Feiā ʼāpī paʼari

E ’itehia ia ’outou te ti’amāra’a

’Ua topa ānei ’outou e aore ra te tahi ta’ata tā ’outou i here, i roto i te ’ohura’a o te fa’a’ino, te tātarahapa, te fafau fa’ahou, ’e te fa’a’ino fa’ahou ? E rave rahi feiā ’āpī pa’ari fa’ahiahia tā’u i fārerei, a tāvini ai au ’ei episekōpo no te hō’ē pāroita feiā ’āpī pa’ari ’ōtahi, tei mau i roto i te marei o teie ’ohura’a. Terā rā, e rave rahi ato’a tei ’ite i te ti’amāra’a nā roto i te tāra’ehara a Iesu Mesia.Te hōro’a mai nei te mau parau poro’i nō ni’a i te hia’ai māha ’ore i roto i te tuha’a nō teie ’āva’e i te mau mana’o maita’i nō te ’ite i te ti’amāra’a— nō ’outou iho ’e nō vetahi’ē atu.

Te ohipa faufa’a roa a’e e ti’a ia tātou ’ia ha’amana’o maori rā e mau tamari’i here tātou pā’āto’a nā te Metua i te ao ra. ’Ua ha’api’i mai o Elder Dieter F. Uchtdorf ē, « ’Aita te [Atua] e tīa’i nei ’ia upo’oti’a roa ’outou i ni’a i tō ’outou paruparu ’e te mau peu ’ino, nō te here ia ’outou. ’Ua here ’oia ia ’outou i teie mahana ma te ’ite hope roa i tā ’outou mau ’arora’a. ’Ua ’ite ’Oia i tō ’outou mana’o inoino nō tō ’outou topara’a ’e te hapera’a. ’E’ua here tāmau noa ’oia ia ’outou » (« Te orara’a i te ’evanelia ma te ’oa’oa », Liahona, Novema 2014, 123 ; ha’apāpūra’a i āpitihia atu).

I te tahi pae, e tamata Sātane i te parau ia ’outou ē, e ha’apaehia ’outou ’e e’ita e ti’a ia ’outou ’ia fāna’o i te here o te Metua i te ao ra ’e i te mana o te Fa’aora nō te taui ’e nō te tāmā ia ’outou. E tāmata Sātane i te tāpe’a ia ’outou i roto i te hō’ē pū’āhiohio o te ha’amā ’e te ha’afaufaura’a ia ’outou iho, ’eiaha rā e ti’aturi i tāna mau ha’avare.

Terā rā, a fāriu atu i ni’a i te Metua i te ao ra. ’Eiaha e mata’u ’ia fa’a’ite i tō ’outou episekōpo ’aore rā, te peresideni āma’a ’e te tahi atu mau ta’ata tei here ia ’outou. ’Ia tai’o ana’e ’outou i te mau ’ā’amu o te tahi atu mau feiā ’āpī pa’ari tei ro’ohia i te hia’ai māha ’ore, ’a rave mai te au i te mau mana’o i fāri’ihia. ’Afa’a’oroma’i ia ’outou iho, a ha’amana’o i tō ’outou nātura hanahana, ’a rave hō’ē mahana i te taime hō’ē, ’e a ti’aturi i roto i te mana fa’aora o Iesu Mesia. E tauturu ’oia ’e te mau rāve’a tauturu e rave rahi, ia tātou ’ia manuia i roto i te ’imira’a i te ti’amāra’a tā tātou e hina’aro. ’Eiaha roa atu e fa’aru’e.

Tō ’oe hoa,

Richard Ostler

Mau mana’o

Nō roto mai i te feiā ’āpī pa’ari

Nō ni‘a i te upo’oti’ara’a i ni‘a i te hia’ai māha ’ore

« Fāri’i i te hō’ē ’āpiti ti’a’au pāpū. ’A parau i te hō’ē ta’ata tā ’outou e ti’aturi ’aore rā, i ’ite ē, e tauturu ia ’outou i roto i tā ’outou ’arora’a ’e i muri iho, a hāmani i te hō’ē fa’anahora’a e o rātou nō te upo’oti’a i ni’a i te reira. ’A hi’opo’a i pīha’i iho ia rātou i terā e terā taime ».

