Mga Young Adult
Usa ka Butang mahitungod sa Umaabut nga Mahimo Nakong Makontrolar
Paghulagway gikan sa Getty Images
Kadtong gamay nga tingog sa akong hunahuna malisud na gayud nga ibaliwala. Ania ako 28 anyos na, wala pa gihapon maminyo ug dili kaayo sigurado kon unsay gusto nakong buhaton sa propesyonal nga pagpanarbaho bisan tuod og duna koy maayong panarbaho isip usa ka labor ug delivery nga nars. Mibati ko nga daw matag aspeto sa akong kinabuhi wala milambo sa paagi nga gusto nako. Nagduha-duha ko sa mga pagpili sa kinabuhi ug wala masayud kon unsa nga dalan ang subayon. Mibati ko nga nahisalaag gayud.
Usa ka adlaw sa dihang mibati ko nga nawad-an og kadasig, usa ka higala kinsa wala na nako maistorya taud-taud na mitawag kanako. Sa dihang nangutana siya kon kumusta na ko, gipasabut nako kadtong tanan nga mga pagbati nga akong gipanglimbasugan. Naminaw siya ug dayon miingon, “OK, apan kumusta man ka sa espirituhanong paagi?”
“Ah oo, maayo kaayo,” mitubag ko diha-diha dayon. “Wala gayud ako sukad mibati nga mas duol sa Dios sa akong kinabuhi.”
Mitubag siya, “Nan dili nimo kinahanglan mabalaka mahitungod sa laing mga butang.”
Pagsalig sa Hingpit nga Plano sa Dios
Sukad sa pag-istoryahanay, nakaamgo ko og duha ka mga butang. Una, nakaamgo ko nga mapasalamaton kaayo ko nga adunay lig-on nga pagpamatuod sa gipahiuli nga ebanghelyo ug makahimo sa pagsunod sa mga sugo ug mobati nga konektado sa langit.
Ang mahimong makabarug sa kinaugalingong paningkamot sa espirituhanon nga paagi importante kaayo alang kanako, ug nagkat-on pa gihapon ko unsaon sa pagdawat og pagpadayag sa akong kinabuhi. Ang pag-ampo ug pagtuon sa mga kasulatan matag buntag mao ang duha ka yanong mga butang nga gibati nako nga nakahimo sa labing dakong kalainan sa akong abilidad sa pagdawat og personal nga pagpadayag. Gibati usab nako nga mas konektado sa langit kon maningkamot ko nga magmabination, mopuyo og himsog nga kinabuhi aron ang Espiritu mahimong kanunay nako nga kompanyon, mosunod sa mga sugo, ug sinsero nga maghinulsol.
Ikaduha, nakaamgo ko nga ang akong tubag sa pangutana sa akong higala dili gayud husto—nagtuo ko nga “hingpit” ko sa espirituhanon nga paagi, apan kinahanglan ko nga magbaton og dugang nga pagtuo, mohunong sa pagkabalaka kaayo, ug mosalig sa Dios aron sa pag-atiman sa mga butang nga dili nako makontrolar.
Bisan kon ang pipila ka aspeto sa akong kinabuhi wala maglambo sa paagi nga gusto nako, nasayud ko nga ang importanting butang mao ang paglihok inubanan sa hugot nga pagtuo ug sa pagpakita sa Dios nga mogamit ko sa akong kabubut-on aron sa paghimo og maayong mga pagpili. Nakat-unan nako nga kon ang kinabuhi dili mahitabo sa paagi nga akong gilauman, kini mao nga aron ako makakat-on ug molambo sa mga paagi nga ako dili unta makahimo.
Wala gayud ako naghunahuna nga sa akong ika-29 nga tuig nga akong makaplagan ang akong kaugalingon nga adunay mga pagduha-duha mahitungod sa akong pagpanarbaho ug sa sunod nga ang-ang sa akong kinabuhi. Gihapon, bisan pa sa kining tanan nga wala mahibaloi, ako adunay hingpit nga pagsalig nga ang Dios adunay hingpit nga plano alang kanako. Nasayud siya kon unsa gayud ang nanghitabo ug unsay akong kinahanglan, ug Siya kanunay moatiman kanako (tan-awa sa Mateo 6:28–34). Sama sa gitudlo ni Elder L. Todd Budge sa Seventy, “Lisud man kini masabut, ilabi na sa mga panahon sa atong mga kinabuhi kon ang mga unos kusog ug ang mga kadagatan baluron, mahupay kita nga masayud nga ang Dios sa Iyang walay kinutuban nga kaayo kanunayng nagpadpad kanato ngadto sa panimalay.” (“Makanunayon ug Lig-on nga Pagsalig,” Liahona, Nob. 2019, 48).
Mas Mosalig; Dili Kaayo Mabalaka
Sa ubang mga adlaw ang kinabuhi bation nga lisud gayud kaayo, apan kon hunahunaon gayud nako kini, nasayud ko nga ako dili kinahanglan mabalaka. Hinay-hinay, nakaamgo ko nga kinahanglan nako nga mas mosalig sa Dios ug dili mabalaka kaayo mahitungod sa mga butang nga dili nako makontrolar. Ang usa ka butang nga mahimo nakong makontrolar mahitungod sa umaabut mao ang pagsalig sa Dios ug sa pagpaningkamot nga mas maduol ngadto Kaniya matag adlaw.
Kon mobati ko nga nahisalaag, adunay igong kahayag kanunay alang kanako aron sa pagpadayon sa unahan ngadto sa mga wala mahibaloi nga sirkumstansya sa kinabuhi. Ug hangtud nga ako magbaton og hugot nga pagtuo ug maghupot sa akong mga pakigsaad, hangtud nga ako mahinumdom sa akong tinuod nga pagkatawo isip anak nga babaye sa Langitnong mga Ginikanan ug mosulay sa makadaghan, ang mga butang mahitabo sa panahon ug sa paagi nga kini angay, ug mao kana ang importante gayud.