Ni’a noa i te rorouira : Feiā ’Āpī Pa’ari

Hau atu i te hō’ē rāve’a nō te tuatāpapa i te mau pāpa’ira’a mo’a

Nā Marissa Widdison

Te mau ve’a a te ’Ēkālesia

Noa atu ē, ’aita ’outou e au ’ia tai’o, tē vai ra e rave rahi rāve’a nō te tuatāpapa i te mau pāpa’ira’a mo’a.

E mea au roa nā’u tō’u pi’ira’a i teienei ’ei fa’ata’i piāna nō te paraimere. Tau hepetoma i ma’iri a’e nei, tē ha’api’ipi’i ra te mau tamari’i i te hō’ē hīmene. ’Ua putapū vau i te Vārua ’a hīmene ai rātou :

’Imi, feruri, ’e pure
Te reira te mau mea tā’u e rave. 
E arata’i te Vārua, ’e, e fa’ahōhonu,
E ’ite au ē, e parau mau te mau pāpa’ira’a mo’a.1

Terā rā, ’ua puta ato’a mai te hō’ē uira’a i roto i tō’u upo’o. ’Āhiri ē ’aita ’outou—mai tā te ’īrava mātāmua o te hīmene e parau ra—« e au ’ia tai’o i te mau pāpa’ira’a mo’a » ? Tē mana’o nei au ē, ’ua puta mai te tumu parau o te tai’ora’a i roto i tō’u ferurira’a ’aita i maoro a’e nei nō te mea, ’ua hau i te hō’ē hoa tei fa’a’ite ē, e fifi tō rātou ’ia tai’o. ’E e rave rahi ta’ata tā’u i mātau ’aita rātou e au ’ia tai’o, tīrārā atu ai ! Tē vai ra ānei hō’ē rāve’a e nehenehe rātou e fāri’i i te hō’ē ’itera’a faufa’a nō ni’a i te mau pāpa’ira’a mo’a ’e ’ia fa’ahotu i te « hō’ē ’itera’a pāpū ē, e parau mau te reira » ?

Mai te huru ra ē, e ha’api’i maita’i a’e te ta’ata mai te mea ē, e vauvauhia te ha’amāramaramara’a i roto e rave rahi huru, ma te hi’o mata ’e te parau, ’e ’ia nā ni’a iho e rave rahi taime te fa’ahitira’a i te mau ha’api’ira’a. Ma te reira ferurira’a i roto i te upo’o, ’ua tāmata vau i te feruri i te mau rāve’a e rave rahi e ’itehia iā’u, nō te tuatāpapa i te mau pāpa’ira’a mo’a. Teienei, ’oia mau, e’ita e tano te mau mea ato’a i ni’a i teie tāpura, mai te mau mea faufa’a nō tō tātou ’itera’a pāpū, tei ha’api’ihia mai ’e te mau peropheta tei tuatāpapa māite ma te hōhonu i te pāpa’ira’a mo’a—te tahi o te reira e mau mana’o vitiviti noa ïa ’e te ’ārearea—’ua feruri rā vau ē, e nehenehe te reira e fa’atupu mai i tō ’outou iho mau mana’o ’āpī. E mata nā tātou i te rohi pāpū i roto i te tuatāpapara’a pāpa’ira’a mo’a, ’ia nehenehe ho’i ia tātou, mai tā te hīmene e parau ra ē, « haere mai e māramarama » ’āmui ana’e !

