Rijilōk ro rej Kwaļo̧k Ennaan ko kōn Kōjatdikdik
Ritōl ro an Kabun̄ in rej letok ļōmņak ko kōn epaakeļo̧k Anij, jerbal in karejar ilo iakwe, im kijenmej ilo ad wōnm̧aanļo̧k wōt ilo iien in me eajedeed nan̄inmej.
Pija ko jān Getty
N̄an kōm̧m̧ani m̧akūtkūt ko ikkijeen an kūj in ajedeed ipeļaakin laļ in, ritōl ro an kien em̧ōj aer kabōjrak iiaio im kōm̧m̧an bwe armej ren pād wōt lowaan m̧ōko. Jikin jikuuļ rekilōk, ritōl ro an kabun̄ in rej kabōjrak kweilo̧k ko an kabun̄ in, im ro rej kajekdo̧o̧n kūj in im pād nam̧ōj rej aikuj ekkōņak mask ko n̄an kōjparok.
Iiō eo 1919, im m̧ōkaj in an kar ajedeed influenza eo ekar ijjino ilo iiō eo m̧okta ekar bōk jon̄oul milien mour ko an armej.1 Rikanaan eo ekāāl an Kabūn̄ in ilo tōre eo, Būreejtōn Heber J. Grant (1856–1945), kar kōjenolo̧k e ilo Nobōm̧ba 1918, bōtaab eban kar ekkapit m̧ae Juun 1919 kōnke kweilo̧k eo eļap ilo Eprōļ kar lem̧aanļo̧k.
Ilo iien jerbal eo an ekobaļo̧k ippān men ko rej waļo̧k im raan ko jet reppen, Būreejtōn Grant ekar leļo̧k kapilōk ko rekkar n̄an raan kein ad ke ekar ba, “Jekar itok n̄an laļ in n̄an bōk jeļāļo̧kjeņ, māletlet, im en̄jake, n̄an ekkatak katak ko, en̄taan kōn metak ko, eļļā jān menin kapo ko, im bōk jem̧ļo̧k ko an mour in.” Jān jeļā eo me ekar bōke jān jekjek eo epen ekar ļōme e make, ekar kakkobaba, “N̄a … ijeļā bwe ilo awa in iien ko reppen Armej ro Rekwojarjar ilo Raan Ko Āliktata rej bōk kainem̧m̧an im jeraam̧m̧an im inem̧m̧an im jenolo̧ktata jān armej ro jet!”
Ilo “awa in en̄taan” eo ad kiiō kōn coronavirus eo em̧ool, jej bōk kōketak im kainem̧m̧an jān gospel eo an Jisōs Kraist me em̧ōj an jepļaaktok. Jeļā eo ad bwe Jemedwōj Ilan̄ ej iakwe ajri ro Nejin im bwe em̧ōj an kūr rikanaan ro im rijilōk ro ilo raan kein ad n̄an tōl kōj ilo lan̄ ko an mour in ej juon kōjeram̧m̧an eļap.
Jān kapilōk ko kar kwaļo̧ki ilo intōrpiu ko, elōn̄ ro uwaan Doulul eo an Jon̄oulruo Rijilōk ro rej kakeememej kōj bwe jemaron̄ en̄jake lan̄lōn̄ im reim̧aanļo̧k n̄an ilju im jekļaj eo kōn kōjatdikdik mekarta ta eo ej waļo̧k ipeļaakid.3
Pija jān Welden C. Andersen
Jerbal in Ej Wōnm̧aanļo̧k
Elder Bruce R. McConkie (1915–85) juon iien ekar keidi Kabun̄ in n̄an “waan jokwe tōreļa ko” me ej wōnm̧aanļo̧k mekarta menin kabwereer ko.4 Elder David A. Bednar ej kwaļo̧k an waan jokwe tōreļa ko eo ej wōnm̧aanļo̧k wōt ilo im āinwōt an Kabun̄ kōppopo kōn im̧we im bwebwenato in ilo iien ko reppen.
