Dijitol Nomo: Blong Ol Yang Adalt
Olsem Wanem, From Wanem, Wetaem mo Wea blong Stap Sevem Mane
Atikol ia oli rere long hem wetem help mo advaes blong E. Jeffrey Hill, PhD, wan man blong stadi long ol faenens blong famli.
Nomata we yu luk mane olsem wan samting we i kam long heven o olsem wan nid blong devel nomo, hem i wan samting we i nid. Be olsem ol yang adalt, fulap taem yumi filim se yumi neva gat inaf blong ol evri dei nid blong yumi, !no iven wan imejensi we yu no luk i stap kam! Hemia i from wanem i impoten tumas blong gat ol seving.
Blong helpem yu, hemia faef tingting blong helpem yu blong stat blong bildim ol seving blong yu eli mekem se yu save enjoem ol blesing blong stanap strong long saed blong faenens afta.
-
?Olsem wanem? Stat taem yu mekem wan bajet. Planem gud hamas long mane we yu kasem bae i go blong pem taeting mo ol nid blong yu (olsem ol bil, kakae, kaon, mo i gohed.). Wanem we i stap bae i givim yu wan aedia long hamas yu save sevem evri manis mo hamas i stap blong spendem long ol samting we yu wantem.
Jekem wetem bank blong yu abaot ol wei blong mekem ol seving i moa isi, olsem blong putum wan namba blong pesen blong mane we yu stap winim i go long ol seving akaon blong yu evri manis. Long wei ia, !yu no nid blong tingbaot nomo! Mo mekem sua blong mek yus long eni kaen seving plan blong taem yu ritae we masta blong yu i save givim.
-
?Wetaem? !Naoia! … O smol we yu save mekem, hem i stat wetem nekis pei blong yu. Maet bae yu filim se yu no gat inaf rum long bajet blong yu blong sevem mane naoia, be taem yu stat blong sevem mane, nomata we hem i smol nomo evri manis, !bae yu stat blong bildim wan fasin blong evri dei we bae i blesem yu long fiuja!
-
?Hamas? Sevem fulap we yu save sevem wetem bajet blong yu. Sapos mane blong yu i no tumas o yu gat kaon, maet yu wantem blong sevem kasem 5 pesen evri manis. Be taem mane we yu stap kasem i kam moa bigwan, yu save mekem i moa bigwan kasem 10 o 15 pesen o iven moa taem taem i stap go. Ating wan gudfala gol i blong gat wan imejensi saplae blong mane blong wan manis. Afta stat blong sevem inaf blong kavremap 3 kasem 6 manis mo gohed blong stap bildim.
-
?Weaples? Hem i wan gud aedia blong putum ol seving blong yu i go long wan akaon blong hemwan—hemia bae i mekem yu no kasem temtesen blong spendem long ol samting blong evri dei. Sapos yu stap sevem mane blong wan samting, traem blong setemap wan stret akaon we save putum nem long hem (olsem “amjea” o “laptop”) blong rimaenem yuwan long gol blong yu.
Sapos yu gat ol kwestin yet, mit wetem wan advaesa blong bank. Oli save helpem yu blong mekem ol gol blong seving folem faenens situesen blong yu.
Antap long evri samting, tingbaot se fas step blong gat sekiuriti long saed blong faenens, !i blong pem taeting blong yu faswan! Gat tras long promes blong Lod se bae Hem i “openem ol windo blong heven long yufala, mo kapsaetem antap long yufala, wan blesing we bae i no gat inaf rum blong tekem” (Malakae 3:10; 3 Nifae 24:10). Samtaem yumi stap tingting se ol blesing ia we bae i kam bae i olsem mane we i stap ren long yumi, be tingbaot long maen blong yu se ol blesing ia i save ol blesing long saed blong spirit tu, (luk long David A. Bednar, “The Windows of Heaven,” Liahona, Nov. 2013, 17–20).
Lod i bin talem se “stamba tingting [blong Hem i] blong lukluk long ol sent [blong Hem]” (Doktrin mo Ol Kavenan 104:15). Blong sevem mane bae i luk olsem i had—speseli olsem wan yang adalt, taem fulap long ol pat blong laef blong yu i luk olsem i no strong—be smosmol, yu save mekem. Papa long Heven bae i helpem yu blong jenisim ol evri dei fasin blong yu mo ol praeoriti blong yu blong save dipen long yuwan mo stap sef long saed blong faenens.