Autalavou Matutua
Pe Tutusa le Mausa ma le Fouvale?
E alaala le tusitala i Texas, ISA.
O se malamalama sili atu e uiga i mausa e mafai ona fesoasoani ia i tatou ia talitonu faapea, e i ai se aso, o le a laveaiina ai i tatou e le Alii mai le pologa.
I lo tatou lalolagi pau, o le mausa e faaoso ita ma o se mea moni e fetuunai ai le olaga mo nisi. Pe a tatou faaaogaina se mea soona fai e solaese ai mai le olaga, e pei o meaai, fualaau faatonuina, fesootaiga faaagafesootai, faitala, ponokalafi, talapepelo, taalo faitupe, e oo lava i le soona fai o faamalositino, e faigofie lava ona tatou utia i se faataamilosaga o se mausa.
A o o’u mataua tagata matagofie, alolofa, ma i latou o loo siomia ai au o tauivi ma mausa, e le nao le lolo atu i filifiliga sese, sa ou liliu atu i tusitusiga paia ma suesuega i le taimi nei e uiga i mausa ina ia malamalama atili ai i nei uunaiga faaneura ma matafaioi.
O Vao o Mausa
O le faatautaia o se mausa e mafai ona pei o le vaavaaia o se togalaau. Tatou te le veleina vao i le taimi e tasi ma faapea ai ua uma. Ua tatou iloa o le a toe oso ae foi isi vao, o lea tatou te veleina ai ma le faaeteete e le aunoa ia vao e puipui ai ia laau.
Afai o loo tatou tauivi ma se mausa, tatou te ono lotovaivai pe a toe faia tusa lava pe ua uma ona salamo ma sailia se fesoasoani. Tatou te ono ofo ma lagona le le fiafia ona e faatitino le malolosi o nei faaosoosoga pe a mavae ni vaitau fiafia naua po o le faanoanoa foi i o tatou olaga. (E faapei lava ona folifoli ina tele atu vao e ola a’e pe a mavae se timu manaia po o se afā malosi.)
O Mausa ma le Fouvale ma le Loto
Ua ou iloa e faaaoga e Satani ia mausa e fai ma “faamaoniga” faapea tatou te fananau mai lava ma le manao i le leaga, faapea na tatou ōia lava mai le amataga pe faapea foi ua fiu le Alii ia i tatou. E faaaoga e le tiapolo le maasiasi e faalotovaivaia ai i tatou, ma faapea mai ai po o le a lava le tele o taimi tatou te salamo ai, e faaauau pea lava ona oo mai faaosoosoga.
E tele mafuaaga e lilifa atu ai tagata i mausa, ae o mausa e tele ina amata i se taumafaiga e faamalie ia “manaoga loloto e lē mafaafetaia’ia.”1 O lea la, e ui o le fouvale e mafai ona tau atu ai i mausa ma o mausa foi e mafai ona afua ai le agasala, e tele ina totōina pe faateleina i vaivaiga nai lo le fouvale ma le loto i ai.2
Ae faafetai, ua tatou iloa o vaivaiga e mafai ona tatou maua ai le avanoa e aoao ai e uiga i le alofa tunoa ma atiina ae ai le faatuatua loloto i le mana faamalolo o Iesu Keriso.3
Seia Laveai mai le Nofopologa
Tatou te maua le malamalamaaga i le faatautaiga ma le sao ese mai le mailei o mausa mai ni vaega se lua o tagata o i le Tusi a Mamona: o le nuu o Limae ma le nuu o Alema.
O ia vaega uma e lua sa nofopologa mo se vaitau umi. Sa taufai iloa e ia vaega e lua “sa leai se auala sa mafai ona latou laveaiina ai i latou lava” mai le nofopologa (Mosaea 21:5). Na taufai liliu atu ia nuu e lua, i se taimi, i le Alii mo se fesoasoani.
