Sa Digital Lamang

Giunsa nako Pagpangandam alang sa Templo sa India

Ni Yeshwanth Kosireddy

Ganahan gayud ko sukad nga muadto sa templo. Karon nga ang propeta mipahibalo sa umaabut nga templo sa India, ako nagpaabut sa higayon nga makadawat ko sa mga ordinansa dinhi.

Nagtubo ko sa India, ang akong pamilya ug ako mga Hindu. Kanunay kong gipalibutan sa pagtuo nga anaay daghang mga dios nga simbahon. Niadtong bata pa ko, aduna usab akoy mga higala nga mga Kristiyano. Misulti sila kanako mahitungod sa usa lamang ka Dios kinsa milalang sa kalibutan ug sa tanang katawhan. Nagsugod ko sa paghunahuna nganong ako nagsimba og daghang mga dios, kon ang uban mituo sa usa ra.

Sa dihang high school pa ko, aduna koy pipila ka bati nga mga kinaiya. Kusog kong moinum, bastos ko, ug ang akong pamilya nasuko sa akong kinaiya. Busa mibalhin ko ug misugod og bag-ong kinabuhi sa Hyderabad, usa ka siyudad nga adunay daghang oportunidad sa panarbaho.

Nagsugod ko og kamagul-anon ug gilaay tungod sa pamaagi sa akong pagpakabuhi. Apan usa ka adlaw nakasugat ko og duha ka tawo. Mipasabut sila nga sila mga misyonaryo gikan sa Ang Simbahan ni Jesukristo sa mga Santos sa Ulahing mga Adlaw ug misulti kanako kabahin sa ebanghelyo ni Jesukristo. Ug usab akong nakat-unan ang mahitungod sa usa ka Dios, kinsa mihimo og usa ka laraw sa kalipay alang sa tanan Niyang mga anak. Ang ilang mensahe mipuno dayon kanako sa kalipay ug paglaum. Gusto kong masayud pa og dugang.

Ako karon miyembro na sa Simbahan sulod sa pito ka tuig. Nausab nako, nakasaksi ko og mga milagro sa akong kinabuhi, ug nakakat-on ko og daghan mahitungod sa ebanghelyo. Ganahan ko sa kalipay nga nahatag niini kanako. Apan adunay usa ka importante nga bahin sa ebanghelyo nga wala pa nako nasinati—ang templo.

Sukad sa una nakong pagkahibalo mahitungod sa templo, gusto kong moadto didto aron sa pagkat-on ug mobati sa Espiritu, aron mabugkos sa kahangturan ngadto sa akong pamilya, ug sa paghimo og mga pakigsaad uban sa Ginoo. Apan walay mga templo sa India, ug wala pa akoy oportunidad sa pagbiyahe ngadto niini. Daghan na kaayong mga Santos sa Ulahing mga Adlaw sa India ug ako mibatbat og dili na maihap nga mga pag-ampo, nagpuasa kami, ug malaumong nagpasensya ug hugot nga nagtuo nga usa ka adlaw adunay itukod nga templo sa India.

Atol sa Abril 2018 nga kinatibuk-ang komperensya, ang Dios mitubag sa among mga pag-ampo samtang si Presidente Russell M. Nelson mipahibalo nga usa ka templo ang pagatukuron sa Bengaluru, India. Dili gayud nako hikalimtan kadto nga adlaw. Ang Espiritu mipuno sa akong kasingkasing og hingpit nga kalipay ug ang mga luha sa akong mga mata sa mga pulong sa propeta. Diha-diha dayon ako nagpasalamat sa Langitnong Amahan sa pagtubag sa among mga pag-ampo. Ug ako naghinam-hinam nga sa katapusan makakita ug makasulod sa templo sa pipila na lang ka tuig.

Ako malipayon kaayo ug mapasigarbuhon nga nahimong miyembro sa Simbahan ni Jesukristo. Ako nasayud nga ang Ginoo mipahiuli sa tinuod nga ebanghelyo dinhi sa yuta pinaagi ni Propeta Joseph Smith. Ako nasayud nga ang templo mao ang dapit diin kita mahaduol sa Dios, mabugkos ngadto sa atong mga pamilya, ug makakat-on og dugang mahitungod sa atong katuyoan. Ug samtang naghulat ako sa templo nga matukod dinhi sa India, ako naningkamot pag-ayo nga maandam ang akong kaugalingon sa pagsulod.

• Ako nag-ampo ug nagkat-on kutob sa mahimo mahitungod sa templo, sa mga pakigsaad nga akong himuon, ug sa mga ordinansa nga akong madawat didto.

• Naghangyo ko sa ubang mga miyembro kinsa nakasulod na sa templo alang sa tambag kon unsaon sa pagpangandam sa espirituhanong paagi.

• Nagkat-on ko unsaon sa paghimo sa buhat sa family history aron madala nako ang mga ngalan sa akong mga katigulangan ngadto sa templo.

• Nagtambong ko og klase sa pagpangandam sa templo.

Gusto ko nga maandam sa adlaw nga sa katapusan makasulod ko sa templo ug himuon kini nga usa ka prayoridad sa akong kinabuhi. Maningkamot ko kanunay nga mahimong takus nga mosulod aron madawat ang gisaad nga mga panalangin, direksyon, ug mga tubag sa akong mga pag-ampo nga dugay na kaayo nakong gihuwat. Dili ko makahulat niana nga adlaw.

Yeshwanth Kosireddy nagpuyo sa Andhra Pradesh, India.

Unsa Ang Akong Mahimo?

Paghunahuna og mga paagi nga mahimo ninyong usa ka prayoridad sa inyong kinabuhi ang templo. Paghimo og tumong sa pagbisita sa templo sa mas daghang higayon, aron sa pagkat-on pa mahitungod sa templo, sa paghimo sa buhat sa family history, o sa paghinumdom sa inyong mga pakigsaad sa templo matag adlaw.

Pagdiskobre pa og Dugang

Makakita ka og dugang pa nga mga artikulo mahitungod sa pagpangandam sa umaabut diha sa seksyon sa batan-ong hamtong sa Hulyo 2020 nga Liahona.

Susiha ang YA Matag Semana, nga makit-an sa seksyon sa mga Young Adult sa Gospel Library nga app, alang sa bag-o, makapadasig nga sulod alang sa mga young adult matag semana.

Mahimo kang mosumiter sa imong kaugalingon nga mga istorya, mga ideya, ug feedback diha sa liahona.ChurchofJesusChrist.org. Naghinam-hinam kami nga makadungog gikan kaninyo!