Digital Wōt
Kile Metak in Ko̧kkure ilo En̄jake
“Ļeo pāleeō ejjab kōm̧m̧ani jerbal in kōmmetak in ko̧kkure ko. Ekar lam̧ōj e eō im kūr eō kōn et ko, ak menin ejjab ko̧kkure, ejim̧we ke?”
Jejeļā bwe “Irooj ej kaliaiki jabdewōt m̧wil in ko̧kkure ko ilo jabdewōt jekjek.”1 Im jet iaan jekjek ko an ko̧kkure, āinwōt metak in ko̧kkure ilo ānbwin, epidodo loi, ak metak ilo en̄jake emaron̄ penļo̧k ad loi. Ko̧kkure in emaron̄ tōprak in tarpok, mijak, jook, ejjeļo̧k kōjatdikdik, im en̄jake ko ke ejjeļo̧k tokjāer.
Metak ilo en̄jake ej kajjieon̄ an juon armej n̄an joļo̧k bar anemkwoj in kāālet an ro jet, im kabojooj er kōn naan ko me rej kooktaktak en̄jake im jokāālet ko. Metak in ko̧kkure ilo en̄jake emaron̄ waļo̧k ilo jabdewōt kain jem̧jerā: ikōtaan ro pālele, ikōtaan jinen im jemān im ajri ro, ilo m̧ōttā, ilo jem̧jerā an rijerā, ak ilubwiljin rijerbal ro m̧ōttam̧.
Ta Waanjon̄ak ko Jet kōn Metak in Ko̧kkure ilo En̄jake?
Jeļā kōn kōkaļļe in metak in ko̧kkure ilo en̄jake emaron̄ jipan̄ kōjparok eok make im ro rejitōnbōro. Jet iaan m̧wil in ko̧kkure kein ekoba:
-
Kūr etan im likūt eok ilo wāween
-
Kajook eok ilo lo̧bwilej.
-
Kōm̧m̧an im jab kaorōk kōttōpar ko am̧ im ta eo kwoj kōm̧m̧ane.
-
N̄an ruōm̧ kōn kōm̧m̧an ko aer im jab bōk eddo.
-
Kōm̧m̧an bwe kwon en̄jake būrom̧ōj bwe kwon maron̄ kōm̧m̧an jabdewōt men n̄an er kōnke rekar kōm̧m̧an jabdewōt men n̄an eok.
-
Kattoļo̧k eok jān ro jet im kōjebwebweik wāween am̧ joļo̧k iien ko am̧.
-
Kōm̧m̧an kamijak eļan̄n̄e kwojjab kōm̧m̧ane juon wāween ejenoļo̧k ak kōm̧m̧an jet men.
-
Dāpij iakwe m̧ae kwoj kōm̧m̧an jet men n̄an er.
-
Kooktaktak eok ilo jetōb ilo am̧ kōjerbal tōmak ko am̧ ilo kabun̄ n̄an kōjebwebweik eok.
Ekōjkan Aō Maron̄ Metak in Ko̧kkkure ilo En̄jake?
Jon̄an wōt juon an aorōk n̄an jeļā bwe m̧wil in ko̧kkure ko im kōkaļļe in kakkōļ ko. Kein rej ellaajrak rej jet iaan jon̄ak in ļōmņak ko im kāālet ko me remaron̄ dāpij eok ilo juon jem̧m̧jerā eo eļap kōmetake.
-
Jekpen ņae m̧wil in ko̧kkure eo am̧ make:
-
Kwaļo̧k Bōd in m̧wil eo an kar kōmetake: “Ekkā an kōm̧m̧ane menin—ej pād ium̧win eļap eddo.
-
Kōkm̧anm̧anļo̧k m̧wil: “Ekar jab juon men eļap tokjen.”
-
Ņa ruōm̧ make kōn m̧wil ko m̧wilier: “Eļan̄n̄e in kar kōpooj kōjota eo ilo jejjetin iien, eban kar lukkuun kwo̧le im būron̄ eō.”
-
Kōjekdo̧o̧n en̄jake ko jab aenōm̧m̧an kaki. Jinoin, n̄e kwoj juon eo kwar metak ak ko̧kkure ilo en̄jake, kwomaron̄ kōņaan kōjekdo̧o̧n eo ekar kōmetak eok kōnke kwoj abōņōņō ak en̄jake nana kōn kwe make n̄e rej pād. N̄an dāpij jem̧jerā eo, kwomaron̄ kōjekdo̧o̧n en̄jake in metak kein. Ilo jet iien, metak emaron̄ jakoļo̧k āinwōt juon tōprak in imminene kōn m̧wil ko m̧wilier.
