Te Rikirake ngkai te Mitinare n Tain te COVID-19
Am taratara e kanakoraoi bwaai ni kabane.
Ngkana iai temanna ae titirakinai tabeua te namwakaina n nako bwa e na kanga aron au mition, I aki kona ni moantaai n taekina te mwananga are e tataningaai. Ma iai te bwai ae ti tebo arona: I teimatoa n riki bwa te mitinare n Ana Ekaretia Iesu Kristo Ibukiia Aika Itiaki ni Boong aika Kaitira—ma ngkai I bon mitinare naba n tain butanakon te aoraki.
Ma tera ae nanonaki n anne?
E nanonaki n ae karaoan nanon te Uea n te kawai ae nano riki. E nanonaki n ae kataakin buokan te Uea ma Natina ngkai a tabe ma te bitaki ae teimatoa. E nanonaki n reirei ni waekoa ni butimwaai bitaki aika boou. E nanonaki n reiakinan te kona ni kai bitaki, kariai bwaai ni kabane, taotaonaki n nano, ao n tangira ni katoa bong.
E nanonaki naba ni kaitarai bwaai aika aki koaua ao n titiraki iaon titiraki aika mwaiti n aron:
“E na kaokaki toau nakon mweengana ningabong?”
“Ti na kamwaingaki nakon te tabo ae boou ibukin te aoraki?”
“Tera ae na riki nakoia aomata aika ti reireiniia ngkana N na nako?”
Ti a tia n reitanako ara reirei n te euangkerio iaon bwaai ni kaongora, ma n tainako e aki bebete—ao bon tiaki te bwai ae tataneiai ni karaoaki n te mition are ti na iangoia. E ngae n anne, ti tiku ikai, ni matoa n ara babaire ni beku n te tabo are baireaki, ni beku ibukin te Uea n aki tabe ma te kangaanga ke e kanga aron karaoana, n riing nanoia Natina.
Bukin tera I rineia bwa N na teimatoa ni beku?
Eng, kangaangan te maiu ni mitinare a rota te rabwata, te iango, ao te tamnei—ti a tia ni bane n rinano tao teuana mai ibuakona. Eng, ti a tia ni kaaitarai karawawata aika a mwaiti ao n teimatoa ni kaaitara ma kakaewenako riki tabeua, ma ti kakaitau iroun Iesu Kristo, are E anga maiuna ibukira, ti ataia bwa aikai ni kabane a materaoi.
I a tia n ataia bwa Tamara are i Karawa e kinaira. E ataia ae e na iai mitinare aika a na aki kona n nako rinanon te tembora ke ni karoko n te tienta ni kataneiai ibukiia mitinare imwain nakoia nakon aia mition. E ataia ae ana iai kairake aika a na aki kona n reke aia tai ni beku n aaba ake a tia ni weteaki nako iai. E ngae n anne ao mitinare aikai ataia ae e tangiriia te Uea ao e kawakinira n aron are E kakaraoia n tainako. Ao bwa ara kekeiaki a tau Imatana. Ti a kaman tia n reiakinna ae ti kona ni beku ibukin te Uea ao n tibwaua Ana euangkerio n taabo nako ao ni kangaanga nako. Ao e bon uaana.
Tera ae kateimatoai bwa N na waaki nako?
Nii boong aika matoatoa, I kunea bwa iai uoua kawai aika ko kona n tarai n te tai aei:
-
Ma te anua are ko taraia bwa a na riki bwai aika bubuaka, n tataninga ma te aki taotaonaki n nano ibukin bwaai bwa ana okira aroia.
-
Ke ma te taratara ae boou, katean kouru, iangoan babaire aika raoiroi ao ake i bon ibukim, kabonganakin te bwai ae e riki aei ni karaoi bitaki aika ti a kaman kakantaningai ma a taotaonaki.
I kataia ni kabongana te kauoua n iango. Ngkai I iangoi kangaanga n te aonaaba aika tibwa riki, I kakaea ngkana te COVID-19 bon te tai are e na buokiira ni karabwarabwa riki n ara reitaki ke ni kaungaira ni kauki nanora riki nakon ara Tia Karikibwai ao n tangiria ni kan ongora Irouna. Ao ni moanibwaia te euangkerio nakon are ti a tia ni kakaraoia.
Tiaki ti aio te tai ae matoatoa ibukia mitinare—e matoatoa ibukiia aomata ni kabane. Ma n aron Kaben Moronaai ngke e weteia tabeman bwa a na ira te waaki n inaomata (taraa Aramwa 46), ti weteaki naba bwa ti na teirake ao n aki maaku. Ao n ataakina ae Tamara are i Karawa e memena i rarikira n tainako, ni kariaira bwa ti na beku ma nanora, marurungira, ara iango ao korakorara ni kabane, n aki tabe bwa tera (taraa Reirei ao Berita aika Tabu 4:2).
Ngkai ngaira ana mitinare te Uea, ti riai ni katikui ara iango n tainako iroun ara Tia Kamaiu ao ara kouru ae akea tokina. Ti na riai n uringnga ae Tamara are i Karawa e tangiriia Natina ni kabane ao E tangiriira bwa ti na oki Nakoina.
Ni koauana, ni matoatoa n riki bwa te mitinare n tain te COVID-19, ti kona ni karika te tai aei bwa te kabanea n tamaroa inanon maiura. Ni koauana, e a tia n riki ibukiu! Aikai a riki ibukin katuruan au taratara, ibukina bwa I kataia n tainako n ururinga au tangira ibukin Tamara are i Karawa ao nanou ni Buokia n ikotiia kain te bata are Iteraera ake a maenako. Ao I ataia bwa E na anganiia n tatabemaniia Ana mitinare ana nanoanga ngkana ti karaoa ara kabanea n tamaroa ni kakoroa nanon te wewete aei are E a tia n anganiira.