Te Mii ni Burabeti E Kairai Nakon te Koaua
I a tia n ti iangoa te boua ae kaaraki?
Tabeua te ririki n nako, I kaitibo ma te mitinare, ao I rangi ni kekeiaki ma aoraku. I korakora nanokawakiu, ao te bwai ae I tangiria bwa na karekei tabeua kairiiri ni maiu.
I aki rangi n onimakinai ke ni ingainga ni kan ataa te bwai teuana, ke te ekaretia aei ae aaki toki n tataekinna mitinare. Ma e ngae n aane, I karaoa te bwai ae I aki kukurei iai n ira te bootaki n toa n te moan tai.
Tinau e irai, ao ngke ti a roko n te umwantabu, e nako nanou teutana ngke I noora kiakian raneanean te boua te koora ae kaaraki i taubukina. Bon te kabanea n tikiraoi ni bwai ae I tuai man nonoria! E taraa n rangin n tikiraoi ao n anainano te kateitei aei are e a bita kateiu ni kabane, ao I ingainga n rin inanona.
N tain te toa, I kaini matau, ao tamnein Iesu e roko n au iango. Ngke I ikawai rake, I aki toki n ongongo taekan Iesu, ma e tuai n tauraoi nanou Irouna ni karokoa te tai aei. I tuai naba ni wareka te Baibara. Ao I taekinna ma te koaua bwa I aki ataia bwa bukin tera e mate Iesu Kristo iaon te kaibangaki ke bukin tera iai Ana Abotoro aika tengaun ma uoman ke bukin tera ngkai a rangi ni mwaiti burabeti aika a reirei Taekana.
Ma n te tai aei, ao I namakinna ae I toma mangaia. N tokina e taraa ni koaua nakoiu. I namakina te tangira ae korakora ao te nano ni kan reiakina ae mwaiti riki. I kakoaua Ngaia bon aan te koaua ao te tangira are I ukoukoria.
Tabeua te bong imwiina, I titirakina tinau ibukin te boua te koora ae karaaki are I nooria. E taraa n aki ota ao e taku bwa e aki noora te boua ae kaaraki, ma e tangiria ni manga buti riki irarikin te kateitei n nooria imwiin are I kabwarabwara aron tikiraoina.
Ma ngke ti roko n te unwantabu, te boua ae kaaraki are I nooria tabeua te bong imwain ae bua. I aki kona ni kakoaua! Iai ae a tia ni kamwainga te boua are e kaaraki?
N te taromauri n te wiiki are imwiina, I titirakina temanna ibukin te boua ae kaaraki. E e aki kakoaua ao e taku bwa e aki kakatokaaki te boua ae kaaraki iaon te umwantabu. Ma ngke I kabwarabwara aron taraakin te boua are kaaraki, e taku, “O! Ko nanona bouan Moronaai? Aki memena iaon ana kateitei te Ekaretia, ma bouana ae kaaraki a mena iaon angiin tembora.” E tuangai bwa Moronaai bon te burabeti n Ana Boki Moomon ao iai naba tabena n te Mwakuri ni Kamaiu.
I kabwarabwara bwa I a tia n iangoa te boua are kaaraki. Ma I ukeuke n Ana Boki Moomon ibukin taekan Moronaai. I reiakinna bwa e bua ana utu ao raoraona, bwa e kamwarakaki ibukin ana bure te aonaaba, ao ni kaineti ma bwaai ni kabane aikanne, e teimatoa n iri ana tua te Atua ni kamanoa te koaua. I reiakinna naba bwa e a tia ni kaoti nakon Iotebwa Timiti n taai aika mwaiti n anganna rongorongo mairoun Tamara are i Karawa. Reiakinan taekan Moronaai ao ana reirei ao e kanga ni kabanea korakorana n ira Kristo ao ni kawakina te koaua are e buokai n raira nanou ni kabane nakon te euangkerio.
Ngke e reke au tai n nakon te Sapporo Japan Tembora, I noora bouan Moronaai ae kaaraki n te moan n tai. Bon te boua ae kaaraki are I nooria iaon ana kateitei te ekaretia. Ma are I a tia n nooria n te bong anne e kaoti ma otana ae akea kabotauana n te aonaaba aei. I kakoaua bwa “kiakian raneanean te boua ae kaaraki” bon te nonoori mairoun Tamara are i Karawa, ni kaoai n kakaea Ana tangira ao koauan ana euangkerio Iesu Kristo ae kaokaki. N reirei taekaia burabeti ngkoa n aron Moronaai ae kakoaua Kristo ao burabeti aika maiu aika a karaoa naba anne. Ni kakaea te kawai are I a kaman ukoukoria.
I ataia ae te Uea e kaoka ana euangkerio Iesu Kristo rinanon te Burabeti Iotebwa Timiti ao iai burabeti aika maiu n te bong aei aika a kairaki Irouna ni uoti nakoira koaua ao ni buokiira n oki nakon Tamara are i Karawa. I ataia bwa Iesu Kristo boni ngaia reken te rau ao te kimwareirei n te maiu aei ao n are imwiina naba.
Ataakin Ana euangkerio ae kaokaki ao kakabwaia ni kabane aika e anga a tia ni kakabwaiai maiu, ao n aron te bong arei n te ekaretia. I ataia bwa Tamara are i Karawa e na kaira maiu ngkana I teimatoa n Iria ao Ana tia uarongorongo.