“‘Ejjeļo̧k pā eo ejjab ekwojarjar emaron̄ kabōjrak jerbal in jān an wōnm̧aanļo̧k,’5 im barāinwōt ejjeļo̧k nan̄inmej eo ej jelōt aolepān laļ in enaaj kabōjrak jerbal in jān an wōnm̧aanļo̧k,” ekar ba. “Ilo ioļapļapin aolepān mellijon̄ kein jej jelm̧aik kiō me jej jeļm̧ae kūj in, jerbal in ej wōnm̧aanļo̧k wōt. … Jejjab jeļā ewi aitokin an naaj pād, ak jenaaj anjo̧ ioon. Im jejjab maron̄ kabōjrak jekjek in mour ko ad m̧okta āinwōt ad kar jeļā, bōtaab elōn̄ iaan oktak ko renaaj em̧m̧an.”
Elder Quentin L. Cook ekar ba kōppopo eo eim̧we an Kabun̄ in ekoba waanjon̄ak in iien ko karōki ilo raan in Jabōt, kōkajoorļo̧k doulul ko an Melkesidek Priesthood im Doulul ko an Kōrā ro, oktak eo n̄an jerbal in karejar, im kadkad eo an Itok, Ļoor Eō, pija ko kōn Bok in Mormon, im Būrokūraam̧ an Ajri im Jodikdik ro.
“Jenaaj reilikļo̧k n̄an menin āinwōt juon pedped in iien n̄an kōppopo im ejjab men eo wōt n̄an ad kate kōj kake,” ekar ba.
Būreejtōn M. Russell Ballard, Ripenej Jenkwan Būreejtōn eo an Doulul eo an Jon̄oulruo Rijilōk ro, ej errā. Mekarta ikkilōk ko an jidik iien an tampeļ ko im m̧ōnjar ko, membōr ro ilo Kabun̄ in ewōr ippāer kein jerbal ko ilo jetōb rej aikuji n̄an wōnm̧aanļo̧k wōt.
Būreejtōn Ballard ej keememej wāween an kar en̄jake ilo an kar ro̧o̧ltok jān m̧ōnjar eo n̄an m̧weo mōn ilo Tijem̧ba 7, 1941, im lo bwe em̧ōj ko̧kkure Pearl Harbor im bwe United States ekar bojen pād ilo Pata eo an Laļ in kein karuo. Āinwōt elōn̄ uwaan armej rainin, ekar inepata kōn ilju im jakļaj im kar ļōmņak eļan̄n̄e ilju im jakļaj eo an make enaaj kar jako.
“Bōtaab menin ekar jab waļo̧k,” ekar ba. Āinwōt an kar armej ro rejokne ilo laļ in wiin i pata eo, aaet laļ in barāinwōt enaaj wiin i pata eo ikijeen coronavirus. “Aolep men renaaj em̧m̧an ilo ad ukōt būruwōd n̄an Jemedwōj Ilan̄ im kalimjōkļo̧k E im n̄an Rilo̧mo̧o̧r eo āinwōt Ripinmuur eo an aolep armej,” ekar ba.
Bar juon wāween Kabun̄ in ej wōnm̧aanļo̧k wōt ej ilo kijejeto ko an ilo jerbal in mijenede, eo rej ņa mejļan n̄an ukukōt jekjek ko ilo laļ in. Elder Dieter F. Uchtdorf ekar ba bwe ritōl ro an Kabun̄ in eto aer kar ekkatak wāween ko rekāāl n̄an kwaļo̧k gospel eo m̧okta jān an COVID-19 kar jino kabūr jerbal in mijenede. Kabūrbūr in ekoba karool taujin mijenede ro n̄an kapijuknen ko aer, m̧ōkaj aer kōtļo̧k er jān jerbal ko aer, im bar jitōn̄ im ukot jikin jerbal ko an ro jet.
