Dijitol Nomo: Blong Ol Yang Adalt

5 Samting We I Sua long Wan Wol We I No Sua

I kam long Meg Yost

Ol faef trutok ia i save helpem yu tru long eni samting.

Fulap taem, laef i no folem plan nating. Hem i fulap long ol samting we i fasfas, tantanem, mo sapraes blong evriwan. ?So olsem wanem nao yumi save stap rere from fiuja taem yumi no save wanem bae i karem i kam?

Laki, i gat sam samting we yumi save dipen long hem oltaem. Ol trutok ia bae oli neva jenis. Oli save gaedem ol desisen blong yumi mo leftemap tingting blong yumi blong muv i go fored, nomata we rod we i stap long fored i luk olsem i tudak mo yumi no sua long hem.

Papa long Heven i lavem yu.

I nomata wanem i stap hapen long laef, oli lavem yu. Yu gat bigfala praes long Papa long Heven (luk long Doktrin mo Ol Kavenan 18:10). !Praes blong yu i semmak olsem fulap wol!¹

Maet bae yu filim se yu nogat valiu. Maet bae yu filim se laef blong yu i brokbrok, yu stap yuwan mo fraet. Maet bae yu filim se yu no klin inaf. Sista Joy D. Jones, Praemeri Jeneral Presiden, i bin eksplenem se, praes mo stap klin inaf i no semmak samting.² Iven taem yumi sin, praes blong yumi i bigwan yet. Hemia i wan risen from wanem Sevya i bin mekem Atonmen (luk long Doktrin mo Ol Kavenan 18:11–13). From se Hem i save se Hem i lavem yu, Hem i givim wan rod blong yu save kam klin bakegen.

Papa long Heven i gat wan plan blong yu.

Yu stap long wol ia from wan stamba tingting: blong kam olsem Papa long Heven mo Jisas Kraes mo gobak blong laef wetem Olgeta. Hemia i gol blong God blong yu, mo !bae Hem i helpem yu blong mekem!

Be hemia i no minim se bae oltaem i isi; bae yumi gohed blong fesem ol jalenj. Be yumi save sua long hemia se “samting bae oli wok tugeta blong gud blong olgeta we oli wokbaot long stret laef” (Doktrin mo Ol Kavenan 100:15).

Maet bae plan blong Hem blong laef blong yu i defren long plan blong yu, be yu save trastem se plan blong Hem bae i blong gud blong yu mo bae i lidim yu i go long hapines we i no save finis. Ridim ol gaedbuk blong laef: ol skripja, petriakel blesing blong yu, ol toktok blong ol profet blong tedei. Bae oli helpem yu blong andastanem moa plan blong Hem blong yu.

Afta folem daereksen blong Hem. Tae yumi stap obei long ol komanmen blong Hem, bae yumi gat pis mo gudfala laef (luk long Mosaea 2:22). “Stap glad,” olsem we Presiden Tomas S. Monson i bin talem. “Fiuja blong yu i saen semmak long fet blong yu.”³

Gol we i moa bigwan hem i laef we i no save finis.

Nomata we yu no sua long rod blong yumi tru long laef ia, ples we yumi stap go long hem i klia i stap. Taem yumi stap mekem ol desisen, yumi save askem, “?Hemia bae i lidim mi go wea?”⁴ Sapos hem i mekem yu tanem i go longwe long rod we i go long laef we i no save finis, hem i no raet joes.

Samtaem yumi bisi long ol smol desisen olsem homwok o wanem blong kakae long lanj. Yumi lusum lukluk ia blong stret stamba tingting blong yumi long laef—we i blong kam olsem papa mo mama blong yumi long heven. be, taem yumi stap go from gol ia, bae evri samting i ORAET. Mekem se gohed blong lukluk i go long taem we i no save finis.

Maet bae laef i no go olsem we yumi planem. Tru samting i we, bae i no go olsem nomo. Be ples we yumi stap go long hem nao i wanem we i moa impoten. Mekem sua se yu stap go from raet desisen, mo wetem help blong Lod, evri samting bae i wok gud. Bae Hem i gaedem yu.

Mi gat fridom blong joes.

Taem Papa long Heven i stap gaedem yumi long rod blong yumi, Hem i no stap talem long yumi evri samting we yumi mas mekem. Hem i givim paoa ia blong jusum, mo Hem i wantem yumi blong yusum.

Olsem we Lod i talem, “hem i no stret blong mi talemaot evri samting blong mekem; ol man oli mas wok wetem strong tingting long wan gud wok, mo mekem plante samting long tingting blong olgetawan nomo” (Doktrin mo Ol Kavenan 58:26–27). Long situesen ia, blong wok wetem strong tingting, i minim blong wok strong mo givim fultaem blong yu.

Maet samtaem, blong gat fridom blong jusum bae i n fil olsem wan kamfot. Samtaem yumi wantem nomo blong oli talem long yumi wanem blong mekem. Be long ril laef, fridom blong jusum i wan bigfala mo gudfala blesing. Hem i wan presen we i kam long God mo wan long ol samting we i mekem yumi olsem Hem. Hem i givim paoa long yumi.

?So wanem nao yu wantem wok long hem?

Papa long Heven i wantem yumi blong progres.

Wan long ol gudfala stamba tingting blong wok long hem i divelopmen blong yuwan. Oltaem i gat ol samting abaot yumiwan we yumi save mekem i kam antap moa, ol samting we yumi save lanem, mo ol skil we yumi save developem. I gat tu, ol kavenan we yumi nid blong mekem mo holemtaet.⁵

Elda Dale G. Renlund blong Kworom blong Olgeta Twelef Aposol i bin eksplenem olsem wanem progres blong yumi long rod ia i impoten: “God i no intres blong ol pikinini blong Hem oli kasem tijing mo oli stap olsem ol “animol blong haos” we oli stap obei nating nomo, we bae oli no kakae savat blong Hem long living rum blong selestial ples. No. God i wantem ol pikinini blong Hem blong groap long saed blong spirit mo joenem Hem long famli bisnis.”⁶

Rere long yuwan long ples we yu stap go long hem long taem we i no save finis taem yu stap kam bes yu we yu save kam olsem. Luksave ol skil we yu wantem developem mo ol presen long saed blong spirit we yu nidim blong kam moa olsem God.⁷ !Afta mekem wan plan blong developem ol samting ia! Mekem “ol masel blong yu long saed blong spirit” i kam moa strong tru long praktis.⁸

Taem yu fraet long laef, tingbaot se yu save kontrolem. Yu no stap yuwan. Yu yu gat paoa. Mo wetem Jisas Kraes, oli no save stopem yu. Hem bae i helpem yu blong kam evri samting we yu bon blong kam olsem.