Të Rinjtë dhe të Rejat në Moshë Madhore

Ti Mund të Gjesh Liri

A keni ngecur ju apo dikush që e doni, në ciklin e gabimit, pendimit, rizotimit dhe përsëri të gabimit? Shumë të rinj e të reja të mrekullueshme në moshë madhore me të cilët kam punuar ndërkohë që shërbeja si peshkop lagjeje për të rinjtë dhe të rejat në moshë madhore beqarë, kishin ngecur në të njëjtin cikël. Por shumë gjetën gjithashtu liri nëpërmjet Shlyerjes së Jezu Krishtit. Mesazhet rreth varësisë në pjesën e këtij muaji japin ide të dobishme për gjetjen e lirisë – për ju vetë dhe për të tjerët.

Gjëja më e rëndësishme që duhet të mbajmë mend, është se të gjithë ne jemi fëmijë të dashur të Atit Qiellor. Plaku Diter F. Uhtdorf dha mësim: “[Perëndia] nuk po pret që t’ju dojë derisa t’i keni mposhtur dobësinë tuaj dhe zakonet tuaja të këqija. Ai ju do sot, me një të kuptuar të plotë të ndeshjeve tuaja. … Ai e di brejtjen tuaj të ndërgjegjes për kohët kur nuk ia keni dalë mbanë apo keni dështuar. Dhe Ai akoma ju do” (“Të Jetuarit e Ungjillit Plot Gëzim”, Liahona, nëntor 2014, f. 123; theksimi i shtuar).

Nga ana tjetër, Satani do të përpiqet t’ju bindë se keni shkuar tepër larg dhe jeni të përjashtuar nga dashuria e Atit Qiellor dhe fuqia e Shpëtimtarit për t’ju shndërruar dhe pastruar. Satani do të përpiqet t’ju mbajë në një shtjellë turpi dhe neveri për veten, por mos u besoni gënjeshtrave të tij.

Përkundrazi, drejtojuni tek Ati Qiellor. Mos kini frikë t’i hapeni peshkopit ose presidentit tuaj të degës dhe të tjerëve që ju duan. Teksa i lexoni historitë e shpresës nga të rinj e të reja të tjera në moshë madhore që kanë qenë të prekur nga varësia, veproni sipas mbresave që merrni. Jini të duruar me veten, kujtoni natyrën tuaj hyjnore, veproni ditë pas dite dhe besoni te fuqia shëruese e Jezu Krishtit. Ai dhe kaq shumë burime të tjera do të na ndihmojnë t’ia dalim mbanë për gjetjen e lirisë që e dëshirojmë. Mos hiqni dorë kurrë.

Miku juaj,

Riçard Ostler

Ide …

Nga të rinj e të reja në moshë madhore

për mposhtjen e varësisë

“Gjeni një bashkëpunues me përgjegjshmëri. Tregojini dikujt që i mirëbesoni ose e dini që do t’ju ndihmojë me gjënë që ju mundon dhe më pas bëni një plan me të që ta mposhtni problemin. Vëreni atë në dijeni herë pas here.”

– Kejtlin Çen, Alabama, SHBA

“Vajtja në mbledhjet e Programit të Kishës për Shërimin nga Varësitë ndihmon së tepërmi! Ne mund të jemi të hapur dhe të tregojmë përvojat tona.”

– Ema Mekam, Ajdaho, SHBA

“Komunikimi, përgjegjshmëria dhe kujdesi për veten.”

– Tristen Foster, Jutë, SHBA

“Shihini mundimet si të zakonshme. Të gjithë ne jemi njerëz. Komunikimi i hapur dhe shfaqja e dashurisë bën shumë më tepër nga sa mund të mendoni.”

– Mekenzi Moleuik, Australia Perëndimore, Australi

Nga udhëheqësit e Kishës

“Gjithmonë kujtoni, me ndihmën e Shpëtimtarit, ju mund të çliroheni prej varësisë. Mund të jetë një shteg i gjatë, i vështirë, por Zoti nuk do të heqë dorë prej jush. Ai ju do. Jezu Krishti vuajti Shlyerjen që t’ju ndihmojë të ndryshoni, të çliroheni nga robëria e mëkatit.

Gjëja më e rëndësishme është që të vazhdoni të përpiqeni – nganjëherë duhen disa përpjekje përpara se njerëzit t’ia dalin me sukses. Prandaj mos hiqni dorë. Mos e humbisni besimin. Mbajeni zemrën pranë Zotit dhe Ai do t’ju japë fuqinë e çlirimit. Ai do t’ju bëjë të lirë.”

Plaku Diter F. Uhtdorf, i Kuorumit të Dymbëdhjetë Apostujve, “A Po Flini Gjatë Rivendosjes?” Liahona, maj 2014, f. 61.

A keni një përvojë për të treguar rreth diçkaje që mësuat nga konferenca e përgjithshme e këtij muaji? Na e dërgoni përgjigjen tuaj te liahona.ChurchofJesusChrist.org brenda datës 31 tetor 2020.

Tregoni Historinë Tuaj

A keni ndonjë histori mbresëlënëse për të treguar? Ose, a dëshironi të shihni artikuj mbi tema të caktuara? Nëse po, dëshirojmë të dëgjojmë nga ju! Mund t’i dorëzoni artikujt tuaj ose përshtypjet tuaja te liahona.ChurchofJesusChrist.org.

Gjejini këta artikuj dhe më shumë:

• Te liahona.ChurchofJesusChrist.org

• Tek E Përjavshmja për TRMM‑të (në pjesën “Të Rinjtë dhe Të Rejat në Moshë Madhore” te programi kompjuterik Gospel Library [Biblioteka e Ungjillit])