Nakasinati Ko og Pagkaibog diha sa Sama og Sekso—Moabi-abi ba kaha Nako og Balik Ang mga Miyembro sa Simbahan?
Paghulagway gikan sa Getty Images
Niadtong Hulyo 27, 2013, human sa taas nga pakigbisog sa sakit nga Alzheimer, ang akong kauban sa kinabuhi sulod sa 25 ka tuig mitaliwan. Si Jay Eldredge usa ka inila sa tibuok kalibutan nga cardiologist. Miserbisyo kami og mga misyon alang sa Ang Simbahan ni Jesukristo sa mga Santos sa Ulahing mga Adlaw sa dihang mga batan-on pa kami apan mipalayo sa among kaugalingon sa Simbahan tungod sa pagkaibog sa sama og sekso.
Ang kamatayon ni Jay, bisan og wala damha, ang makapaguol kaayo. Gibati ko og kasagmuyo ug pagkasalaag ug nag-inusara.
Samtang nagdrayb pauli sa balay human sa tulumanon sa lubong, nabati nako ang impluwensya sa Espiritu nga milukop kanako nga hilabihan ka kusog nga kinahanglan ko nga molugar sa daplin sa karsada. Nasayud ko nga ang Dios namulong ngari kanako, nagtawag kanako sa pagbalik ngadto Kaniya, apan nagdumili ko. “Wala ba nimo nakita nga nag-antus ko?” Kusog nakong gisulti. “Wala koy nawong nga mobalik sa simbahan karon dayon.”
Apan kon unsa ka dako ang akong pagsupak, mas miimpluwensya ang Espiritu ngari kanako, nagdapit kanako sa pagbalik sa simbahan.
Madawat Pa Kaha Ko?
Nabalaka ko pag-ayo kabahin sa pagbalik sa simbahan. Wala ako nakatambong og miting sa sakrament sulod sa 25 ka tuig. Modawat pa kaha sila nako? Ako ba silang dawaton? Unsa kahay isulti sa bishop? Gibati ko og kahadlok ug wala mahimutang ug grabe gihapon ang pagbangutan.
Apan ang akong pagpamatuod sa ebanghelyo wala gayud magduhaduha niadtong mga tuiga. Si Jay ug ako ganahan sa Simbahan ug sa makagiya nga mga baruganan niini—sama sa, gugmang putli, kalooy ug pagpasaylo. Nasayud ko nga si Kristo mao ang akong Manluluwas ug nga ang Iyang Simbahan mao Ang Simbahan ni Jesukristo sa mga Santos sa Ulahing mga Adlaw. Nasayud ako niana sukad pa sa akong pagkakabig ug pagbunyag sa edad nga 14. Dili nako kana ikalimud karon.
Sa katapusan, human nakapundo sa gikinahanglan nga kaisug, mitawag ko sa Linwood Ward sa New Jersey, USA, aron susihon kon unsang orasa magsugod ang miting sa sakramento.
Dihang nagsingabut na ang Dominggo, ang kaaway nagbutang og daghang mga babag sa akong dalan nga sayon ra unta ko nga mapugngan sa pagtambong. Mapasalamaton kaayo ko nga ang Espiritu Santo mipadayon.
Gikulbaan ko sa akong pagsulod sa gambalay, apan ang pangbukas nga himno sa miting sa sakramento mipasalig kanako nga nahiuli nako sa panimalay. Ang himno nga “Mga Santos Dali Na” (Mga Himno, nu. 23) nagdapit og sobra ka kusog sa Espiritu nga ang mga luha miagas diha sa akong mga aping. Nasayud ko nga nianang tungora ang Langitnong Amahan nakabantay nako ug sa lawom nga kasub-anan nga akong gibati.
Kana nga himno mura og nahimong dili opisyal nga awit apan nagpaila sa Simbahan, apan kini nahimo nakong personal nga awit usab.
“Dali,” ang himno nagdapit kanako. “Bisan mag-antus niining panaw, Grasya matag adlaw.”
Ang akong panaw malisud. Apan ang grasya nag -uban kanako sumala sa gisaad.
