Mi Stap Eksperiensem Fasin Ia blong Laekem Wan We I Semmak Seks long Mi—?Bae Ol Memba blong Jos I Welkamem Bak Mi?

I kam long Bouke “Bob” S. Ecoma Verstege

Long 27 Julae 2013, afta long wan longfala faet wetem sik blong stap fogetem samting, laef patna blong mi 25 yia i bin ded. Jay Elredge i wan dokta blong hat we ful wol i save long hem. Mitufala tugeta i bin go long ol misin blong Jos Ia blong Jisas Kraes Ia blong Ol Lata-dei Sent taem mitufala i bin moa yang be afta mitufala i go longwe long Jos from fasin ia blong laekem wan we i semmak seks.

Ded blong Jay, nomata we mi save bae i save hapen, i bin nogud tumas long mi. Mi filim hat blong i brok mo i lus mo mi stap miwan.

Taem mi stap draev i gobak long haos afta we mi mekem ol arenjmen blong fenerol, mi bin filim paoa blong Tabu Spirit i kavremap mi strong tumas i mekem mi mas stop long saed long rod. Mi save se God i stap toktok long mi, singaotem mi blong gobak long Hem, be mi bin no wantem. “?Yu no save luk se mi stap harem nogud?” Mi talemaot laod. “Mi no save fesem blong stap gobak long jos naoia.”

Be moa mi stap pusumbak, Spirit i pulum mi moa, mo stap invaetem mi blong gobak long jos.

?Bae Oli Akseptem Mi?

Mi wari bigwan blong gobak long jos. Mi no bin go long wan sakramen miting blong 25 yia. ?Bae oli akseptem mi yet? ?Bae mi akseptem olgeta? ?Bae bisop i talem wanem? Mi filim wari tumas mo tingting i no stap kwaet mo mi hevi wetem harem nogud yet.

Be testemoni blong mi long gospel i neva seksek truaot evri yia ia. Jay mo mi i lavem Jos mo ol prinsipol we oli lidim wok—speseli, jareti, sore, mo fogivnes. Mi save se Kraes i Sevya blong mi mo Jos blong Hem i Jos Ia blong Jisas Kraes blong Ol Lata-dei Sent. Mi bin save hemia stat long taem we mi bin jenisim laef mo baptaes blong mi taem mi gat 14 yia. Mi no rere blong tanem bak blong hemia naoia.

Long en, afta we mi hivimap evri strong tingting blong no fraet we i nid, mi ringim Linwood Wod long Niu Jesi, YSA, blong faenemaot wanem taem sakramen miting i stat long hem.

Taem Sandei i stap kam kolosap, enemi i putum fulap samting i blokem rod blong mi we bae i mekem i isi nomo long mi blong no go. O mi talem tangkyu tumas se Tabu Spirit i gohed blong pusum mi.

Mi bin filim fraet taem mi go insaed long bilding, be opening hym blong sakramen miting i talem bakegen long mi wetem strong tingting se mi stap long hom bakegen. Hym ia “Kam Kam Ol Sent” (STSP, pej 2) i bin invaetem Spirit wetem fulap paoa i mekem ol wota blong ae blong mi i ron daon long fes blong mi. Mi save wantaem se Papa long Heven i save long mi mo bigfala harem nogud we mi stap filim.

Hym i bin kam olsem wan long ol antem blong Jos, be i bin kam olsem wan antem blong miwan tu.

“Kam,” hym ia i invaetem mi. “Nomata yu luk se rod hem i had, God i givim sapot.”

Rod blong mi i bin had. Be gladhat blong God i bin kam long mi olsem we Hem i bin promesem.

Bisop Darren Bird mo olgeta evriwan long kongregesen i bin gud tumas blong welkamem mi. Oli bin akseptem mi olsem brata blong olgeta long Kraes.

Blong stretem mi wetem God, tru long Kraes.

Ol toktok ia blong “ Kam Kam Ol Sent” i gat wan mining we i moa bigwan long mi, taem mi filim Papa long Heven i stap lidim mi long olsem wanem bae mi gohed.

Bae yumi kasem ples we God Hem i bin givim long yumi.
Longwe longwe long Wes,
Long ples ia bae i no gat man i save kam blong spolem o mekem yumi fraet;
Long ples ia Ol Sent oli kasem blesing.

Mi bin go long wes mo pem wan haos long Fountain Hills, Arizona, YSA, long ples ia we mi mitim Bisop Jerry Olson. Taem mi bin askem blong luk hem mo sekhan wetem hem, Spirit i talem long mi se man ia bae i help blong karembak mi fulwan i kambak long jos.

Taem mi stat blong stap go luk bisop mo statem fasin ia blong stretem miwan wetem Papa long Heven, mi bin witnesem fulap merikel long saed blong spirit. Mi fri blong serem samting wetem bisop, mo mi talem tangkyu tumas from hemia. Hem i talem se hemia i helpem hem blong andastanem moa weaples mi bin stap long hem mo weaples mi stap long hem naoia long rilesensip blong mi wetem God. Mo tu, hem i talem long mi wetem lav se hemia i fas taem blong hem blong hem i save gat janis blong givhan long wan man we i stap laekem wan we i semmak seks, mo Hem i bin askem blong mi save gat fasin blong wet longtaem mo fogivnes sapos hem i talem o mekem eni samting we bae i mekem mi filim nogud truaot long rod blong kaonsel ia.