Sa nofopologa le nuu o Limae ona o mafuaaga faasolitulafono. E aunoa ma le saili atu i le fesoaoani a le Alii, sa faatolu ona latou tau ma o latou fili “i le ita.” Sa latou faia’ina i taua taitasi. Ina ua amata ona latou faalotomaualaloina i latou lava, “sa tuai ona faafofoga mai le Alii i la latou tagi … [peitai na Ia] tali ma sa faafofoga mai ia latou tagi, ma amata ona faamalūlū loto o sa Lamanā sa amata ona latou faamāmāina a latou avega” (Mosaea 21:15; faaopoopo le faamamafa). Sa faamanuiaina i latou ona o lo latou lotomaualalo faateleina, peitai “sa lei tusa ai ma le silafaga a le Alii ia laveaiina i latou mai le pologa” seia umi se taimi mulimuli ane.
Sa nofopologa le nuu o Alema e ui i lo latou amiotonu, ae sa latou “sasaa atu o latou loto i le [Atua].” E ui i le silafiaina o o latou manaoga amiotonu, ae sa faatagaina e le Atua se taimi i le va o lo latou faatagataotauaina ma lo latou laveaiina. A o faaauau ona latou faalagolago ia te Ia, sa Ia folafola atu o le a Ia “faamāmāina foi avega ua tuu i o outou tauʼau, e oo ia te outou tou te lē lagonaina i latou i luga o o outou tua, aʼo outou [i ai] lava i le pologa.” I le tali atu, sa latou “gauai atu ma le loto fiafia ma le onosai i le finagalo atoa o le Atua” (Mosaea 24:12, 14, 15).
Na mulimuli ane laveaiina ia vaega uma e lua. Ua faapea foi ona folafola mai ia i tatou e faapea afai tatou te “liliu atu i le Atua i o tatou nofopologa, e “mafai ona [tatou] tutu o ni molimau mo [Ia] i le lumanai” ma o le a mafai ona tatou “iloa ma le mautinoa o le Alii le Atua, [e] asiasi atu i [Ona] tagata i o latou puapuaga.” (Mosaea 24:14)---ma o latou mausa!
Ia Faamafanafanaina Outou
Afai o e tauivi ma mausa, manatua, faatasi ai ma le fesoasoani a le Alii, o le taimi lea e mafai ona avea ma eleele lafulemu mo le atiina a’e o uiga paia faaKeriso. A e faateleina lou lotomaualalo, o le a mafai ona e aoaoina le onosai, agaalofa, tali-tiga, ma le agamalu.
Talanoa i ou taitai perisitua ma i latou e mafai ona ofoina atu se fesoasoani, ma faaaoga le tele o meafaigaluega ua saunia e le Tama Faalelagi e fesoasoani ai ia te oe ia maua lou saolotoga. Faalagolago i le Alii, ao e mulimuli ma le maelega ia te Ia, e mafai e Ia ona faaliliu lenei luitau faavaivai loto ma le faafiufiu i se avanoa mamana mo le toe faaleleia faaleagaga.4
Fai mai se uluai Au Paia o Aso e Gata Ai i Ausetalia, ina ua ia faatusatusa lona taimi ua tuanai ma le taimi ua i ai nei: “O lo’u olaga ua tuanai [sa] o se vaomatua o vao, sa seāseā i ai se fugalaau e Tutupu mai ai. [Peitai] o le taimi nei ua mou atu le vao, a ua Fuga mai ai fugalaau i le mea sa vaoa.”5
A oo ina tatou veleina e le aunoa a tatou togalaau ma liliu atu i le Alii i o tatou tofotofoga, o le a tatou mauaina le folafolaga na tuuina atu i le nuu o Alema: “Ia faamafanafanaina outou, ona o le aso a taeao o le a Ou laveai ai outou mai le pologa” (Mosaea 24:16).
Toaga pea e vele---e aoga le seleselega!