong san, we i katemaot fraet mo i haelaetem hop.
3. Fasin blong Man I Mekem Samting I Defren
Wol sik ia i mekem mi mi talem tangkyu moa from ol pipol we oli stap leftemap tingting blong mi wetem ol mesej we oli leftemap tingting blong man, we oli givim ol niu lukluk long saed blong spirit, mo i givim wan helti fasin blong stap laf smol. Ol dia fren ia, oltaem oli mekem dei blong mi i naes. Oli stap mekem mi mi tingbaot se yumi save jusum olsem wanem bae yumi fesem wanem i stap hapen raon long yumi.
Mi bin traem blong stap folem eksampol ia taem we oli stopem ol miting blong Jos. Be, mi nomo foldaon long ol krangke kwestin ia se “from wanem” mo “olsem wanem,” be mi jusum blong lukluk nomo long gud saed blong fasin blong lanem samting long hom we i senta. Mi save luk naoia se, blong developem wan gudfala fasin wetem ful tingting, i nomata se samtaem i had, hemia i bin helpem mi blong stap moa strong long saed blong spirit bitim se sapos mi jes letem ol konkon samting oli winim mi. Olsem wan nambatri laet blong san, wan gudfala fasin i save ronemaot fasin blong gat tu tingting, mo i mekem sol blong yumi i stap gud oltaem.
4. Tabu Spirit I Wan Strong Patna
Wan dei, mi filim se mi stap miwan mo mi no hapi, nao mi disaed se bae mi lisin long Tabenakol Kwaea onlaen. Oltaem miusik i bin helpem mi blong filim paoa blong Tabu Spirit. I gat wan laef storian long janel ia, mo i bin gud tumas blong luk ol pipol oli stap talemaot lav mo tangkyu blong olgeta, raon long wol! Mi filim se mi joen wetem olgeta. Taem we paoa blong Tabu Spirit i bin leftemap hat blong mi we i bin stap soa, mi kam blong smael moa mo rilaks.
Mi bin luk plante we plante taem, we sapos mi traehad blong invaetem Tabu Spirit insaed long laef blong mi, bae i helpem mi wetem wanem we mi nidim. Hem i wan patna we i strong, we i wantem tumas blong tekem ol presen ia we oli pis, kamfot mo andastaning i kam long yumi. Olsem wan laet blong san, Hem i save ronemaot wanem i no sua tumas, mo i soemaot o talemaot wanem we i tru.
Faenem Laet blong San
Lod i moa strong bitim eni hadtaem. Olsem we nambatu ves blong hym namba 89 long Inglis Hymbuk i talem:
Lod i laet blong mi; klaod i save kam,
Fet we i strong moa i lukluk antap tru long ol skae
Ples we Jisas i stap rul long glori.
?Nao hao nao bae mi save gohed blong stap long tudak?2
Mi wantem tumas se bae yumi go wokbaot smol tedei. Yumi save lukluk antap i go long skae, swim long san we i saen, mo tokbaot ol trutok we oli givim bigfala laet long laef blong yumi. Mi mi sua se bae yufala i gat ol gudfala aedia blong serem laet ia wetem ol narawan. Maet yu save tingting long maen blong yu abaot wan wokbaot olsem long nekis taem we ol strong win oli fulap longwe. Lod i stap wetem yumi, mo yumi no nid blong fraet.