-
Kōjerbal tōmak ko an kabun̄ n̄an jim̧we eo an jekjek eo. Menin ekkā an waļo̧k ilo jukjuk in pād ko, ekoba membōr ro an Kabun̄ in. Armej eo me kar kōmetak im ko̧kkure emaron̄ ļōmņak rōt in: “Irooj ekar kakien kōj n̄an jeorļo̧k bōd. N̄a ij jerawiwi n̄e ijjab jeorļo̧k aer bōd.” Jeorļo̧k bōd ej juon kien. Ak, āinwōt an kar Elder Jeffrey R. Holland kar katakin kōn Rilo̧mo̧o̧r, “E ekar jab ba, ‘Kar jab kōm̧m̧an bwe kom̧in jab en̄jake metak eo em̧ool ak būrom̧ōj eo em̧ool jān en̄jake in kakkure ko kom̧ kar būki kōnke kōn ro jet.’ Barāinwōt ekar jab ba, ‘N̄an maron̄ lukkuun jeorļo̧k bōd, kom̧ij aikuj wōnm̧aanļo̧k wōt ilo juon jem̧jerā ekōmettak ak bar ro̧o̧l n̄an juon jekjek enana, ekakkure.’”2
-
Kajejtokjen aikuj ko am̧ make. Kwoj kōtōparak aikuj ko an ro jet ilo am̧ jab kōjparok eok make. . N̄an waanjon̄ak, en̄taan kōn metak ilo en̄jake n̄an kōm̧m̧an bwe jen jab kōmetak en̄jake ko an bar juon armej ak leļo̧k jāān n̄an juon m̧ōttad, jekdo̧o̧n n̄e edik am̧ jāān.
-
En̄jake an jej tokja. Metak in ko̧kkure ilo en̄jake emaron̄ kapenļo̧k am̧ en̄jake an wōr tokjem̧ Em̧ool kwoj ļaddik im leddik eo nejin Anij im ewōr ippam̧ piktok im mejān kajjik ekwojarjar. Tokjam̧, eo eļap, ejjab okoktak (lale Katak im Bujen Ko 18:10).
Ta eo Imaron̄ Kōm̧m̧an N̄e Ij Metak ilo En̄jake?
Jet iien juon jemjerā eo me kakkure ilo en̄jake emaron̄ ļap ko̧kkure me ekōm̧m̧an bwe en menin aikuj bwe jem̧jerā eo en jem̧ļo̧k. Ijoke, kōjepel jemjerā eo ejjab kāālet eo de ņe ilo aolep jekjek. Oktak emaron̄ bōk jikin, im juon jemjerā emaron̄ em̧m̧an kōn jerbal im kōmakijkij kōn jipan̄ eo an eo etijem̧ļo̧k. Eļan̄n̄e kwoj tōmak kwomaron̄ pād ilo juon jem̧jerā eo ekōmmetak ilo en̄jake, men kein remaron̄ jipan̄:
-
Kappukot rie im jipan̄ jān juon eo kwoj lōke eo me kwomaron̄ kwaļo̧k en̄jake ko am̧, āinwōt eo m̧ōttam̧, juon ritōl an Kabun̄ in, ak juon etijem̧ļo̧k ilo doulul ko an jukjuk in pād. Armej in emaron̄ letok jipan̄ ko ilo en̄jake im juon kōļmenļo̧kjeņ eo em̧m̧an kōn wōn kwe im maron̄ joļo̧k eļap iien ippam̧ jān ko̧kkure. (Lale abuse.ChurchofJesusChrist.org. Jiped “In Crisis” n̄an juon laajrakin taļeboon in jipan̄ ko,.)
-
Kōjeņoļo̧k im dāpij jikin ko ippān armej eo ej kwaļo̧k m̧wil in ko̧kkure ilo an kakilen m̧wil in ko̧kkure im kōm̧m̧an jon̄an am̧ wōnm̧aanļo̧k wōt im iiaio. Kwomaron̄ ba, “Ij en̄jake jab kautiej kōn kwe kiiō. Ikōņaan kōnnaan ippam̧, ak iban m̧ae kwoj kōm̧m̧an n̄an n̄a ilo wāween kautiej im jouj.
-
Bōk jipan̄ jān juon rikakpilōklōk eo etijem̧ļo̧k eo eļap an jeļā kōn kakkure ilo en̄jake im men ko rej waļo̧k jān e. Jet iien riko̧kkure ro rejjab jeļā bwe rej ko̧kkure armej. Remaron̄ ekkatak n̄an oktak eļan̄n̄e rej kōņaan kappok jipan̄. Eļan̄n̄e jemjerā eo ejjab wōnm̧aanļo̧k, kappukot jipan̄ jān ro retijem̧ļo̧k, ippānļo̧k jipan̄ eo an Irooj, enaaj jipan̄ kōmour eok.
-
Kappukot eļapļo̧k meļeļe ko rejipan̄ im kein jipan̄ ko ilo abuse.ChurchofJesusChrist.org.
Jekdo̧o̧n jekjek ta eo kwopād ie, jeļā bwe elōn̄ armej ro rej iakwe eok im kōņaan jipan̄ eok. Im ilo am̧ oktakļo̧k n̄an Jemedwōj Ilan̄, Rilo̧mo̧o̧r, im Jetōb Kwojarjar, kōjatdikdik im kōmour emaron̄ bōk jikin.