Dijitol Nomo: Blong Ol Yang Adalt

Stap Mekem Tabu Wok long Taem blong Kwarantin

I Kam long Kaith Ashley Moran

I nomata we ol tempol oli klos, yumi save gohed blong help wetem tabu wok long hom.

Hem we i raetem atikol ia i stap long Manila, long Filipin.

Mi neva ting se bae mi harem ol toktok olsem hemia we Fas Presidensi i bin serem long las manis: “Afta we mifala i bin tingting gud mo prea fulap, mo wetem wan tingting long hat blong yumi stap olsem ol wol sitisen we yumi save tekem responsabiliti, mifala i bin disaed se bae evri tempol wok oli stop.”¹

Mebi, olsem mi, yufala i stap askem yufalawan olsem wanem blong fesem taem tedei we i had, sapos i no gat ol tabu ples ia blong filim pis. Long ples ia, long Filipin, ol tempol oli klos iven bifo we gavman i putum wan komuniti kwarantin; mekem se hat blong mi i wantem gobak long haos blong Lod blong wan longfala taem nao.

Be mi luksave wan impoten samting taem mifala i stap long kwarantin. Iven we ol doa blong tempol oli klos, wok blong stap rere ol odinens, i no stop. Ol bubu blong yumi oli stap yet long nara saed blong vel, oli stap wet long yumi blong lanem moa abaot olgeta. Sapos yufala i stap lukaotem ol wei blong invaetem ol tabu filing ia blong tempol seves insaed long hom blong yu, hemia samfala aedia:

Lukluktru long famli tri blong yu long FamilySearch.org.
Traem mekem indeksing. !I tru! !I moa gud mo givim moa praes bitim ol vidio gem!
Yusum teknoloji blong toktok wetem ol famli we oli laef i stap.
Raetemdaon ol famli stori blong yuwan.

Mi bin luk olsem wanem ol aktiviti ia oli bin “tanem hat” blong ol memba blong famli blong mi, olsem we oli tokbaot long Malakae 4:6, mekem se mi no kroskros olbaot, mi no waet pej, mo mi gat hop. Mo i nomata we, blong stap long kwarantin i no wan gudfala samting, mi mi glad from janis ia we hem i givim long mi, blong help wetem ol homwok blong tempol.

Hemia i save stap olsem wan tabu taem long laef blong yumi. Maet wol sik ia bae i mekem yumi tingbaot olsem wanem ol tempol oli impoten. Mebi bae yumi glad long janis ia blong visitim tempol i moa bitim we yumi bin mekem bifo. Olsem we anaonsmen blong Fas Presidensi i bin talem: “Hemia i blong wan sot taem, mo yumi stap luk fored from dei ia we bae ol tempol oli open bakegen.”²

!Mi no save wet from dei ia we bae yumi save mekem ol odinens blong sevem ol bubu blong yumi bakegen! Kasem dei ia, i gat fulap wok we yumi save mekem yet.

Ol Blesing blong Hiling

Elda Dale G. Renlund, blong Kworom blong Olgeta Twelef Aposol, i bin talem se “taem yumi stap tekpat long wok blong famli histri mo tempol tedei, yumi stap klemem ol hiling blesing we ol profet mo ol aposol oli bin promesem. … Longfala lis ia i tekem olgeta blesing ia:

Save andastanem moa Sevya mo sakrifaes blong Hem we i pemaot man;
Gat Tabu Spirit i lidim moa blong filim paoa mo daereksen blong Hem long laef blong yumi;
Gat moa fet, mekem se fasin blong jenisim laef i kam long Sevya i kam moa strong mo moa stret;
Moa paoa mo strong tingting blong lanem samting mo sakem sin from se yumi andastanem moa huia yumi, yumi kam wea, mo yumi gat wan moa klia visen long weples yumi stap go long hem;
Gat moa paoa we oli gud moa, oli moa tabu, mo gat moa kontrol insaed long hat blong yumi;
Gat moa glad from yumi gat moa paoa blong filim lav blong Lod;
Gat moa famli blesing, nomata situesen blong naoia, bifo o fiuja, o nomata se famli tri blong yumi i no stret evriwan;
Gat moa lav mo tangkyu from ol bubu mo ol famli we oli stap laef, mekem se yumi nomo filim se yumi stap yumiwan;
Gat moa paoa blong luksave samting we i nid blong hil, mo olsem ia nao, wetem help blong Lod, yumi save givhan long ol narawan;
Gat moa proteksen long ol temtesen mo strong paoa blong enemi; mo
Moa help blong stretem ol hat we oli gat trabol, oli harem nogud o oli stap wari, mo mekem olgeta we oli gat soa, oli kam oraet bakegen” (“Famli Histri mo Tempol Wok: Siling mo Hiling,” Liahona, May 2018, 47).