—Kaitlin Chan, Alabama, USA

« E tauturu rahi te haerera’a i te fa’anahora’a a te ’Ēkālesia nō ni’a i te fa’aorara’a i te hia’ai māha ’ore ! E nehenehe tātou e fifi ’e ’a fa’a’ite i tō tātou mau ’itera’a »

—Emma Mecham, Idaho, USA

« Te ha’apararera’a, te ti’a’aura’a, ’e te aupurura’a iāna ’iho »

—Tristen Foster, Utah, USA

« Fa’atano te ’arora’a. E ta’ata tātou pā’āto’a. Te ’āparaura’a ma te ’ā’au matara ’e te fa’a’itera’a i te here, e ’ohipa rahi atu tā te reira e rave, hau atu i tā ’outou e mana’o ra ».

—Mackenzie Molewyk, Western Australia, Australia

Nō roto mai i te feiā fa’atere o te ’Ēkālesia

« ’A ha’amana’o noa ē, nā roto i te tauturu a te Fa’aora, e nehenehe ’outou e fa’ati’amā ia ’outou i te hia’ai māha ’ore. E riro paha ’ei haere’a roa ’e te fifi, e’ita rā te Fatu e fa’aru’e ia ’outou. ’Ua here ’oia ia ’outou. ’Ua mamae Iesu Mesia i te Tāra’ehara nō te tauturu ia ’outou ’ia taui, ’ia fa’ati’amā ia ’outou i te tītīra’a o te hara.

« Te ’ohipa faufa’a roa a’e, o te tāmata-noa-ra’a ïa—i te tahi taime, e tītauhia e rave rahi tāmatara’a hou a manuïa ai te ta’ata. Nō reira, ’eiaha e fa’aru’e. ’Eiaha e ha’amo’e i te fa’aro’o. ’A tape‘a noa i tō ’outou ’ā’au i pīha’i iho i te Fatu, ’e nāna e hōro’a mai ia ’outou i te mana nō te fa’aorara’a. Na’na ’outou e fa’ati’amā.

Elder Dieter F. Uchtdorf nō te pupu nō te Tino ’Ahuru ma Piti ’āpōsetolo, « Tē ta’oto ra ānei ’outou i roto i te fa’aho’i-fa’ahou-ra’a mai ? » Liahona, Mē 2014, 61.

Tē vai ra ānei tō ’outou hō’ē ’itera’a nō te fa’a’ite nō ni’a i te hō’ē mea tā ’outou i ha’api’i mai nā roto mai i te ’āmuira’a rahi o teie ’āva’e ? ’A hāpono mai i tā ’outou pāhonora’a i te liahona.ChurchofJesusChrist.org i te 31 nō ’Ātopa 2020.

Fa’a’ite i tō ʼoutou ʼāʼamu

E ’ā’amu fa’ahiahia ānei tā ’outou nō te fa’a’ite atu ? ’Aore rā e hina’aro ānei ’outou ’ia ’ite i te mau parau o te ve’a nō ni’a i te tahi mau tumu parau ta’a ’ē ? Mai te mea ē, te reira, tē hina’aro nei mātou e fa’aro’o ia ’outou ! E nehenehe ’outou e hāpono mai i tā ’outou mau parau pāpa’i ’aore rā tō ’outou mana’o i te liahona.ChurchofJesusChrist.org

’A ’imi i teie mau parau o te ve’a ’e hau atu :

• I ni’a i te liahona.ChurchofJesusChrist.org

• I roto i te ve’a tāhepetoma nā te FAP (i roto i te tuha’a « Feiā ’Āpī Pa’ari » i roto i te Vaira’a buka ’evanelia)