2020
Elōn̄ļo̧k Jān Juon Wāween n̄an Ekkatak Jeje ko Rekwojarjar
Oktoba 2020

Digital Wōt: Rūm̧m̧an Ded ro

Elōn̄ļo̧k Jān Juon Wāween n̄an Ekkatak Jeje ko Rekwojarjar

Jān Marissa Widdison

Māākjiin ko an Kabun̄ in

Men̄e kwojjab kōņaan riit, elōn̄ wāween ko n̄an ekkatak jeje ko rekwojarjar.

Em̧m̧an ippa kūr eo aō āinwōt juon rikōjan̄jan̄ piano n̄an Būraimere. Jejjo wiik remootļo̧k ajri ro rekar katak al. Ikar en̄jake Jetōb ilo aer al:

Kappukot, kejōkļo̧kjeņ, im jar

Rej men ko me Ij aikuj kōm̧m̧ani.

Jetōb enaaj tōl, im, tum̧wilaļ in ilowaaō,

Inaaj jeļā eoon ko rej m̧ool.1

Ak juon kajjitōk ekar jiktok ilo kōļmenļo̧kjeņ eo aō. Ak n̄e kwojjab—āinwōt eoon eo jinoin ilo al eo ej letok ļōmņak ko—“iakwe n̄an riiti jeje ko rekwojarjar”? Ij ļōmņak unin kōnono in riit eo eļakkar pād ilo kōļmenļo̧kjen eo aō kōnke elōn̄ļo̧k jān juon m̧ōttad ekar kwaļo̧k bwe rej apan̄ kōn jab maron̄ in riit. Im elōn̄ armej ijeļā kake er rejjab itok limoer kōn riit! Ewōr ke bar juon wāween remaron̄ kar wōr wōt aer en̄jake eļap meļeļein kōn eoon ko im kōļapļo̧k “juon naan in kam̧ool ke rem̧ool”?

Armej ilo lale em̧m̧an aer ekkatak n̄e meļeļe ko rej kwaļo̧ki ilo elōn̄ kain wāween ko reokkotaktak, āinwōt jim̧or ilo loļo̧kjeņ im ron̄ļo̧kjeņ, im katak ko me rej āliji elōn̄ kōttan. Kōn ļōmņak in, ikar kajjieon̄ ļōmņak kōn wāween ko rellōn̄ im reokkotaktak n̄an ekkatak jeje ko rekwojarjar jon̄an eo imaron̄e. Kiiō, kar kōtļo̧k, ejjab aolep men ko kōllaajraki naaj watōki āinwōt ekkatak jeje ko rekwojarjar me eļap kejōkļo̧kjeņ kaki im rem̧wūlaļ rikanaan ro rekar katakin eaorōk n̄an naan in kam̧ool ko ad—jet iaan rem̧ōkaj im ļōmņak ko rekalimomo—ak ikar lo bwe remaron̄ im̧we kōn jet iaan ļōmņak ko am̧ make rekāāl. Jen kōmaat ļo̧k ad kijejeto n̄an ekkatak kōn gospel eo bwe jen maron̄, āinwōt al eo ej ba, “come to understand” ippān doon!

Ļōmņak ko n̄an Ekkatak Jeje ko Rekwojarjar

  1. Kakilen naan ko me rekar āliji ilo kōjeraam̧m̧an in petriak eo am̧ im kappukot naan ko me rej āinwōt wōt juon ilo jeje ko rekwojarjar.

  2. Ilo am̧ ekkatak, jin̄n̄aik pija ko kōn ļōmņak ko ilo jōōņōļ in ekkatak ak ilo margin ko ilo bok in katakin Itok, Ļoor Eō eo am̧.