“COVID-19 ekar kanooj kōļapļo̧k wāween am kōļmenļo̧kjeņ im kōpeļļo̧k mejamim,” ekar ba. Āinwōt juon tōprak, technology im social media rej kiiō kōpeļļo̧k kōjem ko me rekar m̧oktaļo̧k kilōk jān bukwōn ko elōn̄ oror ie im m̧ōko im apartment ko epen deļo̧n̄i.
“Jerbal in mijenede enaaj wōnm̧aanļo̧k wōt men̄e nan̄inimej in ejelōt aolepān laļ in,” Elder Uchtdorf ekar kakkobaba. “Jej wōnm̧aanļo̧k wōt n̄an ekkatak wāween kōkm̧anm̧anļo̧k jerbal in mijenede kiiō im n̄an ilju im jakļaj eo. Irooj ekar kallim̧ur n̄an kōm̧ōkaj jerbal in An n̄an kōjeraam̧m̧an aolepān ajri ro nejin Anij (lale Katak im Bujen Ko 88:73). Ij en̄jake bwe jej pād ilo ioļapļap in jerbal in ilo ad mour ilo iien in eapan̄. Mijenede ro nejid rejitōnbōro rej pioneer ro ilo raan kein ad, rej kōpelļo̧k juon iaļ n̄an kwaļo̧k gospel eo ilo jekjek ko rekāāl im rej iookļo̧k jekjek kein jej pād ie bwe Kabun̄ eo an Jisōs Kraist enaaj wōnm̧aanļo̧k wōt ilo an ‘jabwilbwil m̧aanļo̧k, m̧ae an naaj kobrak aolepān laļ’” (Katak im Bujen Ko 65:2).
Iien ko rem̧m̧an rekāāl n̄an kwaļo̧k gospel in ejjab men ko wōt im rej kiiō peļļok. Bōro ko rej barāinwōt peļļo̧k kōnke iien ko reppen rej kōm̧m̧an bwe armej ren ettā im oktakļo̧k n̄an Anij, Elder D. Todd Christofferson ekar ba.
“Rej kiiō peļļo̧k jidik n̄an ļōmņak, ‘Bōlen ij aikuji juon men eļapļo̧k jān bank akkaun eo aō. Bōlen ewōr eļapļo̧k ilo mour in jān ta eo ij mour kake,’” ekar ba.
Elder Christofferson ej rojan̄ ro uwaan Kabun̄ in n̄an kappukot iien ko rem̧m̧an n̄an jerbal in mijenede, ko āinwōt kwaļo̧k ennaan ko ak meme ko ilo social media im rej iookļo̧k gospel in, ekkōnono ippān mijinede ro rej jerbal aolep raan kōn jipan̄ m̧ōttāik armej ro rej katakin er ilo online, im ekkōnono wōt ippān armej ro rejjab maron̄ lo er aolep iien.
Kattoļo̧k Doon im Kattoļo̧k Doon ilo Jetōb
Bar juon wāween Kabun̄ in ej wōnm̧aanļo̧k wōt ej kōn an ņa mejļan ilo jetōb an Armej ro Rekwojarjar Ilo Raan Ko Āliktata n̄an apan̄ ko an jidik wōt iien āinwōt COVID-19. N̄an kōjparok eo ad ilo ānbwin, jej kōļapļo̧k ad kattoļo̧k kōj jān ro jet, ak n̄an kōjparok eo ad ilo jetōb, jej kepaakļo̧k Jemedwōj Ilan̄ im Jisōs Kraist. COVID-19 eo ejelōt aolepān laļ in em̧ōj an letok iien ko rem̧m̧an n̄an ro uwaan Kabun̄ in n̄an kōļapļo̧k kōjparok eo aer ilo jetōb ilo aer kar ļoor kapilōk eo an Būreejtōn Russell M. Nelson n̄an ron̄jake Irooj.
