Dijitol Nomo: Blong Ol Yang Adalt
Stap Luk Fored blong Kasem Siling
I nomata we ol plan blong mifala i bin jenis, mitufala i bin kam kolosap moa mo kolosap moa long God.
Ol Model nao oli stanap long ol foto ia.
Hem we i raet i stap long Kanto, Japan.
Fiuja hasban blong mi, mo mi i sapos blong sil long Saporo Japan Tempol long manis ia. Afta, ol situesen oli stat blong jenis from koronavaeres ia. Wetem evri niu samting we i mekem se ol samting oli no sua i stap, bae mi askem God blong soem rod long mi taem mi prea, ridim ol skripja, mo stap lisin long ol toktok blong jeneral konfrens. Mi bin ripitim ol samting ia bakegen mo bakegen, taem mi bin stap mekem ol desisen abaot fiuja blong mi. Long en, ol tempol nao oli klos. Tedei, mitufala i stap wet yet blong mitufala i sil. Be mi bin luk olsem wanem God i bin helpem mitufala blong gotru long had taem ia.
Ol Blesing long Medel blong Taem Ia we I No Sua
Blong talem stret, eksperiens ia i bin strong tumas. Be mi bin luk plante blesing tu. Blong stap raetem ol samting long wan jenol i bin helpem mi blong luksave olgeta blesing ia mo i bin helpem mi long ol desisen long hadtaem ia.
Wan blesing we mi bin luk, i we wanem i joenem mi mo fiuja hasban blong mi, i kam strong moa. Hem mo mi i stap laef long ol defren ples, gat ol seperet laef, mo no save kam tugeta. Be mitufala i bin disaed blong prea tugeta mo tokbaot ol samting we mitufala i bin stap lanem aot long gospel stadi blong mifala. Mitufala i bin mekem ol desisen tugeta. Iven we, long bodi, mitufala i stap seperet, rilesensip blong mitufala i kam strong moa mo mitufala i luk se mitufala i stap kolosap long mitufala.
Stap Muv Fored
Long en, mitufala i bin disaed blong mared long gavman. Mi no save se wetaem nao bae mitufala i save sil long tempol, be mi stap luk fored from hemia.
Mi biliv se i gat fulap samting we yumi save lanem aot long wol sik ia. Mi trastem se Lod i gat wan plan blong gud blong yumi blong taem we i no save finis, i nomata wanem i stap hapen long wol raon long yumi—“hem i givim laef blong hem bakegen blong hem i save pulum evri man i kam long hem” (2 Nifae 26:24).
Mi biliv se Lod i stap wantem helpem yumi evriwan blong stap faenem hapines long taem blong strong taem ia. Mi mi faenem pis finis taem mi lukluk long ol blesing we mi gat. Sapos yu stap fesem ol semmak tes naoia, yu no givap. Iven wol sik ia, bae i save mekem testemoni blong yu i kam strong moa.