Mi talem tangkyu from onesti blong hem mo talem, “Be, hem i fas taem blong mi tu. Bae yumitu lan tugeta.”

!Mo hemia i wan stat blong wan gudfala rod mo frensip!

I no longtaem, mi bin gat wan plan blong folem long olsem wanem blong kam olsem wan memba bakegen. Mi bin akseptem kaonsel we i fulap long lav mo prea wetem wan hat blong talem tangkyu mo mi statem kaonsel ia.

Pis Insaed long Tempol

Afta, taem mi bin stap folem kaonsel mo wok had blong kam moa kolosap long Kraes, mi bin kasem restoresen blong prishud blong mi mo ol tempol blesing mo akseptem wan koling blong wok long kworom blong ol elda. Long tabu tempol, taem mi toktok wetem Papa long Heven, Hem i soem long mi hamas Hem i lavem evri pikinini blong Hem. Mi bin filim pis mo wan bigfala gladhat ia blong mekem Hem i hapi long mi.

Sam manis afta, oli singaotem wan niu bisop, we mi bin developem wan frensip wetem lav tu, wetem hem. Bisop Larry Radford i bin save situesen blong mi tu, mo i talem tangkyu from seves blong mi long kworom blong ol elda, we hem i talem se mi bin givim seves wetem lav mo fasin blong givim mi fulwan i go long kworom mo tu,—mo moa impoten—long God. Ol kaen toktok blong hem mo blong stap leftemap tingting blong mi i bin helpem mi blong filim se Lod mo ol Sent we oli stap wetem mi oli glad long seves blong mi.

Naoia mi givim seves wetem fet olsem wod klak.

Blong Stap Andastanem Huia Mi.

Blong gat fasin ia blong laekem wan we i semmak seks mo blong stap olsem wan aktiv memba blong Jos i no isi oltaem. Be taem mi putum evri fet mo tras blong mi long God, mi save filim Hem we i stap mekem mi kam moa strong. Ol man blong talem nogud man bae oli no tingting tu blong talem se mi stap stap tru long huia mi o se mi stap mekem komuniti blong olgeta we oli gat fasin ia blong stap laekem wan we i semmak seks, i no hapi.

Mi andastanem kros blong olgeta, mo yu luk gud nomo se mi nogat evri ansa. Mi save tokbaot eksperiens blong miwan nomo. Mo eksperiens ia i tijim mi hemia: Mi mi wan boe blong Papa long Heven, wan pikinini blong God. Mo hemia nao i wan nem ia nomo we i gat mining long mi. Olsem wan risal, mi traem blong no letem ol nem we wol i save givim blong eksplenem huia mi. Mi fraet se bae i stopem paoa blong mi long hamas mi save mekem mo fasin blong mi we i no save finis blong stap progres.

Setan i waes tumas. Hem i save se taem oli yusum ol nem, hem i save seraotem yumi olsem wan komuniti mo olsem wan jos.

Wetem lukluk mo tingting ia long maen, ol joes we mi mekem i no from fasin blong mi laekem wan we i semmak seks, be, long olsem wanem blong save stap olsem wan tru disaepol blong Kraes wetem fasin ia blong laekem wan we i semmak seks. Olsem Nifae i bin talem:

“O Lod, mi bin trastem yu, mo bae mi trastem yu blong oltaem. Bae mi no putum tras blong mi long han blong bodi blong mit mo bun. …

“… Mi save se God bae i glad blong givim eni samting long man we i askem samting. Yes, God blong mi bae i givim long mi, sapos mi no askem eni samting we i rong; from hemia, bae mi singaot laod long yu; yes, bae mi singaot long yu, God blong mi, strong ston blong stret mo gud fasin blong mi. Luk, voes blong mi bae i go antap long yu blong oltaem, ston blong mi mo God blong mi we i no gat en” (2 Nifae 4:34–35).

Lav blong Ol Sent We Oli Stap Wetem Mi

Truaot long taem blong mi we mi kambak, mi bin filim kompanionsip we i fulap long lav blong ol lida mo sent we oli stap wetem mi. Mi faenem wan ples we mi save traehad long hem. Mi bin faenem long medel blong ol fasin blong Kraes, oltaem mi putum tugeta wetem fet blong mi: sore, lav mo sore blong God, fasin blong andastan, mo, antap long evriwan, lav.

Taem mi stap traehad folem rod wetem Sevya blong mi, mi bin filim kamfot mo pis taem mi tanem mi i go long Hem, mo save se mi no stap wokbaot long rod ia miwan. Sam bisop oli bin stap long saed blong mi. Ol memba blong kworom blong mi. Ol sista insaed long wod. Mi iven gat wan yang man long wod we i askem mi sapos mi save odenem olsem wan pris. Kaen invitesen ia i bin tajem mi bigwan. Hem i bin luk mi olsem wan man we i holem prishud blong God we i save eksasaesem prishud insaed long seves we i givim long ol nara wan.

Ol janis ia blong givim seves mo wosip wetem ol Sent we oli stap wetem mi i bin leftemap tingting blong mi—tugeta wetem ol plante blesing we mi bin kasem long Lod—i helpem mi blong eksperiensem lav, fasin blong andastan, mo fasin blong akseptem olsem we mi bin nidim.

Sevya i talem: “Mi no save lego yufala i stap nomo olsem. Bambae mi mi save kambak bakegen long yufala.” (Jon 14:18). Ol toktok ia oli tru. Mi bin nidim kamfot, mo Hem i kam long mi, fulap moa bitim we mi save tingting long hem.