“Jemed Ilan̄ ejeļā ke n̄e jej jepo̧o̧l kōn men ko rejjab alikkar im mijak, ta eo enaaj jipan̄ kōj eļaptata ej n̄an ron̄jake eo Nejin,” Būreejtōn Nelson ekar ba ilo kweilo̧k eo eļap an Eprōļ 2020. Ekar kakkobaba, “Ilo ad kappukot n̄an erom̧ rikaļoor ro an Jisōs Kraist, kijejeto ko ad n̄an ron̄jake E rej aikuj itok jān lukkuun ikdeleel em̧ool. Ej bōk kijejeto eo ealikkar im emakijkij n̄an kobrak mour ko ad aolep raan kōn naan ko An, katak ko An, m̧ool ko An.”6
Ilo ad jab kar kōtmene an bōjrak kweilo̧k ko an Kabun̄ in, ikkilōk ko an tampeļ ko, ak luuji jerbal ko, joļo̧k eļapļo̧k iien ilo m̧ōko ej letok n̄an kōj “juon iien n̄an ļōmņak kōn rujļo̧k n̄an Anij” (lale Alma 5:7), Elder Cook ekar ba. “Bōlen iien ko reļļap rekar waļo̧k kiiō remaron̄ juon kein karūjrūj ilo jetōb n̄an pedped ioon men ko eļap aer aorōk tata. Im eļan̄n̄e en̄in, enaaj juon kōjeraam̧m̧an eļap ilo iien in n̄an ļōmņak kōn men ko me jemaron̄ kōkm̧anm̧anļo̧k ilo mour ko ad im wāween ad maron̄ kōjeraam̧m̧an mour ko an ro jet ilo ad rūjļo̧k n̄an Anij im wōnm̧aanļo̧k wōt ilo iaļan bujen eo.”
Elder Jeffrey R. Holland ekar kakkobaba, “Iien rōt kein rej kūr kōj n̄an etale mour in jetōb ko ad im lale em̧m̧an ke ippād ta eo jej loe. Iien eo in [jej] ļōmņak kōn wōn lukkuun [kōj] im ta eo elukkuun aorōktata.”
Iien rōt in rej barāinwōt kūr kōj n̄an kōļapļo̧k tōmak ko ad, jerbal in jipan̄, im kam̧m̧oolol, im̧we kōj n̄an “ļōmņak kōn ad pedped ioon Anij im kōjeraam̧m̧an ko jān E aolep iien jej jab kaorōki,” Elder Holland ekar ba. “Jej m̧ūri ippān Jemewōj Ilan̄ n̄an ad kōļapļo̧k ad kam̧m̧oolol, kōļapļo̧k kam̧m̧oolol, im ļapļo̧k ad keememej eo jon̄an būrabļōm̧ ko rej em̧ōj ņa mejļaer kōn jipan̄ an Anij, enjeļ ro, bujen kallim̧ur ko, im jar.
Ilo ioļapļap in kam̧m̧oolol eo ad ej kōjeraam̧m̧an eo kōn ememļo̧kjeņ “ekōjkan an Irooj kar tūriam̧okake ro nejin armej, jān ejaake an Adam em̧ool laļtak m̧ae iien [in]” (Moronai 10:3). Ro uwaan Doulul eo an Jon̄oulruo ro rekar ba bwe jabdewōt iien jej aikuj n̄an “pād wōt ilo m̧ōko,” jemaron̄ ļoor waanjon̄o̧k eo an Nipai im Alma, keememej bwe E “ilo wōn [jej] lōke,” Rilo̧mo̧o̧r Jisōs Kraist, ,”enaaj kōtļo̧k [kōj] jān kalbuuj,]” (2 Nipai 4:19; Alma 36:27). Im jemaron̄ keememej, āinwōt an Rijilōk Paul katakin, bwe ejjeļo̧k men emaron̄ “kōjepel kōj jān yokwe an Kraist” (lale Rom 8:35).
Irooj Jisōs Kraist “ej jikin tilekek n̄an eō” (lale Sam Ko 61:1–4), Elder Holland ekar ba. “Jekdo̧o̧n ta eo enaaj waļo̧k, jeban jepel jān iakwe eo an Rilo̧mo̧o̧r im jem̧jerā eo An, men̄e jejjab kile aolep iien eo. Jetōb ej ejjab penjak kōn juon kūj ak kōn jikin ko an laļ ko ak kōn taktō ro.”