Te mau mana’o nō te tuatāpapara’a i te mau pāpa’ira’a mo’a

’A ’imi i te mau ta’o tei fa’ahiti-pinepine-hia i roto i tō ’outou ha’amaita’ira’a pātereareha.
’A tuatāpapa ai ’outou, ’a pāpa’i i te hō’ē hōho’a nō ni’a i tō ’outou mau mana’o i roto i te hō’ē buka ’ā’amu tuatāpapara’a ’aore rā, i roto i te hiti o tā ’outou buka ha’api’ira’a Mai, pe’e mai.
’A hāmani i te hō’ē hōho’a na’ina’i nō te hō’ē ’ā’amu pāpa’ira’a mo’a.
’A pi’i i te hō’ē fēti’i i te ātea roa ’e a tai’o ’āmui nā roto i te niuniu.
’A pāpa’i i te hō’ē tāpura uira’a nā ’outou i te Atua ’e ’a ’imi i te mau pāhonora’a ’a tai’o ai ’outou.
’A māta’ita’i i te hō’ē hōho’a video nō roto mai i te BookofMormonVideos.org ’aore rā BibleVideos.org.
’A ’īriti i te mau pāpa’ira’a mo’a i te hō’ē pene ’e ’a ha’amata i te tai’o.
’A hīmene i te hō’ē hīmene ’e ’a ’imi i te mau pāpa’ira’a mo’a tei tāpurahia i te hope’a o te hīmene.
’A haere i ni’a i te topics.ChurchofJesusChrist.org ’e ’a tuatāpapa i te hō’ē mea e ’ana’anataehia e ’outou.
’A hi’ohi’o i te qmau hōho’a i ni’a i te natirara e fa’ahōho’a ra i te ’ā’amu o te pāpa’ira’a mo’a tā ’outou e tuatāpapa ra.
’A tai’o noa i te pene ’e te mau upo’o parau o te tuha’a o te hō’ē buka.
’A fa’ata’i i te hō’ē mauha’a ’upa’upa ma te marū ’a tai’o noa ai ma te reo pūai.
’A ’imi i te mau rāve’a ’ia tū’ati te pene tāta’itahi o te pāpa’ira’a mo’a i ni’a i te hiero.
Mai te mea ’ua mātau ’outou i te tuatāpapa i te mau pāpa’ira’a mo’a i ni’a i te rorouira, ’a tāmata i te tai’o i te mau parau nene’ihia ’aore rā, ’a tai’o i ni’a i te rorouira.
’A pēni ’aore rā, ’a pāpa’i i te hō’ē hōho’a ’aore rā, hō’ē ’ā’amu nō te hō’ē pāpa’ira’a mo’a.
’A fa’ahua ē, ’ua fa’auehia ’outou ’ia paraparau nō ni’a i te hō’ē tumu parau i roto i te purera’a, ’e ’a tuatāpapa nō te reira.
I muri a’e i te tai’ora’a i te pene pāpa’ira’a mo’a auhia e ’outou, ’a pāpa’i fa’ahou i te reira nā roto i tā ’outou iho mau parau.
’A pe’e i te mau nota i raro i te ’api i roto i te hō’ē ’īrava auhia e ’outou, i muri iho, ’a pe’e i te mau nota i raro i te ’api i roto i te mau ’īrava ’o tei arata’i ia ’outou, i muri iho ’a pe’e i te reira mau nota, ’e ’a nā reira noa.
’A tai’o ha’apūai te tahi i muri mai i te tahi te mau ’īrava ’e te mau hoa ’e e paraparau i ni’a i te mea tā ’outou i tai’o.
’A fa’a’ohipa i te buka tumu parau (Topical Guide) nō te tuatāpapa te hō’ē ta’o ’aore rā, te hō’ē tumu parau.
’A ’imi i te mau pāpa’ira’a mo’a ato’a i roto i te mau fa’ata’ara’a i te pae hope’a o te hō’ē ’āmuira’a rahi.
’A tu’u i te hō’ē pāpa’ira’a mo’a i te hō’ē vāhi e ’ite ’outou i te mau mahana ato’a, ’e ’a tāmata i te tāmau ’ā’au i teie hepetoma.
’A pāpa’i i te mau tāreta i te ta’ata ma te pāpa’i i te mau pāpa’ira’a mo’a tāmāhanahana i roto.
’A fa’a’ohipa i te vaira’a Buka ’Ēvanelia nō te fa’aro’o i te mau pāpa’ira’a mo’a ’ia tai’ohia te reira ma te pūai.
’A pāpa’i i te ’āna’ira’a tau o te mau ’ohipa i tupu ’a tai’o ai ’outou i te Buka a Moromona.
’A ’ite mai i te hō’ē « hoa pāpa’ira’a mo’a » ’e ’a hāpono i te hō’ē parau te tahi ’e te tahi i te po’ipo’i tāta’itahi.
’A ha’amata nā te pene hope’a o te Buka a Moromona ’e ’a tai’o e tae atu i te ha’amatara’a.
’A tai’o i te mau pāpa’ira’a mo’a tē vai ra te ’itera’a pāpū i roto, ’e ’a pāpa’i i tō ’outou ’itera’a pāpū.
Mai te mea ē, e fa’ata’i ’outou i te hō’ē mauha’a ’upa’upa, ’a tāmata i te pāpa’i i te hō’ē hīmene nō ni’a i te mana’o o te hō’ē ’īrava.
’A ani i te mau melo o te ’utuāfare ’aore rā, i te mau hoa nō ni’a i tā rātou mau ’īrava au roa.
’A tai’o ai ’outou, ’a pāpa’i i te hōho’a o te mau tauha’a tei fa’ata’ahia, mai te fana a Nephi tei fati.
’A tai’o ’e ’a tāmau ’ā’au i te ’īrava tei fa’a’ohipahia nō te ha’api’i i te mau ha’api’ira’a misiōnare, e ’itehia i roto i te pene toru o te buka ra ’A poro i tā’u nei ’evanelia.
’A tai’o i roto i te Bibilia i te hō’ē buka aitā ’outou i tai’o a’e nei.
’A ’imi i te orara’a o te hō’ē aito nō te pāpa’ira’a mo’a ’e ’a pāpa’i i te hō’ē parau fa’a’ite nō ni’a iāna.
’A ha’uti teata ta’ata ora i te hō’ē ’ā’amu o te pāpa’ira’a mo’a i roto i te hō’ē purera’a pō ’utuāfare ’aore rā, i roto i te tahi atu ’ohipara’a nā te ’Ēkālesia.
’A ’imi i te hō’ē fa’ahitira’a parau nā te hō’ē ti’a fa’atere nō te ’Ēkālesia e tano i ni’a i te pene tāta’itahi tā ’outou i tai’o.
’A tai’o i te mau tauturu nō te tuatāpapara’a pāpa’ira’a mo’a, mai te ’Ōmuara’a i te Buka a Moromona ’aore rā, te Fa’atorora’a parau o te Bibilia.
’A haere i roto i te nātura ’e ’a feruri e nāhea te mea tā ’outou e ’ite ra i te tū’ati i ni’a i te ’evanelia, ’e ’a ’imi i te hō’ē ’īrava nō ni’a i te mea tā ’outou i ha’api’i mai.

Tē vai ra tō ’outou iho mau mana’o ? ’A fa’a’ite i te reira i tō ’outou mau hoa.