  3. Kalōk juon annan̄ jidikdik in juon bwebwenato ilo jeje ko rekwojarjar.

  4. Ko̧o̧ļe juon nukum̧ eo ej pād ettoļo̧k im riit ippān doon ilo taļeboon.

  5. Je laajrak in kajjitōk ko ewōr ippam̧ n̄an Anij innem kappukot uwaak ko ilo am̧ riit.

  6. Alooje juon pija jān BookofMormonVideos.org ak BibleVideos.org.

  7. Kōpeļļo̧k jeje ko rekwojarjar n̄an jabdewōt jebta im jino riit.

  8. Al juon al in jar innām kappukot eoon ko rej pād ilo jem̧ļokin al eo.

  9. Etal n̄an topics.ChurchofJesusChrist.org im ekkatak juon men me eitok limoim kake.

  10. Kappukot jin̄a ko ilo online me ej kwaļo̧k bwebwenato eo ilo jeje ko rekwojarjar me kwoj ekkatak kake.

  11. Riiti wōt jebta im heading eo an jekjōn ko ilo juon bok.

  12. Kajo̧ juon al in kōjan̄jan̄ ilo am̧ riit im kōļap ainikiem.

  13. Kappukot wāween ko me kajjojo jebta ilo jeje ko rekwojarjar rej iookļo̧k tampeļ.

  14. Eļan̄n̄e ekkā am̧ ekkatak eoon ko ilo digital, kajjieon̄ riiti kape ko kar būriini, ak oktak.

  15. Unoik ak jin̄aik bwebwenato eo ak men eo ekar waļo̧k ilo jeje ko rekwojarjar.

  16. Kajjeon̄ ānwōt n̄e kar jitōn̄ eok n̄an kōnono kōn juon unin kōnono ilo m̧ōnjar eo, im ekkatak n̄ane.

  17. Ālkin riit jebta eo em̧m̧antata ippam̧ ilo jeje ko rekwojarjar, bar je ilo naan ko am̧ make.

  18. Ļoor footnote ko ilo juon eoon eo em̧m̧antata ippam̧, innem ļoor footnote ko ilo eoon ko kar tōl eok n̄ani, innem ļoor footnote kein, im ko jet.

  19. Kajojo bōk koņaan riiti eoon ko kōļap ainikiemi ippān ro m̧ōttami im kōnono kōn ta eo kwoj riiti.

  20. Kōjerbal Unin Tōl eo n̄an Jeje ko Rekwojarjar n̄an ekkatak juon naan ak unin kōnono.

  21. Kappukot aolep eoon ko ilo kakeememej ko ilo jem̧ļo̧kin juon ekōnono an kweilo̧k eo eļap.

  22. Likūt juon eoon ijo komaron̄ loe aolep raan im kajjieon̄ kakilōklōk e ilo wiik in.

  23. Je kaat ko n̄an armej ro kōn eoon in kaenōm̧m̧an kar je ilowaan.

  24. Kōjerbal Gospel Library eo n̄an ron̄jake ippān am̧ riit eoon ko ilo am̧ kōļap ainikiem.

  25. Jin̄n̄aiki juon jaat in iien m̧akūtkūt ko ilo am̧ riiti Bok in Mormon.

  26. Kappukot juon “m̧ōttam̧ n̄an katak ippān jān jeje ko rekwojarjar” im text e doon kōn juon eoon ilo aolep jibbon̄.

  27. Jino jān jebta eo āliktata ilo Bok in Mormon im riiti n̄an jinoin.

  28. Riiti eoon ko me ekoba juon naan in kam̧ool, innām je naan in kam̧ool eo am̧.

  29. Eļan̄n̄e kwoj kōjan̄jan̄ juon kein kōjan̄jan̄, kajjieon̄ je juon al me ej kwaļo̧k en̄jake an eoon eo.

  30. Kajjitōk ippān ro uwaan baam̧le eo ak ro m̧ōttam̧ kōn eoon ko em̧m̧an tata ippāer.

  31. Ilo am̧ riiti, jin̄n̄aiki men ko me kar kōmeļeļeik, āinwōt m̧ade eo an Nipai me ebwilak.

  32. Riiti im kakilōklōke eoon ko kar kōjerbali n̄an katakin katak ko an mijenede ro, loi ilo jebta jilu ilo Preach My Gospel.

  33. Riit juon bok jān Baibōļ me kwojjan̄in kar riit m̧okta.

  34. Etale mour an ro rebun̄bun̄ ilo jeje ko rekwojarjar im je juon riboot in lukkuun wōn e im ro jinen im jemān.

  35. Kōm̧m̧an arin bwebwenato eo ilo jeje ko rekwojarjar āinwōt m̧ōttan nokon in jota ak bar juon m̧akūtkūt an Kabun̄ in.

  36. Kappukot juon quote jān ritōl ro an Kabun̄ in n̄an ļoor kajjojo jebta em̧ōj am̧ kadedeikļo̧k.

  37. Riit ekkatak jeje ko rekwojarjar ejipan̄, āinwōt Kadkad in Bok in Mormon ak Bible Dictionary.

  38. Joļo̧k iien ilo menin kōm̧anm̧an ko im ļōmņak kōn wāween ta eo kwoj loe iookļo̧k gospel eo, innām kappukot juon eoon kōn ta eo kwaar ekkatak.

Elōn̄ ke am̧ make ļōmņak ko? Kwaļo̧ki n̄an ro m̧ōttam!

Kakeememej

  1. “Search, Ponder, and Pray,” Children’s Songbook, 109.