Pija ko jān Getty
“Kōm̧m̧ani Men ko Rejouj”
Ilo juon iien ejjab to em̧ootļo̧k, ke ikar riiti juon riboot jān juon kamitii an Kabun̄ in, Elder Christofferson ekar inepata kōn “kakien n̄an pād m̧ōko” emaron̄ jelōt membōr ro me ejjeļo̧k pāleer ilo Kabun̄ in—rūtto im dik.
“Kakien eo n̄an pād m̧ōko emaron̄ tōl n̄an en̄jake ajimakeke, im ajimakeke emaron̄ letok jekjek rejjab em̧m̧an rej waļo̧k jān jab ājmour ak m̧ōjņo̧ ānbwin im kōļmenļo̧kjeņ,” ekar ba. “N̄an kadikļo̧k menin, jet jikin ājmour ko rej rojan̄ bwe ro rej en̄jake ajimakeke ren kappukot wāween ko n̄an ‘kōm̧m̧ani men ko rejouj’ n̄an bar juon armej.”
Armej ro Rekwojarjar ilo Raan Ko Āliktata remaron̄ kappukot wāween ko n̄an jerbal, jipan̄, im leļo̧k n̄an ro jet, eļaptata n̄an ro rej en̄jake aer ajimakeke, Elder Christofferson ekar ba, im membōr ro rej en̄jake aer ajimakeke ro rej leļo̧k jerbal in jipan̄ n̄an ro jet remaron̄ kadikļo̧k en̄jake in aer ajimakeke.
“Pedped ioon jerbal in karejar,” ekar ba. “Ekanooj lōn̄ men ko jemaron̄ kōm̧mani n̄an doon n̄an kōm̧m̧an en̄jake ruwainene im m̧ōttanļo̧k jem̧jerā an brother im sister.” Iien in ej juon iien n̄e doulul eo an elder ro im Doulul eo an Kōrā ro remaron̄ lukkuun itok ilo er make im kwaļo̧k un ta eo ejeno̧lo̧k in aer kar karōk er n̄an kōm̧m̧ane.”
Im ijjelo̧kin aer text e juon armej aolep iien, ekar elmakote, “Ij ļōmņak niknik n̄an ko̧o̧ļe juon armej ilo ad kōjerbal technology em̧ōr eo ņae etan taļboon. Baj ko̧o̧ļ wōt n̄an ekkōnono im iiaio. Kōm̧man bwe ren ron̄ juon ainikien.”
Kijejeto ko reddik n̄an tōpare ro jet emaron̄ kōm̧m̧ane juon oktak eļap, kōmeramļo̧k an juon armej raan ilo wāween ko jemaron̄ kar jab jeļā. “Jerbal in karejar eo ad eļap aikuji ippān armej ro rej pād make m̧oko m̧weer,” Elder Cook ekar ba.
Elder Holland ekar elmakot, “Emenin aikuj bwe jen ajeļo̧k juon m̧ōttan raan ko ad n̄an ekkōnono ippān armej ro rej aikuj kōkajoor. Aaet, jej bōk kajoor jān kōm̧m̧ane men eo, bwe aolep ren ‘kotak er’(3 Nipai 27:14, 15), āinwōt an kar Rilo̧mo̧o̧r ba ke Kar jilkinļo̧k E n̄an laļ in n̄an kōm̧m̧ane.”
Juon wāween jemaron̄ kotak kōj make im ro jet ej n̄an kōppopo n̄an raan eo n̄e tampeļ ko renaaj bar peļļo̧k. Ikkilōk in tampeļ ko—men̄e n̄an nan̄inmej ko rejelōt aolepān laļ in, kōkm̧anm̧aļo̧k, ak karreo— “ej letok juon iien em̧m̧an n̄an ekkatak eļapļo̧k kōn bwebwenato in baam̧le ko etto, indexing, im wāween kōpooj n̄an elōn̄, im elōn̄ et ko n̄an raan eo kōjem ko ilo tampeļ renaaj bar peļļo̧k,” Elder Bednar ekar ba.
