Autalavou Matutua

E Mafai Ona E Maua le Saolotoga

Pe ua e, po o se isi e te alofa i ai, ua utia i le faataamilosaga o le faaleaga mea, salamo, toe faaleleia ma toe faaleaga foi? E toatele le autalavou matutua sa matou galulue a o avea o se epikopo o le uarota a le autalavou matutua, na utia i le faataamilosaga lava lea e tasi. Peitai e toatele foi na maua le saolotoga e ala i le Togiola a Iesu Keriso. O savali e uiga i mausa i le vaega o le masina lenei o loo tuuina atu ai se malamalamaaga e fesoasoani i le mauaina o le saolotoga---mo oe lava faapea foi ma isi.

O le mea aupito taua e tatau ona tatou manatua o le, o i tatou uma o ni fanau pele a le Tama Faalelagi. Na aoao mai e Elder Dieter F. Uchtdorf, ’E le o faatalitali [le Atua] seiloga e te faatoilaloina ou vaivaiga ma mausa leaga ona faatoa alofa mai lea ia te oe. O loo alofa o Ia ia te oe i le taimi nei faatasi ma se malamalamaaga atoa i au tauiviga. … Na te silafia lou salamo mo taimi na e sasi ai pe toilalo ai. Ma o loo alofa pea o Ia ia te oe” (“Ola Fiafia i le Talalelei,” Liahona, Nov. 2014, 123; faaopoopo le faamamafa).

I se isi itu, o le a taumafai Satani e faatalitonu oe o le a mamao ona e toe maua le alofa o le Tama Faalelagi ma le mana o le Faaola e faaliliu ai ma faamamaina oe. O le a taumafai Satani ia taofia oe i se vaitaavili o le maasiasi ma le inoino ia te oe lava, ae aua e te talitonu i ana pepelo.

Nai lo lena, liliu atu i le Tama Faalelagi. Aua e te fefe e talanoa atu i lou epikopo po o le peresitene o le paranesi ma isi e alolofa ia te oe. A o e faitau i tala o le faamoemoe mai isi talavou matutua o e sa aafia i mausa, ia e gaoioi i luga o uunaiga e te mauaina. Ia onosai ia te oe lava, manatua lou natura paia, ia taitasi le aso i le taimi, ma talitonu i le mana faamalolo o Iesu Keriso. O Ia ma le tele naua o punaoa o le a fesoasoani ia i tatou ia manuia i le sailiga o le saolotoga tatou te naunau i ai. Aua lava e te fiu.

O lau uo,

Richard Ostler

Malamalamaaga …

Mai le autalavou matutua

e uiga i le faatoilaloina o mausa

“Ia i ai sau paga faatuatuaina. Ta’u i se tasi e te talitonuina pe iloa o le a fesoasoani ia te oe e uiga i au tauiviga ona faatulaga lea o se fuafuaga ma i latou e faatoilaloina ai. Siaki soo i latou.”

—Kaitlin Chan, Alapama, ISA

“O le alu i fonotaga o le Polokalama a le Ekalesia mo le Addiction Recovery e fesoasoani tele! E mafai ona tatou lototoa ma fefaasoaai o tatou aafiaga.”

—Emma Mecham, Idaho, ISA

“Fesootaiga, tali atu mo oe lava, ma le tausiga o oe lava.”

—Tristen Foster Iuta, ISA

“Toe faaleleia o le tauiviga. O tatou uma o ni tagata ola. O le fesootai saoloto ma le faaalia o le alofa e tele naua le aoga nai lo lou iloa.”

—Mackenzie Molewyk, Ausetalia i Sisifo, Ausetalia

Mai taitai o le Ekalesia

“Ia manatua i taimi uma, faatasi ai ma le fesoasoani a le Faaola, e mafai ona faasaolotoina oe mai mausa. Atonu o se ala umi ma faigata, ae o le a le fiu lava le Alii ia te oe. E alofa o Ia ia te oe. Na puapuagatia Iesu Keriso i le Togiola e fesoasoani ina ia e sui, ia faasaoloto oe mai le nofopologa i le agasala.

“O le mea sili ona taua o le taumafai—o nisi taimi e tele ni nai taumafaiga e faia ai a o lei maua e tagata le manuia. O lea ia aua nei fiu. Aua nei lafoaia le faatuatua. Ia faalatalata lou loto i le Alii, ma o le a Ia tuu atu ia te oe le mana o le laveaiga. O le a Ia faasaolotoina oe.”

Elder Dieter F. Uchtdorf o le Korama a Aposetolo e Toasefululua, “O E Moe I Lenei Taimi o le Toefuataiga?” Liahona, Me 2014, 59.

Pe i ai sou aafiaga e faasoa mai e uiga i se mea na e aoaoina mai le konafesi aoao o lenei masina? Auina mai lau tali i le liahona.ChurchofJesusChrist.org a o lei oo i le aso 31 Oketopa, 2020.

Faasoa Mai Lau Tala

E i ai sau tala uiga’ese e faasoa mai? Pe e te manao e vaai i ni tusiga e uiga i ni mataupu faapitoa? Afai o lea, matou te fia faalogo atu ia te oe! E mafai ona e tuuina mai lau tusiga po o ou manatu faaalia i le liahona.ChurchofJesusChrist.org.

Saili nei tusiga ma isi:

• I le liahona.ChurchofJesusChrist.org

• I le YA Weekly (i lalo o le vaega mo Autalavou Matutua i le Gospel Library)