Si Bishop Darren Bird ug ang tanan sa kongregasyon maayo kaayo ug maabi-abihon. Sila midawat nako nga ilang igsoong lalaki diha ni Kristo.
Makig-uli sa Dios, pinaagi kang Kristo
Ang mga pulong sa “Mga Santos Dali Na” adunay mas dakong kahulugan kanako, samtang ako mibati nga ang Langitnong Amahan naggiya kanako kon unsaon nako sa pagpadayon.
Dapit giandam atong makit-an,
Sa layong kasadpan,
Walay moduol nga kahadlokan;
Santos mabulahan.
Ako miadto sa kasadpan ug nakapalit og balay sa Fountain Hills, Arizona, USA, diin akong nahimamat si Bishop Jerry Olson. Sa dihang ako mihangyo nga makigkita niya ug gilamano ang iyang kamot, ang Espiritu nakaaghat nako nga kini nga tawo makatabang nako nga mabalik ngadto sa hingpit nga pagkaaktibo diha sa Simbahan.
Samtang akong gisugdan ang pagpakigkita sa bishop ug nagsugod sa pagpakig-uli sa Langitnong Amahan, nakasaksi ko og daghang espirituhanon nga mga milagro. Mitug-an ako sa tanan sa bishop, diin siya mapasalamaton. Miingon siya nga natabangan siya nga mas makasabut kon diin ug hain na ako karong dapita sa akong pakigrelasyon uban sa Dios. Mahigugmaon usab siya nga mipahibalo nako nga mao pa kini ang unang higayon nga siya nakaangkon og oportunidad sa pagpangalagad ngadto sa tawo nga dunay kaibog sa sama og sekso, ug mihangyo siya sa akong pagpailob ug pagpasaylo kon siya nakasulti ug nakabuhat og butang nga ikasilo kanako sa tibuok proseso.
Nagpasalamat ko alang sa iyang kamatinuoron ug miingon, “Nan, kini mao usab ang akong unang higayon. Magdungan kita sa pagkat-on.”
Sa ingon nagsugod ang usa ka maanindot nga lakat sa panaghigala!
Sa wala madugay nakabaton ko og plano nga lihokon kon unsaon nga mahimo na usab nga miyembro. Akong gidawat ang mahigugmaon ug mainampoon nga tambag uban sa mapasalamaton nga kasingkasing ug misugod sa proseso.
Paghulagway pinaagi ni Jenna Palacios
Kalinaw diha sa Templo
Sa kaulahian, samtang misunod ko niana nga tambag ug naningkamot og maayo nga mas maduol ngadto kang Kristo, nadawat nako ang pagpahiuli sa akong pagkapari ug ang mga panalangin sa templo ug midawat sa tawag sa pagserbisyo sa korum sa mga elder. Diha sa balaan nga templo, samtang nakigsulti ko sa Langitnong Amahan, Siya mipakita kanako kon unsa Niya kapinangga ang tanan Niyang mga anak. Mibati ko og kalinaw ug usa ka lawom nga tinguha sa pagpahimuot Kaniya.
Mga bulan ang milabay, ang usa ka bag-ong bishop natawag, kang kinsa nakaugmad usab ako og mahigugmaon nga panaghigalaay. Si Bishop Larry Radford nasayud sa akong kahimtang ug mipasalamat sa akong pagserbisyo diha sakorum sa mga elder, diin miingon siya nga miserbisyo ko diha sa gugma ug debosyon dili lamang alang sa korum— ug labaw sa tanan—alang sa Dios. Ang iyang mabination nga mga pulong ug mga pag-awhag nakatabang kanako nga mobati nga ang Ginoo ug ang akong isig ka Santos nalipay uban sa akong pagserbisyo.
Karon matinud-anon kaayo ko nga nagserbisyo isip ang klerk sa ward.
Pagsabut Kon si Kinsa Ako
Ang pagbaton og kaibog sa sama og sekso ug mahimong usa ka aktibo nga miyembro sa Simbahan dili kanunayng sayon. Apan samtang ako mobutang sa tanan nakong pagtuo ug pagsalig sa Dios, ako mobati Kaniya nga nagpalig-on kanako. Ang mga kritiko sa walay duda moingon nga ako wala nagmatinuoron kon si kinsa ko o nga ako nakapasagmuyo sa komunidad sa LGBT+.