Jekdoon n̄e tampeļ ko repeļļo̧k ak kilōk, Elder Bednar ekar kakkobaba, ro uwaan Kabun̄ in remaron̄ wōnm̧aanļo̧k wōt ilo aer kate er n̄an erreo n̄an bōk juon peba in mālim n̄an deļon̄e tampeļ.
Katak ko Irooj Ekōņaan Bwe Jen Ekkatak
Āinwōt an Elder Bednar kalikkar, ilo an ejjeļo̧k renaaj kālet n̄an ioone COVID-19 eo ej jelōt aolepān laļ in, juon nan̄inmej ekapopo ilo raan ko āliktata ej pād iood jekdoonta.
“Kōn kōļmenļo̧kjeņ indeeo me gospel eo em̧ōj an jepļaaktok ej letok im bwe iakwe eo me ej itok jān Pinmuur eo an Rilo̧mo̧o̧r, jemaron̄ ekkatak katak ko jān men ko reppen ilo mour in me rej kōpooj kōj n̄an kōjeraam̧m̧an ko an mour indeeo,” ekar ba. “Jej aikuj jar. Jej aikuj kappukot. Jej aikuj kajjitōk. Ej aikuj wōr mejād n̄an loļo̧kjeņ im lo̧jiln̄id n̄an keron̄jak. Bōtaab jemaron̄ jeraam̧m̧an ilo elōn̄ wāween ko reļļap n̄an ekkatak katak ko me renaaj kōjeraam̧m̧an kōj kiiō im indeeo.”
Kōn menin eļap im kabwilōn̄lōn̄ ejelōt baam̧le ko ipeļaakin laļ in, COVID-19 em̧ōj an katakin armej n̄an kwaļo̧k aer inepata kōn ro jet, Būreejtōn Ballard ekar ba.
“Jej itok n̄an ad kile jon̄an aorōk in baam̧le ko ad, jon̄an an ro ritūrūr aorōk, im jon̄an an membōr ro m̧ōttad ilo Kabun̄ in aorōk,” ekar ba. “Ewōr katak ko me jej ekkatak kiiō me renaaj kōm̧m̧an bwe jen armej ro rem̧m̧anļo̧k.”
Im n̄e aer in lan̄ ko kiiō rej waļo̧k, ta eo jemaron̄ kōtmene? Elōn̄ļo̧k in ejja menin wōt, Elder Uchtdorf ekar ba. Ajri ro nejin Anij ilo lowaan im likin Kabun̄ in renaaj wōnm̧aanļo̧k wōt im jelm̧aik apan̄ ko.
“Jej mour ilo juon iien eo jej aikuj ekkatak,” ekar ba. Im katak eo eaorōktata jej aikuj ekkatak ej bwe uwaak eo n̄an apan̄ ko rej itok ej barāinwōt uwaak eo n̄an apan̄ ko kiiō: gospel eo an Jisōs Kraist.
Kōnke Armej ro Rekwojarjar ilo Raan Ko Āliktata ewōr ippāer gospel eo an Jisōs Kraist, Elder Holland ekar ba, remaron̄ ekkatak n̄an ineem̧m̧an wōt im kōjatdikdik, kōm̧m̧ane ijo em̧mantata remaron̄e im bōk jerbal eo an Irooj ilo naan eo An n̄e Ej ba, “Jen kōm̧m̧ani aolep men kein ilo m̧ōņōņō ko im rej pād ilo ad kajoor; innām jen jutak pen, kōn jeļā ekanooj dim, n̄an lo lo̧mo̧o̧r an Anij, im n̄an an kwaļo̧k Pein” (Katak im Bujen Ko 123:17).
“Ewōr men ko n̄an lan̄lōn̄ kaki āinwōt ad kōkm̧anm̧anļo̧k tōmak ko ad, kōļapļok ad lōke Irooj, im lo menin kabwilōn̄lōn̄ ko ilo An kanemkwoj kōj,” Elder Holland ekar ba.