Nakasabut ko sa ilang kahimangod, ug klaro nga wala nako ang tanang tubag. Makasulti lang ko sa akong kaugalingong kasinatian. Ug kana nga kasinatian mitudlo kanako niini: ako anak nga lalaki sa Langitnong Amahan, usa ka anak sa Dios. Mao kana ang nag-inusara ug bugtong timaan nga mahinungdanon ngari nako. Agig sangputanan, maningkamot ko nga dili itugot ang kalibutanon nga mga timaan nga mohulagway nako. Nahadlok ko nga malimitahan niana ang akong potensyal ug mahangturon nga pag-uswag.
Si Satanas alisto kaayo. Nasayud siya nga pinaagi sa paggamit og mga timaan, makahimo siya sa pagbahin kanato isip komunidad ug isip simbahan.
Uban niana nga panglantaw, ang pagpili nga akong gihimo wala gibase sa akong pagkaibog sa managsama og sekso apan kon unsaon nga mahimong tinuod nga disipulo ni Jesukristo uban sa pagkaibog sa samang sekso. Sama sa giingon ni Nephi:
“O Ginoo, ako misalig kanimo, ug ako mosalig kanimo sa kahangturan. Ako dili mobutang sa akong pagsalig diha sa gahum sa tawo. …
“… Oo, ako nasayud nga ang Dios mohatag nga dili higpit ngadto kaniya nga mangayo. Oo, ang akong Dios mohatag kanako, kon ang akong gipangayo dili sayop; busa ipataas ko ang akong tingog ngadto kaniya; oo, mangamuyo ako nganha kanimo, akong Dios, ang lig-on nga sukaranan sa akong pagkamatarung. Tan-awa, ang akong tingog sa kahangturan modangat nganha kanimo, akong lig-on nga sukaranan ug akong walay katapusan nga Dios” (2 Nephi 4:34–35).
Gugma sa Akong Isig ka mga Santos
Sa tibuok nakong pagbalik, gibati nako ang mahigugmaong mga pakig-uban sa akong mga lider ug mga isig ka Santos, lakip ang aktibo ug dili kaayo aktibo nga mga LGBT+ nga miyembro. Nakakaplag ko og dapit diin mouswag ako. Akong nakaplagan taliwala kanila ang hiyas ni Kristo nga kanunay nakong giuban sa akong hugot nga pag-tuo, kaluoy, kapuangod, pagsabut, ug labaw sa tanan, gugma.
Samtang nanlimbasug ko subay sa dalan uban sa akong Manluluwas, nabati nako ang kahupay ug kalinaw samtang midangop ako ngadto Kaniya, nasayod nga naglakaw ko subay sa dalan nga wala nag-inusara. Pipila ka mga bishop ang diha sa akong kiliran. Ang mga sakop sa akong korum. Ang mga sister sa ward. Diha pa gani usa ka batan-ong lalaki sa ward nga mihangyo kanako kon mahimo ba nga ako ang mo-orden kaniya nga usa ka priest. Kining matang sa imbitasyon nakatandog kaayo nako. Iya akong nakita nga usa ka lalaki kinsa naghupot sa pagkapari sa Dios ug kinsa makapakita sa pagkapari diha sa pagserbisyo sa uban.
Kini nga mga oportunidad sa pagserbisyo ug pagsimba uban sa akong isig ka Santos nakapabayaw nako ug—inubanan sa daghang mga panalangin nga akong nadawat gikan sa Ginoo—nakatabang nako nga masinati ang gugma, pagsabut, ug pagdawat nga akong gikinahanglan.
“Ang Manluluwas miingon, “Dili ko kamo pagabiyaan nga daw mga ilo: Ako mobalik ra kaninyo” (Juan 14:18). Kadto nga mga pulong matuod. Nagkinahanglan ko og paghupay, ug Siya miabut kanako, sa mas buhong kay sa akong mahunahuna.